“Pilot ən yüksək səviyyədə, ağır şəraitlərdə uçuşlara təlimatlı olan pilotlarımızdan biridir. Polkovnik Füzuli Cavadov hələ Birinci Qarabağ müharibəsində də iştirak edib”.

Gündəmxəbər.az-ın məlumatına görə, bunu Dövlət Sərhəd Xidmətinin (DSX) rəisi, general-polkovnik Elçin Quliyev bu gün baş vermiş helikopter qəzası ilə bağlı deyib.

DSX rəisi bildirib ki, helikopter tamamilə yeni olub: “Qara qutu” tapılıb. “Qara qutu” Baş Prokurorluqdadır. Hazırda hadisənin səbəbi barədə dəqiq bir şey demək mümkün deyil. Dəqiq onu deyə bilərik ki, hər hansı kənar təsirdən söhbət gedə bilməz”.

Elçin Quliyev qeyd edib ki, hadisə baş verdiyi barədə xəbər alan kimi hadisə yerinə gedib.

E. Quliyev bildirib ki, helikopter təlim məqsədi ilə Səngəçal aerodromundan qalxaraq "Qaraheybət" təlim mərkəzinə eniş edərkən qəzaya uğrayıb.

DSX rəisi əlavə edib ki, təlim zamanı həlak olan hərbçilərə qanunvericiliyə uyğun olaraq, şəhid statusu verilir: "Qanunvericilik hərbi təlimlərdə həlak olan hərbi qulluqçulara avtomatik olaraq şəhid statusunun verməsini nəzərdə tutur".

Yaralılara gəldikdə, E. Quliyev deyib ki, onların hər ikisi Dövlət Sərhəd Xidmətinin hospitalındadır, telefon əlaqəsi yaradıb, səhhətləri normaldır: “Onların sağlamlığının bərpası üçün həkimlərimiz zəruri tədbirlər görür”.

GÜNDƏMXƏBƏR.AZ