"Aclığın 13-cu günündə Tale Bağırzadənin durumunda ciddi problem yaranmayıb. Səsi zəif idi, qızdırması düşmür. Həkimlər onun təzyiqini yoxlayır, qızdırmasını aşağı salmağa çalışır".

GundemXeber.Az bildirir ki, bu barədə onunla dünən, iyunun 16-da telefon danışığından sonra həyat yoldaşı Leyla İsmayılzadə Amerikanın Səsinə deyib.

İsmayılzadənin sözlərinə görə, Müsəlman Birliyi Hərəkatının sədri Tale Bağırzadə Allahın təhqir olunmasına etiraz olaraq Qobustan Qapalı Həbsxanasında başlatdığı aclıq aksiyasını günahkarlar cəzalandırılana qədər davam etdirmək əzmindədir.

"O dedi ki, onun aclığı dayandırmasını istəyənlər Allahı təhqir edənlərə qarşı etirazını bildirməlidir. Müsəlman, qeyri-müsəlman olmasından asılı olmayaraq hər kəs etiraz etməlidir," , İsmayılzadə Tale Bağırzadəyə istinadən qeyd edib.

Onun sözlərinə görə, rəsmi qurumlar hələ Bağırzadənin tələbləri ilə bağlı münasibət bildirməyib.

Müsəlman Birliyi Hərəkatının məlumatına görə, Tale Bağırzadənin tələblərinin müdafiəsi məqsədi ilə hazırda 11 nəfər aclıq aksiyası keçirir. Belə ki, hazırda həbsxanada olanlardan Tale Bağırzadə 13 gün, Abbas Hüseyn 11 gün, Cabbar Cabarov 10 gün, Seyfəddin Şirvanov 8 gün, Cahad Babakişizadə 8 gün, Vəli Allahverdiyev, Elşad İbrahimov, Elşən Abbasovun hər biri 6 gün, Razi Hümbətov 4 gün, Əfqan Abbasov 3 gündür aclıq edir. Eyni zamanda, azadlıqda olan Vüqar Əliyev və Eldar Abdullayev də 2 gündür aclıq aksiyasına qoşulub.

Bununla yanaşı, Penitensiar Xidmətin İctimaiyyətlə Əlaqələr Şöbəsindən həbs yerlərində insanların aclıq aksiyası keçirməsi barədə xəbər barədə məlumat almaq mümkün olmayıb.

19 il həbsə məhkum edilən Tale Bağırzadə iyunun 3-də aclığa başlayıb. O, inanclı insanların məhkəməsini izləməyə gəlmiş şəxslərin tutularaq işgəncəyə məruz qalmasına etiraz edir və həmin şəxslərə işgəncə zamanı Allahı təhqir edən hüquq-mühafizə orqanlarının əməkdaşlarının üzr istəməsini tələb edir.

Mayın 20-də Bakı Ağır Cinayətlər Məhkəməsinin qərarı ilə Müsəlman Birliyi Hərəkatının üzvü Razi Hümbətov 6 il azadlıqdan məhrum edilib. Bu zaman məhkəməni izləməyə gələn beş nəfər inanclı insan salxanılıb. Saxlanılan şəxslər Müsəlman Birliyi Hərəkatının üzvləri İmran Məmmədli, Elgiz Məmmədov və Ağəli Yəhyayev polisə müqavimət ittihamı ilə təqsirləndirilərək bir aylıq inzibati həbsə məhkum edilib.

Müsəlman Birliyi Hərəkatının sərbəst buraxılan digər iki üzvündən biri Mail Kərimov deyib ki, onu məhkəmənin qarşısında saxlayıb, əvvəlcə 22-ci polis bölməsinə (Bakının Nəsimi rayon Polis İdarəsinin bölməsi-red), sonra isə Baş Mütəşəkkil Cinayətkarlıqla Mübarizə İdarəsinə aparıblar. Kərimov həm yolda, həm də idarədə işgəncələrə məruz qaldığını bildirib.

"Dedilər ki, əgər məhkəmələrdə yenə iştirak etsən zorlanacaqsan. Təcavüzə uğramamaq üçün kameranın önündə məhkəməyə getməyəcəyimə dair söz verdim" - deyə, o, mayın 23-də mətbuat konfransında bildirib.

Müsəlman Birliyi Hərəkatının digər üzvü Süleyman Ələkbərov da saxlanıldıqdan sonra 22-ci polis bölməsinə aparıldığnıı və daha sonra işgəncəyə məruz qaldığını bildirib.

"Məni bölmədən başıma qara torba keçirib çıxardılar, əllərimi arxadan bağlamışdılar. İdarədə mənə məhkəmədə iştirak etməməyimi dedilər. Məni yerə yıxıb, başımı təpikləməyə başladılar. Belimin üstünə çıxıb, hoppanıb düşürdülər. Daha sonra əllərini torbanın içinə salıb saqqalımı yolurdular. Ən pis söyüşlərlə söyürdülər, Allahı da söyürdülər," o, mətbuat konfransında bildirib.

Daxili İşlər Nazirliyi Müsəlman Birliyi Hərəkatının üzvlərinin işgəncəyə məruz qalması ilə bağlı iddialarını əsassız və yalan olduğunu bildirib.

"Bir qrup şəxs həmin gün zərurət olmadan məhkəmənin önündə toplaşaraq səs-küy salıb, nəqliyyatın və piyadaların hərəkətinə ciddi maneələr yaradıb. Polis əməkdaşları yaxınlaşıb onlardan dağılışmağı və ərazini tərk etməyi tələb edib. Mail Kərimovla Süleyman Ələkbərov polisin qanuni tələblərinə riayət etməyərək asayişin pozulmasına yönələn hərəkətlərini davam etdiriblər" , Daxili İşlər Nazirliyinin Mətbuat Xidmətinin rəisi Ehsan Zahidov qeyd edib.

Bakı Ağır Cinayətlər Məhkəməsinin 25 yanvar 2017-ci il tarixli hökmü ilə Tale Bağırzadə 19 il həbsə məhkum edilib. Məhkəmə hökmünə görə, o, həbsinin ilk 7 ilini Qobustan Qapalı Həbsxanasında çəkməlidir.

Tale Bağırzadə və bir sıra digər inanclı insanlar 2015-ci il noyabrın 26-da Nardaran qəsəbəsində keçirilən xüsusi əməliyyatdan sonra həbs olunublar.

Həbs olunanlar Bağırzadənin təşkil etdiyi cinayətkar qrupda iştirakda ittiham olunublar. Onlar Cinayət Məcəlləsinin terrorizm, qanunsuz silah saxlamaq, konstitusiya quruluşunun zorla dəyişdirilməsinə cəhd, polisə müqavimət və başqa maddələri ilə günahkar bilinərək 12 ildən 19 ilədək həbsə məhkum edilib.

GundemXeber.Az