Son vaxtlar koronavirus (COVID-19) pandemiyası, o cümlədən ictimai nəqliyyatın fəaliyyətinə tətbiq edilən bəzi məhdudiyyətlər nəticəsində Bakı şəhərində avtomobilləşmə səviyyəsi və şəxsi minik avtomobillərindən istifadənin artması müşahidə edilir.

Bu da onsuz da dolu olan Bakı küçələrində pik saatlarda tıxacların yaranmasına gətirib çıxarır. Eyni zamanda, əksər iş və xidmət sahələrində fəaliyyətin bərpa edilməsi və təhsilin bütün pillələri üzrə əyani tədrisə keçid gündəlik səyahət saylarını əhəmiyyətli dərəcədə artırıb. Bu barədə Bakı Nəqliyyat Agentliyinin (BNA) açıqlamasında bildirilir.

Məlumatda həmçinin deyilir ki, sıxlıq halları paytaxtda müşahidə edilən yağıntılı hava şəraitilə də əlaqədardır. Müxtəlif ərazilərdə yaranan lokal subasma halları süni sıxlıq və tıxac halları ilə nəticələnib. Sentyabrın 29-u səhər saatlarında Heydər Əliyev prospekti şəhər istiqamətində kənar yolun Bağırov körpüsündən keçən hissəsinə yaxın yerdə subasma halına görə hərəkət tam dayanıb. Nəticə etibarı ilə metronun “Koroğlu” stansiyasından şəhər istiqamətində 2-3 km məsafədə tıxac yaranıb.

Agentlik digər bir amil kimi qanunsuz parklanmaları göstərir ki, buna qarşı ciddi mübarizə tədbirləri aparır. Xüsusən də, avtobus dayanacaqlarının digər nəqliyyat vasitələri tərəfindən zəbt edilməsi sıxlıqların yaranmasına səbəb olur. Səbəblər sırasında qeyri-formal sərnişindaşımalar da qeyd olunur:

“Bu cür fəaliyyətlə məşğul olan sürücülər avtomobillərini əsasən avtobus dayanacaq məntəqələrində, ikinci hərəkət zolağında, kəsişmələrdə və digər qadağan olunan yerlərdə park edərək ümumi nəqliyyat axınına maneə yaradırlar. Bildirilir ki, qeyri-formal daşımalar həmçinin yollarda nəqliyyat axınını süni şəkildə artırır. Yəni bir istiqamətdə iritutumlu avtobusla gedəcək sərnişinlər səyahətlərini beş-altı minik avtomobilləri ilə edirlər ki, bu da yollarda əlavə ləngimələr yaradır”.

BNA onu da vurğulayıb ki, süni sıxlıq halları bir çox hallarda sərnişinlərin qeyri-formal daşımalardan istifadəsini təşviq etmək üçün məqsədli təşkil edilir.

Məlumdur ki, avtobuslarda pandemiya səbəbindən sıxlıqdır. Ona görə də sərnişinlər məcburdurlar ki, özlərini uzun müddət tıxacda qalan avtobuslardakı sıxlıqda virusdan qorumaq üçün “manatlıq” taksi ilə gedib-gəlsinlər. Belə olan halda saatlarla dayanacaqda avtobus gözləmək, daha sonra sıxlıq səbəbindən o avtobusa da minə bilməyən sərnişinlərin əlacı ancaq “manatlıq” taksilərə qalır. Üstəlik, aylardır şənbə-bazar ictimai nəqliyyatın olmaması taksi bazarında qiymətləri 2-3 qat artırıb ki, bu halda da gündəlik qazanc dalınca gedən orta statistik azərbaycanlının “manatlıq” taksi xidmətindən istifadədən başqa çıxış yolu qalmır.

Nəqliyyat üzrə ekspert Ərşad Hüseynov Cebhe.info-ya bildirib ki, məsələyə adi yanaşmaq lazım deyil:

“Qeyri-formal və deyildiyi kimi, qeyri-qanuni daşımalar nəyə görə var? Çünki camaatın buna ehtiyacı var. İnsanlar yolu nə iləsə qət etməlidirlər. Metro və avtobusla, şəhərətrafı qatar ilə gedə bilmirlər. Ona görə də məcbur olurlar ki, ünvana qurumların qeyri-formal adlandırdığı taksilərlə gedib-gəlsinlər. Təcrübə göstərir ki, bu taksilər daha operativdir. Məsələn, şəhərin mərkəzindən Sumqayıta və digər istiqamətlərə gedən avtobuslarda basabas olur. Sərnişin şəhər ətrafından şəhərin mərkəzinə 1 saata gəlirsə, həmin qeyri-formal deyilən taksilərlə yarım saata ünvan başına gəlib çatırlar. Problem budur ki, qeyri-qanuni deyilənlər bu taksilər əslində ictimai nəqliyyatın işini görür. Bildirim ki, bu taksilərin işləməsi qaçılmazdır, sosial sifarişdir. Görünür ki, insanların bu nəqliyyat vasitəsinə ehtiyacı var”.

Ekspert bildirib ki, bircə günlük ucuz taksiləri işləməyə qoymasalar, yəni onların işinə məhdudiyyət qoyulsa, bu zaman 10 minlərlə adam küçələrdə qalar:

“Problemi həll etmək üçün ictimai nəqliyyatın işini təkmilləşdirmək lazımdır. Məsələn, avtobusların sayını artırmaq, nəqliyyat vasitələrini şəbəkələşdirmək lazımdır. Müəyyən xətlər var ki, burada ekspress marşrutlar yaratmaq lazımdır. Nizam-intizam, dəqiq qrafik yaradılmalıdır. Problemin səbəbi ictimai nəqliyyatdadır, həll olunmalıdır ”.

Ərşad Hüseynov sonda əlavə edib ki, BNA nın yerinə danışmaq istəməzdi, amma 1 manatlıq taksiləri istəsələr də yığışdıra bilməzlər: “Çünki buna ehtiyac var”.

GUNDEMXEBER.AZ