Ötən ilin dekabr ayının sonlarında Qusar ərazisində itkin düşmüş 3 alpinistin axtarışlarını son 2 gündə aparmaq mümkün olmayıb

Buna səbəb son günlərdə müşahidə edilən kəskin hava şəraiti olub. Fevralın 18-dən başlayaraq əraziyə yenidən güclü qar yağıb. Axtarış aparılan ərazilərdə qarın hündürlüyü 60 sm-ə yaxındır. Güclü qar olan ərazidə hər an uçqun təhlükəsi olduğu üçün axtarışlar aparmaq qorxuludur.

Bununla belə FHN-nin əməkdaşları yaradılmış qərargahı tərk etməyib, iki gün əvvəl yük avtomobili ilə qərargah üzvlərinə ərzaq da aparılıb.

Hazırda Qubanın Xınalıq kəndindən Şahdüzünə gedən yolda güclü qar səbəbindən bağlıdır. Yolun açılması müvafiq qurumların köməyilə təmin ediləcək. Hava şəraiti imkan verən kimi axtarışlar bərpa ediləcək.

Xatırladaq ki, itkin düşənlər "Gilavar” idman klubunun 3 üzvü - 1983-cü il təvəllüdlü Namin Bunyatzadə, 1990-cı il təvəllüdlü Babur Hüseynov və 1991-ci il təvəllüdlü Fəridə Cəbrayılzadədir. Onların axtarışı ötən ilin son günlərindən davam etsə də, hələlik heç bir nəticə əldə edilməyib.