Bakı Ağır Cinayətlər Məhkəməsində Beynəlxalq Bankın keçmiş rəhbəri Cahangir Hacıyev və onunla birlikdə mühakimə olunan 21 nəfərin barəsindəki cinayət işi üzrə növbəti məhkəmə prosesi keçirilib.

Müttəhimlər kürsüsündə sabiq deputat Dünyamin Xəlilov, C.Hacıyevin bacanağı İsmayıl Hidayətzadə, Zaqatala Olimpiya Kompleksinin direktoru, “Simurq” futbol klubunun vitse-prezidenti Arif Ramazanov, şüşə məmulatlarının istehsalı ilə məşğul olan “İnterglass” ASC-nin rəhbəri Fariz Muradov və digərləri əyləşib.

Təqsirləndirilən şəxslərə qarşı CM-nin 179.3.2 (külli miqdarda ziyan vurmaqla mənimsəmə), 308 (vəzifə səlahiyyətlərindən sui-istifadə etmə), 213 (vergidən yayınma) və başqa maddələri ilə ittihamlar irəli sürülüb.

Zərərçəkmiş qismində “Azərbaycan Beynəlxalq Bankı” ASC, Vergilər Nazirliyi və “Aqrokreditbank” tanınıb.

Prosesdə şahid qismində Cəbrayıl Süleymanlı ifadə verib. Şahid Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyi “Azərinşaat layihə” İnstitutunda mühəndis işlədiyini deyib: “Dünyamin Xəlilova məxsus şirkətlərin tikinti işlərinin Forma-2-sini yoxlamışıq. Bizə tapşırıq nazirlikdən verilmişdi. Yasamalda, Zaqatalada görülən işlərin sənədlərini təqdim edirdilər, biz də yoxlayırdıq. Yəni Forma-2 verilirdi, biz də həcmini hesablayıb tərtib edirdik".

Prosesdə Beynəlxalq Bankın sabiq əməkdaşı Fuad Cəfərov da dindirilib. O, ifadəsində göstərib ki, həmin vaxtlar onlara şirkətlərdən kredit götürülməsi ilə bağlı müraciətlər olunub: “Biz də bu barədə Kredit Komitəsinə məlumat verirdik. "İntertekstil" şirkəti də bizə müraciət edib. Bu şirkət bankla dörd-beş dəfə müqavilə bağlayıb. Onlara, təxminən 1.5 milyon manata qədər kredit verilirdi. Təminatçı da elə şirkət özü olurdu. Bizə göstəriş gəlirdi ki, "İntertekstil"ə kredit verək".

Digər şahid Azər Rzayev də ifadəsində Beynəlxalq Bankda işlədiyini, şirkətlərə kreditin verilməsi ilə bağlı qərarın bankın Kredit Komitəsi tərəfindən verildiyini bildirib: "Biz sənədləri hazırlayıb, Komitəyə göndərirdik. Daha sonra qərarı Kredit Komitəsi verirdi".

Daha sonra şahid qismində Beynəlxalq Bankın sabiq filial rəhbəri olmuş İlqar Abdullayev dindirilib. Məhkəmədə elan olunub ki, İ.Abdullayev C.Hacıyevlə birgə ittiham edilib, məhkəmənin hökmü ilə ona şərti cəza verilib. İ.Abdullayev qeyd edib ki, bankda yüksək məbləğdə kreditlərin verilməsi Kredit Komitəsinin qərarı ilə olub.

C.Hacıyevlə birgə ittiham edilən və Bakı Ağır Cinayətlər Məhkəməsinin hökmü ilə şərti cəza alan Kənan Orucov ifadəsində qeyd edib ki, 2003-2015-ci illərdə Beynəlxalq Bankın Nəqliyyat filialının rəhbəri işləyib: ""Spotline" şirkəti 1.5 milyon manatlıq kreditlə bağlı müraciət etdi. Mən də Kredit Komitəsinə məlumat verdim. Sonra sənədlər hazırlandı, həmin şirkətə kredit verildi".

Məhkəmədə fasilə elan edilib. Proses fasilədən sonra davam edəcək.