Ölkə boyunca təhsil işçiləri nazirə qarşı birləşib; seçki saxtakarlığında iştiraka görə ənam gözləyən müəllimlərin nə maaşı artırılır, nə də fond pulu yığmağa imkan verilir


Azərbaycan müəllimi seçki saxtakarlığında iştirakına görə alacağı mükafatdan məhrum edilib. Təhsil naziri Mikayıl Cabbarov respublikada "müəllim üsyanı” yetişdirir. Onlara çatacaq "seçki mükafatı” kəsilib, əmək haqlarının artırılması gözlənilmir, məktəblərdə fond pulu, bayram pulu, 8 mart və s. bu kimi xərac yığımları ləğv olunub, orta hesabla 100 mindən çox müəllim maliyyə böhranı içinə girib.
Süpürgə pulu və "seçki şabaşı”
Təhsil nazirinin gətirdiyi yeni qaydalar, süpürgə pulundan tutmuş ən adi məişət ehtiyaclarına qədər toplanan vəsaitlərin yığımına qadağa qoyulması müəllim korpusunu qəzəbləndirib. Üstəlik, onlara vəd edilən seçkidən sonrakı şabaş və pul mükafatı, o cümlədən maaş artımı planları təxirə salınıb. Ölkənin bir çox məktəblərində kütləvi narazılıq baş qaldırıb və direktorlar çətin vəziyyətə salınıb. M.Cabbarovun yeni təhsil sistemi ənənəvi reysdən çıxdığına görə müəllimlər Misir Mərdanova şükür etməyə başlayıblar. Hətta ölkə boyunca total şəkildə müəllim tətilləri başlanacağı da istisna deyil. Hər halda gedişat, müəllimlərin aşkar narazılıq etməsi, nazirin maaş barədə qeyri-müəyyən vədi bunu deməyə əsas verir.
Başqa bir tərəfdən isə M.Cabbarov "müəllim qiyamı” olacağından xəbərdarıq və proqnozlar göstərir ki, nazir özünü əvvəlcədən hazırlayıb. Onun arqumentləri bunlarıdır; aşağı səviyyədə rüşvəti yığışdırması, valideynlərin cibinə girən müəllimlərin bu imtiyazlarını əllərindən alması, direktorları süpürgə pulu yığımına son qoyması təhsil sahəsində irəliləyişdir.
Lakin nazirin bu addımı ciddi şəkildə qəzəb doğurub və müəllimlərin bir hissəsi məktəb daxilində direktorlara qarşı çıxış etməyə başlayıblar. Həmçinin, rayon təhsil şöbələrində də bir gərginlik hökm sürür. Seçki saxtakarlıqlarında canfəşanlıq nümayiş etdirən, hakimiyyətin səs oğurluğunda iştirak edən, iqtidara hər 5 ildən bir əl uzadan müəllimlərin "saray” qiyamı nə ilə nəticələnəcək bəlli deyil. Onlar göstərdiyi xidmətə görə haqq tələb edirlər.
Korrupsiya olar, rüşvət yox?
Bütün bu yuxarıda qeyd etdiyimiz xronoloji və səhih xəbərləri ötürən təhsil analitiki "Yeni Cümhuriyyət”ə bildirdi ki, M.Cabbarov gözləmədiyi bir vəziyyətlə qarşılaşa bilər və bu, fəlakətlə nəticələnər. "Müəllimləri aldatdılar. Onlara hökumət səviyyəsində atdılar. bütün təhsil işçiləri güman edirdi ki, maaşlar qaldırılacaq, seçkidən sonra fond pulu və bu kimi rüşvətlər yenidən bərpa olunacaq. Ancaq deyilənlərin tərsi baş verdi. Nazir ən yuxarı təbəqədə korrupsioner fəaliyyətini davam etdirir, müavinlər və şöbə müdirləri aylıq "paket” alır, direktorlar "qaz vurub, qazan doldurur”, amma sıravi müəllimlərin "ağzı ətə çatmayıb”. Ona görə də nazirdən ciddi narazılıq var. Müəllimlər Mikayıl Cabbarovu qəbul etmirlər.
Hətta onu lənətləyənlər, istefasını arzulayanlar belə var. Müəllimlər arasında gəzən söz-söhbətə görə, onların fond pulundan məhrum edilməsi, maaş artımının olmaması açıq şəkildə fırıldaqçılıqdır. Bəzi müəllimlər danışırlar ki, seçki günü məntəqələrdə "karusel” əməliyyatı və s. saxtakarlıqlarda iştirak edib, iqtidara köməklik göstəriblər. Ancaq bunun əvəzində "bəxşiş” ala bilmirlər ,”- deyə təhsil eksperti qeyd edir.
Şərhçinin sözlərinə görə, məsələ Prezident Administrasiyasında müzakirə olunub. Müəllimlərin dolanışıq məsələsinə toxunulub. İclasda nazir iştirak edib və öz arqumentlərini irəli sürüb. Onun təhsilə xidmət etdiyi, bu qadağaların xeyirli addım olduğu deyilib. Qərara alınıb ki, M.Cabbarova şərait yaradılsın, ona imkan verilsin və müəllimlərin əmək haqları artırılmasın. Belə hesab olunub ki, onsuzda işdən xaric olunmaq qorxusu ilə yaşayan müəllimlər etiraza qalxa bilməyəcəklər.
Nazir açıq danışdı
Nazir özü də rəsmi şəkildə bu məsələyə aydınlıq gətirib. "Azərbaycanda müəllimlərin peşəkar keyfiyyətləri və iş təcrübələrinə görə müəyyən amillər tətbiq edilməlidir”. APA-nın xəbərinə görə, bunu təhsil naziri Mikayıl Cabbarov Təhsil Şurasının ümumi yığıncağında çıxışında deyib. Nazir bildirib ki, bu gün bəzi məktəblərdə müəllim sıxlığı yüksəkdir, bəzilərində isə müəllim çatışmır. Onun sözlərinə görə, kifayət qədər sadə optimallaşdırma tədbirlərini həyata keçirməklə müəyyən məsələlərin həllinə nail olmaq olar.
M.Cabbarov qeyd edib ki, Azərbaycan məktəb sistemində fəaliyyət göstərən 170 minə yaxın müəllim ordusunun təxminən 4 faizi 1-5 saat dərs yükünə malikdir: "Bu kimi məsələlər və məhdudiyyətlər bizə imkan verir ki, optimallaşdırmanı tez bir zamanda həyata keçirə bilək. Hazırda da ümumi təhsil sistemində müəllimlərin əmək haqlarının artırılması və optimallaşdırma istiqamətində müəyyən işlər aparılır”.
Nazir qeyd edib ki, ölkədə şəxsiyyətyönümlü təhsil yalnız dərsliyin və onun içində yazılanın dəyişdirilməsi ilə kifayətlənmir. Onun sözlərinə görə, bu təhsil verənlə, təhsil alan arasında ünsiyyətin təbiətinin də dəyişilməsini tələb edir: "İllərlə, on illərlə vərdiş olunmuş işə yanaşmaların yenidən baxılması və yeni məzmunun məqsədindən necə istifadə etmək əsasdır. Təhsil sistemində mövcud olan müəllim ordusu, ali məktəblərdə, orta ixtisas təhsildə yeni məzmunun, məqsədlərin nədən ibarət olduğunu çatdıra bilirikmi və bu gündəlik fəaliyyətdə nə kimi məsələlər tələb edirikmi? Bu kimi suallara cavab tapılmalıdır”.