Metronun bağlı qalması yoluxmanı artıracaq:
Yanvarın 18-dən etibarən sərt karantin rejiminin yumşaldılması Bakı metrosunda sərnişindaşımanın bərpa olunacağı ilə bağlı ümidlər yaratdı.

Bununla bağlı sosial şəbəkələrdə, mediada ard-arda xəbərlərin yayılmasından, fevralın 15-də metronun fəaliyyətə başlayacağına dair müzakirələrdən sonra "Bakı Metropoliteni" QSC-nin mətbuat xidməti məsələyə aydınlıq gətirdi və yayılan məlumatlar təkzib olundu:

““Bakı Metropoliteni” QSC bir daha bildirir ki, bununla əlaqədar Azərbaycan Respublikasının Nazirlər Kabineti yanında Operativ Qərargah hələ heç bir qərar verməyib. Məlumat üçün onu da əlavə edirik ki, xüsusi karantin rejiminin tətbiq edildiyi pandemiya dövründə Bakı Metropolitenində sərnişindaşıma fəaliyyəti yalnız Azərbaycan Respublikasının Nazirlər Kabineti yanında Operativ Qərargahın qəbul etdiyi qərarlar əsasında tənzimlənir".

Lakin məktəblərdə yuxarı siniflərdə və bəzi universitetlərdə əyani təhsilin bərpası metroların açılmasını da zəruri edir. Pandemiyanın əvvəllərindən nəqliyyatdakı problemlər göz önündədir.

Dayanacaq və avtobuslardakı sıxlıq, avtobuslar arasındakı intervalın çox olması, tıxaclarda keçən saatlar yoluxma təhlükəsini də artırır. Halbuki avtobusların qət etdiyi uzun məsafələri metro daha tez gedir, sərnişin tıxacda zaman itirmir, sıxlıqda keçən uzun müddətdə yoluxma təhlükəsi ilə üz-üzə qalmır.

Belə olan halda metronu bağlı saxlamaq nə qədər məntiqlidir?

Cebhe.info-ya açıqlamasında nəqliyyat sahəsi üzrə ekspert Elməddin Muradlı bildirib ki, yuxarı sinif şagirdlərinin əyani dərsə başlamasından sonra dəhşətli mənzərənin şahidi olacağıq:

"Tıxaclar qaçılmaz olacaq, dayanacaqlarda insan selini müşahidə edəcəyik. Bəzi valideynlər bundan ehtiyat edib uşaqlarını məktəbə göndərməyəcəklər. Koronavirusa yoluxma azalıbsa, deməli, metronun fəaliyyətə başlaması da mümkündür. Müəyyən qaydalar tətbiq etməklə, metronun fəaliyyətini bərpa etmək olar. Bunu idarə etmək o qədər çətin deyil. Bu gün avtobusa nisbətən metroda səfər müddəti daha qısadır. Avtobusla 1 saata gedəcəyimiz yolu metro ilə yarım saata gedə biliriksə, metronu bağlı saxlamağın nə adı var? Metronun 1 qatarında 5 vaqon var, hər bir vaqon ən azı 3 avtobus sərnişinin yükünü çəkə bilir. Deməli, bu, 15 avtobusun sərnişinini aparır və mənzil başına da daha tez çatdırır".

E.Muradlı qeyd edib ki, hər bir dönəmdə metro daha əlverişlidir:

"Avrobusda dayanacaqların hərəsində bir əməkdaş dayanıb nəzarət edə bilmir, amma metronun bir girişi, bir çıxışı var, nəzarət etmək də daha rahatdır. Metro da hansısa məhlədə dayanmır ki, deyək, kimisə mindirəcək və ya düşürdəcək. Avtobusların sayı hətta metro işləyəndə belə yetərli deyildi. Bundan sonra bizə ən azı, 400-500 avtobus lazımdır ki, 2 milyon civarında sərnişini daha rahat daşıya bilsin. Bu gün yüklərin hamısı avtobusların üzərindədirsə, təbii ki, çatdırmayacaq. Metro bu işdə avtobusun köməyinə gəlir. Ona görə metro ilə bağlı yekun qərar verilməlidir".

Tibb sahəsi üzrə ekspert, həkim-terapevt Rasif Bağırovun sözlərinə görə, metronun bağlı olması yoluxma sayını daha da çoxaldır:

"Metronun bağlanması yoluxmanı artırır, yoluxmanın qarşısını almır. İnsanlar demir ki, metro bağlıdır, mən daha heç yerə getmirəm, onlar da digər seçim kimi avtobusdan istifadə edirlər. Kimsə metro ilə şəhərə bekarlıqdan getmir, işindən ötrü gedir və avtobusların hamısında sıxlıq olur. Bu da yoluxmanı artırır. Operativ Qərargahdakılar gedib heç olmasa, “Koroğlu” stansiyasına kəndlərdən gələn avtobuslara baxsınlar, camaat bir-birinin üstünə çıxır. Bu yoluxmanın çoxalması deməkdir. Bunun da qarşısını almaq üçün avtobusun sayını çoxltmaq, ya da metroda stansiyalar arasında intervalı azaltmaq lazımdır. Elektrik enerjisinə görə bu məsələdə də problem var. İkincisi, yoluxma ölkəmizdə o qədər aşağıdır ki, maskanı taxıb istənilən şagird dərsdə iştirak edə bilər”.

GundemXeber.Az