Çinli alimlər və Ümumdünya Səhiyyə Təşkilatının (ÜST) mütəxəssisləri Çində apardıqları birgə elmi fəaliyyətin yekununda yeni növ koronavirusun yarasalardan insanlara bilinməyən aralıq heyvan vasitəsilə keçə biləcəyi qənaətinə gəliblər. Bu, bu ana qədər ən etibarlı nəzəriyyədir.
“Report” xəbər verir ki, bu barədə “Associated Press” ekspertlərin hələ dərc olunmamış hesabatına istinadən məlumat verib.
Qeyd olunur ki, mütəxəssislər COVID-19-un laboratoriyadan sızma nəticəsində yaranması versiyasından imtina ediblər. Bununla yanaşı, onlar infeksiyanın mənşəyi ilə bağlı tədqiqatları davam etdirmək niyyətindədirlər.
Bu mətbuat orqanı alimlərin müvafiq hesabatının dərc olunmasının bir neçə dəfə təxirə salındığına diqqət yetirərək bunun Çini qorumaq və ölkəni pandemiyanın yaranmasında günahkar adlandırmamaq üçün edildiyi düşüncəsi yaratdığını vurğulayıb.
Agentlik sənədin demək olar yekun versiyasını bu gün Cenevrə şəhərindəki diplomatdan alıb, İsveçrə ÜST-yə üzv ölkədir.
Mütəxəssislər ümumilikdə COVID-19-un yaranmasında dörd əsas versiyasını sadalayıb. Bunlardan biri koronavirusun hələlik hansı olduğu bilinməyən aralıq heyvan vasitəsilə yarasalardan insanlara keçməsidir. Bu cür heyvanın kərtənkələ, pişik və ya gəlincik ola biləcəyi ehtimal olunur. Eyni zamanda, mütəxəssislər infeksiyanın birbaşa yarasalardan insana ötürülməsinin azehtimallı olduğunu hesab edirlər.
Mütəxəssislər həmçinin yarasaların koronavirusu dondurulmuş qidalara “yapışdıra” biləcəyini qeyd ediblər.
Daha əvvəl “Bloomberg” agentliyi ÜST mütəxəssislərinin Çində heyvan ticarətini yeni növ koronavirusun ortaya çıxmasının mümkün səbəbi adlandırdıqlarını bildirmişdi.

Gundemxeber.Az