Ölkədə koronavirusa yoluxma halları çoxaldıqca, Nazirlər Kabineti yanında Operativ Qərargah mütəmadi olaraq qərarlarını dəyişir. Artıq Bakının bir neçə xəstəxanası virusa yoluxanların çoxalması səbəbindən təyinatı dəyişdirilib, mövcud xəstələr isə digər tibb müəssisələrinə köçürülüb.
Bildirək ki, Bakı, Gəncə, Lənkəran, Abşeron və Sumqayıt şəhərlərində ikigünlük sərt karantin rejiminin tətbiq olunması rayonlara xeyli sayda əhalinin axınına səbəb olub. İyunun 15-də Bakıya qayıdış zamanı təkcə, Cənub bölgəsi istiqamətində 21 km-lik avtomobil tıxacının yaranması axının hansı səviyyədə olmasını deməyə imkan verib. Rəsmi qurumların açıqlamasından bəlli olan odur ki, çoxlu sayda insanın Bakını tərk etməsi və rayonlarda məskunlaşması yaxşı nəticələr verməyəcək.
GundemXeber.Az Jamaz.Info-ya istinadən xəbər verir ki, Bakıdan sərt karantindən axın edənlərin üz tutduqları rayonlardan biri də Masallı olub. Hətta rayonun əsas istirahət zonası olan "İsti Su" ərazisində kilometrlərlə uzunluqda tıxaclar yaranıb. Bundan başqa, turist sayının çoxluğundan sıxlıq yaranıb ki, bu hətta ərazidəki otel və restoran sahiblərinin narahat olmasına səbəb olub.
Qeyd edək ki, bu gün gecə saatlarından etibarən Masallıdakı "İsti Su" ərazisinə giriş-çıxış qadağan edilib. Yerli polis əməkdaşları ərazidə yerləşən kəndlərin sakinlərinin və Yardımlı əhalisindən başqa, heç kimi buraxmamaq təlimatı alıblar. Bununla əlaqədar giriş-çıxış postları quraşdırılıb.
Əldə etdiyimiz məlumata görə, həftə sonu da daxil olmaqla, Bakı və digər şəhər və rayonlardan gələnlər "İsti Su" ərazisinə buraxılmayacaq. Belə addımın atılması, həm də koronavirusa yoluxmanı önləmək üçün karantin rejiminin tətbiqi ilə bağlı ola bilər. Güman edilir ki, bu həftə sonu NK yanında Operativ Qərargah Masallı rayonunda da sərt karantin rejimi tətbiq edəcək.

Gundemxeber.Az