BŞİH belə vəziyyətlərə ancaq ölüm hallarından sonra reaksiya verir

Buzovna qəsəbəsi, Sübhi küçəsi, 2 ünvanda yerləşən doqquzmərtəbəli binada yanğından ziyan dəymiş iki mənzilin sakinləri Bakı Şəhər İcra Hakimiyyətindən heç cür yardım ala bilmir.
Bina Bakı meriyası Mənzil-Kommunal Təsərrüfat Departamentinin 1 saylı Xüsusi Mənzil-Kommunal Təsərrüfat Birliyinin tabeliyindədir.
2016-cı il dekabrın 18-də 7-ci mərtəbədəki mənzildə yanğın baş verib və bundan 8 və 9-cu mərtəbələrdəki mənzillərə ziyan dəyib. Balkonlardakı plastik pəncərələr tamamilə yanıb, qapı və pəncərələr əriyib. Yanğına səbəb olan şəxs öz mənzilini təmir edib, 8 və 9-cu mərtəbələrdəki mənzillərin sahiblərinin isə pəncərə düzəltmək üçün vəsaiti yoxdur.
Martın sonlarında onlar Prezident Administrasiyası, FHN, baş prokuror, Bakı Şəhər İcra Hakimiyyətinin başçısına məktub göndəriblər, ancaq cavab almayıblar.



“Gündəm Xəbər” bildirir ki, Turan agentliyi də Bakı merinə bu cür informasiya sorğusu göndərib və fevralın 23-dən yanğının nəticələri ilə bağlı suallara məhkəmə qaydasında cavab axtarır.
Yanğına beş il öncə binanın təmiri zamanı şəhər hakimiyyəti tərəfindən qoyulan köhnə laminat üzlüklər səbəb olub. 2015-cı ildə bu cür üzlüyü olan binalarda ardıcıl olaraq baş verən yanğınlardan sonra hakimiyyət binalardakı üzlükləri dəyişib. Lakin inşaatçılar “xaltura edərək” Sübhi, 2 ünvandakı binada balkonlardakı köhnə yanmış üzlükləri saxlayıblar. Dekabrın18-də güclü yanğının baş verməsinə məhz onlar səbəb olub.
İndi bütün üzlük deformasiyaya uğrayıb və plitələr binadan qoparaq yerə düşür, piyadaların həyatına təhlükə yaradır. Eyni hal qonşuluqdakı binada da baş verir. Binadan qopan navalçalar yolu keçənlərin başına düşür, ancaq şəhər hakimiyyəti bunu vecinə almır.
Hakimiyyət belə vəziyyətlərə ancaq ölüm hallarından sonra reaksiya verir. Görünür, indi də meriya vəziyyəti düzəltmək üçün bunu gözləyir.