Ermənistan-Azərbaycan sərhədinin Kəlbəcər bölgəsində vəziyyət günbəgün gərginləşməkdədir. Dişlərində şirə qalıb, 1993-cü ildə də Kəlbəcərdən revanş götürmüşdülər axı... Anlamırlar ki, Azərbaycan o Azərbaycan deyil, həmsədrlər həminki olsa da!

10 noyabr və 11 yanvar üçtərəfli anlaşmasını pozan düşmən ölkə açıq şəkildə həyasızlıq edir. Azərbaycan Müdafiə Nazirliyinin məlumatına görə, Basarkeçər istiqamətindən tank və minaatanlardan istifadə edərək mövqelərimizi atəşə tutublar. Düzdür, düşmənin burnu növbəti dəfə lazımi şəkildə ovulub. Amma Ermənistanda bu cəsarət hardandır?

Cəmi 44 günə ordusu darmadağın edilən, 10 min fərarisi olan, hərbi texnikasının, müxtəlif növ silahlarının xeyli hissəsi Xəzər sahilindəki Hərbi Qənimətlər Parkında sərgilənən erməniləri kimdir cürətə gətirən, “qorxma, səninləyəm”, deyən?

Məncə, bu sualın cavabını araşdırmaq üçün son günlərin xəbərlərinə göz gəzdirmək lazımdır. Elə iki gün əvvəl ABŞ-ın Ermənistandakı səfiri Linn Treysi Zəngəzura səfər etdi. Ermənistanın vəziyyəti gərginləşdirdiyi Basarkeçərdən üzü bəri, Kəlbəcər tərəfə boylandı, erməni hərbçilərin əhatəsində! Niyə, çoxmu vacib idi? Necə olur ki, Ağ Ev-in Bakıdakı səfiri Şuşaya gedən diplomatik korpusa qoşulmur, amma Amerikanın İrəvandakı səfiri Linn Treysi Ermənistan Müdafiə Nazirliyinin nümayəndələrinin müşayiəti ilə Azərbaycanla sərhəddək gəlir? Düz Yuxarı Şorja qədər...

Bir neçə saat sonra isə ermənilər Azərbaycan mövqelərini məhz həmin istiqamətdən tank və minaatanlardan atəşə tuturlar! Bu qədər təsadüf olarmı? Avtomatdan tankadək uzanan təsadüf...

Özü də bu, ilk səfər deyil. Aprelin sonlarında da amerikan səfir Zəngəzura təşrif buyurmuşdu. Heç sağlam məram-məqsəd görünmür...

İyulun 23-də gizirimiz Fərman Yaqublu həmin bölgədə həlak olanda məlum paytaxtlardan ciddi reaksiya gəlmədi. Amma elə ki Azərbaycan ordusu cavab tədbirlərinə əl atdı, Dövlət Departamenti vətəndaşlarına “getməyin” çağırışı etdi, narahatlığını bildirdi.

Ermənistandakı səfirlərin sanki ayrı iş-gücü yox imiş, İrəvan-Zəngəzur marşrutunda işləyirmişlər. Bakıdakı hər üç ölkənin səfirləri isə “Biləcəridən o tərəfə” keçmir. Yəqin bir azdan İrəvandakı Fransa səfiri Jonatan Lakottini də Basarkeçər dağlarında görəcəyik. Hələlik getməsə də, mövqeyi ortada. Bu günlərdə diplomatik çərçivəni və etiketləri aşaraq qırmızı xətti keçdi. “status müəyyənləşənə qədər nə Fransanın Bakıdakı, nə Ermənistandakı səfiri Qarabağı ziyarət edə bilməz”, deməklə. Bu səfircik doğrudanmı anlamır Qarabağ Azərbaycan ərazisidir və onun boşboğazlığına yer yoxdur? Yaxşı bilir, sadəcə Ermənistandakı revanşistlərin menyusuna “xaric” oxuyur. Zəngəzur dəhlizinə dil uzadan fransıza anlatmaq gərəkdir ki, Zəngəzurun Azərbaycandan alınıb, Ermənistana verilməsindən bəhs edən manşet yazılarını elə Fransa qəzeti 1920-21-ci illərdə manşetlərdən dərc edib! Ermənicə danışığına ara verib, bir az da fransızca oxusun...Əslində Azərbaycan Dəmir Yollarının balansında olan Mehri dəmir yolu - Zəngəzurdan keçən nəqliyyat dəhlizinin məhv edilməsinə görə Azərbaycan Ermənistana qarşı təzminat davası açmalıdır və açacaq da! Zəngəzur bölgəsi Ermənistana veriləndən sonra belə, Azərbaycanın əsas hissəsini Naxçıvanla birləşdirən dəmir yolu Azərbaycanın balansında olub, sovetlər zamanı belə!!!

Bölgəyə burun soxmağa çalışan qüvvələr sinirə bilmirlər Azərbaycanın artan uğurlarını. Baxırlar ki, “Azərbaycan Dəmir Yolları” Şuşa istiqamətində dəmir yolu xəttinin çəkilməsi ilə bağlı layihələndirmə işləri aparır.

Zəfər yolundakı tunellərə baxırlar, havalanırlar! Azərbaycan və Türkiyə arasındakı Şuşa Bəyannaməsinin qorxusu canlarından çıxmamış daha bir tarixi anlaşma imzalandı: Azərbaycan, Pakistan və Türkiyə arasında Bakı Bəyannaməsi! Ermənilərdən “maşa” kimi istifadə edənlər görürlər ki, belə getsə, tezliklə “ocaq sönəcək”, odur ki, körükləyirlər, alovlandırmaq istəyirlər! Amma anlamaq istəmirlər ki, odu söndürüb, külü ilə oynayırlar, proseslər geridönməz xarakter alıb! Görünən budur ki, iyulun 27-sindən 28-nə keçən gecə və səhər saatlarında atılan güllələr...Bakı Bəyannaməsinə atıldı, təkcə Azərbaycana yox, Türkiyəyə, həmçinin Ermənistanı ölkə yerinə qoymayan Pakistana! Bu, həm də parlament sədrlərinin Şuşa səfərinə açılan güllələr idi. Çəkindirmək istəyirlər.

Ermənilərin himayədarları baxırlar ki, Şuşa artıq görüş yerinə çevrilib, dəli olurlar bu mənzərədən və erməni ordusuna təxribat təlimatı verirlər. Olsun! Cavablarını alacaqlar. Necə ki, ötən müddətdə aldılar. Böyük oyunların qurbanı olan ermənilər özləri bilsin. Hələ Qarabağdakı 1616-cı meyiti dünən tapdılar. İndi də Basarkeçərdən meyid toplayırlar. Budəfəki böyük müharibədə ikinci Hərbi Qənimətlər Parkı Qərbi Zəngəzurda qurula bilər...

Müşahidələr deyir ki, bu dəfə “atan kazaklar” deyil. Rusiya istəmir ki, onun sülhməramlı imici zədələnsin. Görmədinizmi Laçın dəhlizində atəşkəsin pozulması barədə erməni mənbələrini sülhməramlı videomüraciətlə təkziblədi? Budəfəki güllələri həm də Rusiyanın sülhməramlı missiyasına şərik olmaq istəyən paytaxtlar atdırır erməniyə./musavat.com/