20 illik şirkət texniki problemlərin qarşısında acizdir
Bakcell şirkəti ilə bağlı abunəçilərinin yaşadığı problemlər barədə dəfələrlə mətbuatda yazılar yazılıb, şikayətlər qabardılıb. Gələn il fəaliyyətə başlamasının 20 illiyini qeyd edəcək mobil operator ya abunəçilərin şikayətinə barmaqarası yanaşır, ya da bu problemləri həll etmək gücündə deyil.

Aldadıcı reklamlarla özünə abunəçi toplamaq asandır,amma müştəri məmnuniyyətini nəzərə almaq, pul qazanmaqla yanaşı öz nüfuzunu qorumaq görünür Bakcell üçün çətin məsələdir. Məsələ ondadır ki, son vaxtlar sözügedən mobil operatordan istifadə edən abunəçilərin şikayətləri xeyli artıb. İş o yerə gəlib çatıb ki, telefon danışıqları zaman tez-tez əlaqə qırılır, ya da səs kəsik-kəsik gəlməyə başlayır, rabitə yarıda dayanaraq donur. İstər bayram günləri, istərsə də adi günlərdə bu cür hallar tez-tez baş verir. Mütəmmadi olaraq Bakcell şəbəkəsində yaşanan problemlərlə yanaşı son günlər mobil operatorun danışıq kartlarında da ciddi nöqsanlar baş verir. Abunəçilər danışıq kartlarını yüklədikləri zaman problemlərlə qarşılaşırlar. Abunəçilərin sözlərinə görə, balanslarını artırmaq istədikləri zaman kodun yalnış olduğu ilə bağlı onlara sms gəlir. Bir necə dəqiqədən sonra başqa bir danışıq kartı yüklədiklərində də eyni aqibətlə üzləşirlər. Ümümiyyətlə Bakcell-in danışıq kartları ilə bağlı zaman-zaman problemlər yaşanır. Müştəri xidmətləri isə yaranan çətinliyi texniki problemlə əlaqələndirir və bildirlər ki, indiki halda heç nə edə bilməzlər, texniki çətinliyin aradan qaldırılmasını gözləmək lazımdır. 20 ildir fəaliyyət göstərən bir şirkət belə kiçik problemlərin qarşısında acizdirsə, onda abunəçi nəyə görə, Bakcell-i seçməlidir.

Ümumiyyətlə, son günlər Bakcell-lə bağlı abunəçilərin yaşadıqları problemlərin bir hissəsini belə qruplaşdırmaq olar.
1. Gold Tarif paketindən istifadə edən abunəçi telefon danışığında sonra istifadə etdiyi məbləği öyrənə bilmir. Balans 1-2 saatdan sonra hesablanır. Abunəçi balansını tez-tez yoxlamasa, nəzarətdə saxlamasa, bir də baxacaq ki, külli miqdarda borc yığılıb. Bu borcun hardan yarandığını soruşmaq üçün məlumat mərkəzinə zəng edən zaman məsləhət görürlər ki, yaxınlaşın müştəri xidmətlərinə. Bakcell-in müştəri xidmətlərində yaşanan çətinlikləri isə saymaqla bitməz. Digər tarif paketlərində isə, abunəçi balansı ilə bağlı məlumatı almaq üçün bu operatora pul ödəməlidir. Belə ki, “178” və ya *100# хidmətindən istifadə edərək balansını öyrənmək istəyən abunəçidən 2 kontur silinir. Əks halda abunəçi balansında nə qədər məbləğin qaldığını öyrənə bilmir. Bu abunəçiyə sərf etməsə də, operatora sərf edir.

2. Hər ayın sonunda axşam saat 20.00-dan sonra abunəçinin istifadə etdiyi sms-in pulu növbəti ay üçün hesablanır. Bu problem əsasən Bakcell-in Gold tarif paketindən istifadə edən abunəçilərində yaşanır. Burda da abunəçilərin balanslarından sms oğurlanır.
3. Abunəçilərin yaşadıqları problemlərin hamısını müştəri xidmətlərində mobil operatorun sisteminin boynuna yıxırlar. Özü də nə hikmətdirsə, bu sistem səhvləri həmişə müştərinin əleyhinə, şirkətini isə lehinə olur.

4.Telefon danışıqları zamanı zəng 2 saniyə tez ve 2 saniyə gec bitir. Belə ki, telefon danışığı başlayanda 00.00.00-dən yox, 00.00.02 saniyədən başlayır. Bu isə ona gətirib cıxarır ki, tutaq ki abunəçi 59-60 saniyə danışan zaman ondan 1 dəqiqə və 15 saniyənin pulunu tuturlar.

5. Bakcell-in təklif etdiyi Data Kartlar həm keyfiyyətsiz, həm də sürət baxımından aşağıdır. Belə ki, həmin kartlarda sürətin 1024 Mbt olduğu göstərildiyi halda, sürətin heç 100 olmadığı da diqqəti çəkir. Məhz buna görədir ki, istifadəçilər adi bir saytı açmaq üçün 20 dəqiqə gözləmək məcburiyyətində qaldıqlarını vurğulayırlar.
Bu Bakcell abunəçilərinin yaşadıqları problemlərin çox cüzi bir hissəsidir. Ümid edirik ki, 2,6 milyondan çox abunəçi sayına malik olan mobil operator yuxarıda göstərilən problemləri tez bir zamanda yoluna qoyacaq.

Mövzu ilə bağlı qarşı tərəfin də mövqeyini dərc etməyə hazırıq.