Azərbaycanda dəyərlərin aşağılanması, xalqın ziyalılarının, klassiklərinin təhqir olunması tendensiya halını almaqdadır

Kəramət Böyükçöl adlı müxbirin Xəlil Rza Ulutürkü, Şəhriyar Del Gerani adlı şeir yazanın ayrı-ayrı adamları aşağılaması qınaqla qarşılanmışdı.

İndisə Elşad Barat adlı özünə şair deyən biri feysbukda “zühur” edib. O, nakam şairimiz Mikayıl Müşfiq barəsində ağzına gələni yazıb.

Neçə gündür Mikayıl Müşviqi oxuyuram. Çox mənasız adam olub. Tam səmimi deyirəm. Bunu öz “Facebook” statusunda Elşad Barat adlı gənc şair yazıb.

E. Barat iddia edib ki, onun (yəni, Mikayıl Müşfiqin - red.) bu qədər tanınmağı, böyük şair kimi hörmətə sahib olması təsadüfdür.

“Tam onun öldüyü yaşdayam. Mənim bu yaşda düşündüklərim bəllidir. O isə çox qıjı düşüncənin adamı olub.

Düşüncəsi 15 yaşlı qaqaş düşüncəsindən aşağıymış. Mənə elə gəlir, onun bütün şeirləri mənim bir şeirimə dəyməz. Sadəcə, o, nakam ölüb deyə, camaatın ona yazığı gəlir”.

Qeyd edək ki, statusun yazılmasından ötən bir neçə saat ərzində yüzlərlə insan həmin statusa şərh yazaraq, E. Baratı kəskin şəkildə tənqid edib, etirazını bildirib.

Eyni zamanda, onlarla insan bu statusa etiraz əlaməti olaraq, öz statuslarında E. Baratı boykot etməyə çağırıblar.

Tanınmış ziyalı, yazıçı-dramaturq Firuz Mustafa isə E. Baratı ilk öncə Mikayıl Müşfiqin soyadını düzgün yazmağı öyrənib, sonra onun haqqında fikir bildirməyə çağırıb:

“Ə…əvvəla, dahi şairin adını düzgün yazın. “Müşviq” yox, Müşfiq, yəni şəfəq. İkincisi də, ölənlərin ruhuna toxunmayın”.

gundemxeber.az fia.az-a istinadən xəbər verir ki, AYB-nin mətbuat xidmətinin, həmçinin "Müşfiq Komissiyası”nın rəhbəri Xəyal Rzanın fikirlərini açıqlayıb. Xəyal Rza bu cür "yazar"ların ancaq sosial şəbəkələrdə səslərinin çıxdığını bildirib:

“Yazıçılar, şairlər azad insanlardır. Biz kiməsə əxlaq dərsi keçə bilmərik. Bu həm də əxlaqi məsələdir.

Kimsə daxilindəki qara fikirləri "qusur"sa, AYB bununla bağlı nə edə bilər? AYB ictimai təşkilatdır. Biz kimlərinsə daxili fikirlərinə qarşı çıxa bilmərik.

Lakin Azərbaycanın dəyərlərinə toxunulması hallarında nə AYB, nə də ki, ictimaiyyət bu cür hadisələrin qarşısında susa bilməz. Ən azı həmin şəxs ictimai qınaqla cəzalandırılmalıdır.

Cəmiyyət bu cür məsələlərdə aktiv olmalıdır. Çünki adını çəkdiyiniz yazıçılar məhz sosial şəbəkələrdə hoqqa çıxarırlar. Başqa yerlərdə onlara meydan verən olmur.

Adı çəkilən yazıçı Mikayıl Müşfiqin atılmış dırnağı belə ola bilməz. Azərbaycanın nakam şairi, mükəməl qələm sahibi olan şəxsiyyətə söz atılıbsa, yəqin ki, onun cavabı ilk olaraq dostluğunda olan şəxslər tərəfindən veriləcək”.

Sonra E.Barat üzr istəyib: “Mikayıl Müşviq bizim dəyərli şairimizdir. Şeirləri zəif olsa da. Mən onun şəxsiyyəti haqqında heç vaxt heç yerdə artıq-əskik nəsə deməmişəm.

Statusun da onun şəxsiyyətinə heç bir aidiyyəti yoxdur. Bir şair kimi həmkarımın yaradıcılığına münasibət bildirmişəm”.

E.Barat qeyd edib ki, əslində, həmin statusu yazmaqla böyük şairi təhqir etmək sitəməyib. O, həmçinin statusu yazmağının səbəbindən də danışıb:

“Şeirlərini, kitablarını oxudum. Gördüm ki, imzası ilə yaradıcılığı arasında fərq var. Həmin statusu yazmağım səbəb də elə bu oldu.

Düzdür, biraz sərt şəkildə yazmışam. Özüm də sonradan gördüm ki, kobudcasına yazmışam.

Mənim Mikayıl Müşfiqin şəxsiyyəti ilə heç bir problemim yoxdur. Ola bilər ki, həmin günü müəyyən qədər spirtli içki qəbul etmişdim, kobudluğa bu səbəb ola bilər.

Amma içkinin o statusu yazmağıma heç bir dəxli yoxdur. Səhvim odur ki, araşdırma aparmadan sərt şəkildə yazmışam. Sadəcə, bir şair olaraq, onun yaradıcılığını yumşaq şəkildə tənqid edə bilərdim.

Mən əslində, statusda Mikayıl Müşfiqi təhqir etməmişəm. Çünki, statusu normal şəkildə oxuyanda başa düşülür ki, mən onun yaradıcılığını tənqid etmişəm”.