Lənkəranda icra hakimiyyətinin Milli Məclisə keçiriləcək seçkilərə müdaxilə etməsi ilə bağlı məlumatlar yayılmaqdadır.

Gundemxeber.Az AzToday.az-a istinadla xəbər verir ki, 73 saylı seçki dairəsindən deputatlığa namizəd Yadigar Sadıqlı bu barədə status yazıb:

“Bu gün Lənkəranda 3 dəfə toplantı olub. Növbə ilə müxtəlif büdcə təşkilatı işçilərinin, əsasən də müəllimlərin çağırıldığı toplantıda icra başçısının birinci müavini, YAP Lənkəran təşkilatının sədri Möhübbət Babayev, icra başçısının müavini, YAP Lənkəran təşkilatının Qadınlar şurasının sədri Rasilə Arifqızı YAP-ın rəsmi namizədinin əleyhinə təbliğat apararaq hamını bitərəf Rüfət Quliyevə səs verməyə çağırıblar.

Çox narahatdırlar”.

Jurnalist İbad Manafov isə Lənkərandakı seçki prosesi ilə bağlı çox ilginc məlumatlar yayıb. Jurnalist bloq yazısında iddia edib ki, icra başçısı Taleh Qaraşov seçki prosesinə kobud müdaxilə etməkdədir:

“Lənkəranda seçkinin saxtalaşdırılması prosesinə başlanılıb.

Lənkəran sakinlərinin verdiyi məlumata görə, icra başçısı Taleh Qaraşov bütün inzibati resurslarını seçkiyə cəlb edib. Taleh Qaraşov son 4 gündə 6 toplanti keçirib. Müəssisə, əsasən isə orta məktəblərdən müəllimlər toplanilir və onlara seçkilərdə mütləq əvvəlki namizədlərə səs vermək üçün təbliğat aparılır. Artiq onbaşı və yüzbaşilar təyin olunub. Bu gundən isə hər bir məktəb kollektivi ayrica olaraq Heydər Əliyev mərkəzinə toplanılır və Hadı Rəcəbli və Rufət Quliyev ucun güclərin səfərbər olunmasi tapşırılıb.

Ən maraqlisi odur ki, YAP-ın Lənkəran şöbəsinin sədri, icra başçısının birinci muavini Möhübbət Babayev YAP-in namizədi Guloglan Bağırova yox, bitərəf Rüfət Quliyevə səs verilməsini xususi tapşırıb”.

Bloq yazısında jurnalist Yelena Siderenkonun namizədliyinin geri götürməsi ilə bağlı maraqlı versiya səsləndirilib:

“… 73 saylı dairədən namizədliyini geri götürən Yelena Siderenkonun yerli icra orqanlari “anası ermənidir” kimi ittihamı ilə bağlı tanınmış jurnalistin prezidentə muraciət edərək Taleh Qaraşovdan şikayət edib.

Sakinlərin sözlərinə görə, Yelena Siderenko məhz icra hakimiyyətinin erməni ittihamı ilə başlanan iyrənc kampaniyadan inciyib və buna görə namizədliyini geri götürüb. Həmin kampaniyanı da icra başçısı aparıb.

Bu məsələ ilə bağlı jurnalistin dövlət başçısına və müvafiq qurumlara şikayət edib və şikayətini sonadək davam etməkdə israrlıdır”.

Səslənən iddialarla bağlı Lənkəran İcra Hakimiyyətinin də mövqeyini dərc etməyə hazırıq.