Müharibədən sonra qonşu ölkələrə üz tutan suriyalı qadınlar arasında əxlaqsızlığa cəlb olunma halları çoxalıb

Dünya Suriyada müharibə başlayandan 2 milyondan artıq insan qaçqın düşüb ki, bunların da 70 %-dən çoxunu qadınlar və uşaqlar təşkil edir. Övladlarını götürüb qonşu ölkələrə üz tutan bu qadınların əksəriyyəti bir sıra çətinliklərlə qarşılaşırlar.

Maddi imkansızlıq, xəstəliklərə düçar olma artıq onlar üçün adi hala çevrilib. BBC-nin məlumatına görə, müharibədən sonra qonşu ölkələrə üz tutan suriyalı qadınlar arasında əxlaqsızlığa cəlb olunma halları çoxalıb.

Suriyalı qadınların taleyi yalnız əxlaqsızlığa cəlb olunmaqla bitmir. Bəzi məlumatlara görə, Səudiyyə Ərəbistanı və digər ölkələrdən gələn kişilər, qaçqın düşərgələrinə gələrək heç bir qurum tərəfindən tanınmayan sənədlər əsasında suriyalı qaçqın qadınlarla nigaha daxil olurlar. Bu cür nigahlar isə uzağı 1 həftə davam edir. Sonra onlar ölkədən gedir və bu yolla çoxlu sayda suriyalı qadın hamilə halda tərk edilir.

Həmçinin azyaşlı qızlar Səudiyyə Ərəbistanı, Qatar, İordaniya və Küveyt kimi ölkələrdən gələn zəngin kişilərə satılırlar. Ailələrinə isə başlıq pulu olaraq 2 min avroya yaxın pul verilir. Bu da yeməyə çörək belə tapmayanlar üçün sözün əsl mənasında, var-dövlətə çevirilir. Pul müqabilində satılan qadınların sonrakı həyatı isə əsl cəhənnəmi xatırladır.

Həyatını Suriyada davam edən qadınların bir hissəsi isə silaha sarılır və yaşamlarının mənasını daha çox silahlardan istifadə etmək hünərində görürlər.

Araşdırmaçıların fikrincə qadınların bu cür aqibətinin əsas səbəbi sosial, iqtisadi tələbatdır.

Düzdür bu gün dünya günahsız tökülən qanların cavabdehliyinin kimdə olduğunu axtarır. Amma bu axtarışlar digər tərəfdən günah törədənlərin sayını da artırır. İstər namusunu satmaqla istərsə də silaha sarılıb qan tökməklə