Nazir məktəb direktorlarına parolla rüşvət göstərişi verirmiş

gundemxeber.az Bir neçə gün öncə orta məktəblərdə şagirdlərin məktəbli formasına keçidi haqda danışan təhsil naziri Misir Mərdanovun açıqlamasını yaydılar. Həmin açıqlamaya görə, təhsil naziri jurnalistlərə deyib ki, heç bir məktəbdə, heç bir təhsil müəssisəsində nə şagirdlər, nə də müəllimlər hicabla dərslərdə iştirak edə bilməzlər. Gözlənilməzliyi ilə fərqlənən bu açıqlamanın mətbuatda yayımlanan variantını olduğu kimi təqdim edirik: «Lazım gələrsə, biz məktəbə məktəbli formasında gəlməyən şagirdləri dərsə buraxmayacağıq». Jurnalistlərə açıqlamasında təhsil naziri Misir Mərdanov şagirdlərin dərsə hicabda gəlməsi ilə bağlı məsələyə münasibət bildirərkən deyib ki, artıq Azərbaycanda məktəbli formasına keçilib: «Ona görə də kimliyindən asılı olmayaraq, bütün məktəblilər dərsə məktəbli formasında gəlməlidir».
Nazirin bu açıqlamasını bir çoxları hicaba rəsmən qadağa qoyulması, inanclı şagird və müəllimlərin geyiminə qarşı müdaxilənin başlanması kimi qiymətləndiriblər.
Aparılan müşahidələr də onu göstərir ki, məhz Misir müəllimin bəyanatından sonra həmin vaxta qədər maneəsiz şəkildə dərsə hicabla gəlib gedən şagirdlərə əngəllər yaradılır. Belə ki, bir çox məktəblərdə vahid məktəbli uniforması ilə yanaşı hicab geyinən şagirdlər heç bir problemlə qarşılaşmayıblar. Lakin bu açıqlamadan sonra paytaxtda, Sumqayıt və Gəncə şəhərlərinin orta məktəblərində hicablı şagirdlər dərslərə buraxılmayaraq, direktorlar tərəfindən məktəblərdən uzaqlaşdırılıb.
Əslində diqqət yetirsək görərik ki, təhsil naziri həmin açıqlamasında konkret olaraq məktəbli formalarını nəzərdə tutub. Misir Mərdanov hicabla orta məktəblərə gəlməyə qadağa qoyan hər hansı bir bəyanat verməyib. O deyib ki, orta məktəblərdə məktəbli formasına keçilməlidir. Nazir hicabla bağlı suala yenidən qayıdanda aydın olur ki, bununla bağlı hər hansı bir qərar qərar yoxdur.
Misir müəllim doğurdanmı hicabla bağlı konkret qadağa irəli sürüb? Onu da diqqətə çatdıraq ki, cənab nazirin buna qədər öz dilindən hicabın məktəblərdə tam sərbəst olması barədə açıqlamalar səslənmişdir. Bundan əlavə, insan haqları formatında keçirilən görüşlərdə də cənab Mərdanov məktəblərdə hicabın tam dəstəkləndiyini şəxsən bəyan etmişdi. Cənab Mərdanov bunun heç bir məktəb direktoru tərəfindən edilə bilinməyəcəyini də vurğulamışdı. Bütün bunlardan sonra son bir neçə gündə baş verənlər təəccüb və təəssüf doğurur.
Orta məktəblərdə hicaba qoyulan qadağanın yaratdığı gərginliklə bağlı dünən aldığımız xəbər isə daha dəhşətlidir. Belə ki, redaksiyamıza müraciət edən bir neçə valideyin övladlarının məktəbə hicabla buraxılması müqabilində məktəb direktorlarının onlardan rüşvət istəməsini bildiriblər. Sumqayıt və bakı şəhərindən olan bu valideynlər direktorların tələb olunan rüşvətə bəhanə kimi məhz nazirin açıqlamasını göstərdiklərini deyirlər: «Direktorlar bizə bildirirlər ki, şagirdləri hicabla məktəbə buraxa bilmərik. Nazir bununla bağlı göstəriş verib və göstərişin necə icra olunduğuna nəzarət etmək üçün nazirlikdən yoxlama gələcək.» Valideynlərin sözlərinə görə direktorlar rüşvəti həmin yoxlamaları yola salmaq üçün istədiklərini bildirirlər. Onu da qeyd edək ki, Sumqayıtda hər şagird üçün bir aya 10, Bakı məktəbləri ndə isə 20 manat pul tələb olunur.
Valideynlərin bu müraciəti bizə günün sonunda daxil olduğundan Təhsil Nazirliyindən məsələyə münasibət öyrənə bilmədik. Amma əlimizdə valideynlərin şikayəti üzrə konkret məktəblərin ünvanı göstərildiyindən növbəti sayımızda mövzuya bir daha qayıdacağıq.
Hələli ksə onu bildirək ki, 2009-cu ildə qəbul olunmuş «Təhsil haqqında» Qanuna da hicabın qadağası ilə bağlı müddəa daxil etmək təşəbbüsü olmuşdursa da, sonradan ölkə rəhbərliyinin iradə ifadəsi ilə bu müddəa tamamilə götürüldü və heç bir qadağa tətbiq edilmədi. İndi yenidən nazir səviyyəsində bu məsələnin gündəmə gətirilməsi və guya nazirin göstərişinə ciddi yanaşırmışlar kimi orta məktəblərdə bununla bağlı yeni korrupsiya mənbəyinin yaradılması hər şeyin əvvəlcədən düşünülmüş ssenari əsasında baş verdiyini göstərir.