Gəncə Şəhər İcra Hakimiyyətinin başçısı Niyazi Bayramov Gəncə sakinləri ilə mütəmadi görüşlər keçirir. 

Bu dəfə Gəncə Dövlət Universitetinin 5-ci korpusunda vətəndaşlarla  görüşüb.

Açıq hava şəraitində keçirilən görüşdə YAP Gəncə şəhər təşkilatının sədri Ramil Orucov,  Nizami  və Kəpəz İcra Hakimiyyətlərinin başçıları Nizami Hacıyev və Eldəniz Xudiyev, İcra Hakimiyyətinin məsul əməkdaşları, idarə, müəssisə və təşkilat rəhbərləri iştirak ediblər. 

Səyyar görüşdə iştirak edən şəhər sakinləri onları narahat edən məsələləri gündəmə gətiriblər. Səsləndirilən müraciətlərdə işlə təminat, müalicə, fərdi yaşayış evin təmiri, maddi köməklik və digər məsələlər üstünlük təşkil edib. 

Niyazi Bayramov vətəndaşları fərdi qaydada dinləyərək onların səsləndirdikləri problemlərin qısa zamanda aradan qaldırılması istiqamətində müvafiq tapşırıqlar verib. Qaldırılan bir çox məsələlər  yerindəcə öz həllini tapıb, digər məsələlər  isə qeydiyyata alınaraq, aidiyyəti qurumlara həvalə edilib.

Vətəndaşlar səyyar qəbuldan razı qaldıqlarını bildirib, problemlərinin həlli istiqamətində göstərilən diqqət və qayğıya görə Azərbaycan Respublikasının Prezidenti İlham Əliyevə, Birinci-vitse prezident Mehriban xanım Əliyevaya minnətdarlıqlarını bildirməklə yanaşı icra başçısından da razılıqlarını ifadə ediblər.

GundemXeber.Az