Ermənilər Xankəndi ilə Ermənistan arasında nəqliyyat əlaqəsini təmin edəcək yeni alternativ yolla bağlı təxribata əl atıb.

Gundemxeber.az xəbər verir ki, sosial şəbəkələrdə yeni dəhlizin təhlükəsizliyinə Rusiya sülhməramlıları ilə yanaşı, cinayətkar rejimin də nəzarət etdiyi barədə xəbərlər yayılıb.

Məlumatda yol boyu yerləşdirilmiş Rusiya sülhməramlıları ilə yanaşı, qondarma rejimin “yol polisi”nin və “Fövqəladə hallar xidməti”nin xilasedicilərinin də ermənilərin təhlükəsiz çıxışına və girişinə nəzarət edərək xidmət göstərdiyi qeyd edilir.

Halbuki, 2020-ci il noyabrın 10-da Azərbaycan, Ermənistan və Rusiya arasında imzalanmış Bəyanatın 6-cı bəndinə görə, yeni çəkilən dəhlizin təhlükəsizliyini Rusiya sülhməramlıları təmin etməlidir. Ona görə də ermənilərin cinayətkar qurumun adından yayılan bu təxribatçı məlumat 10 noyabr Bəyanatının pozulması deməkdir.

Belə olan təqdirdə, Rusiya sülhməramlı kontingenti özünü “yol polisi”, yaxud “xilasedici” adlandıran istənilən erməninin dəhlizə daxil olmasının qarşısını almalıdır. Üçtərəfli razılaşmaya uyun olaraq, ermənilər Laçın şəhərində daxil olmadan çəkilmiş alternativ hərəkət marşrutundan yalnız Ermənistana gediş-gəliş məqsədilə istifadə edə bilər. Təhlükəsizliyin qorunması isə birbaşa sülhməramlı qüvvələrin missiyasına daxildir. Separatçı dəstələrin sülhməramlı kontingentin səlahiyyətinə və nəzarət zonasına müdaxilə etməsi bölgədə təhlükəsizliyin ermənilərin özləri tərəfindən pozulması deməkdir.

Yəni ermənilər həmin yoldan silah və yaraqlıların Qarabağa daşınmasına şərait yaratmaq istəyir. Bu da öz növbəsində, Azərbaycanın sərhəddə nəzarət məsələsini gündəmə gətirir. Dövlət sərhəddinin mühafizəsi və yoxlanılması sülhməramlıların funksiyasına aid olmadığından bu məsələ ilə yalnız Azərbaycanın rəsmi orqanları məşğul ola bilər. Əks təqdirdə, Azərbaycanın ərazi bütövlüyünə və suverenliyinə təhdidlər davam edəcək.

Sülhməramlıların qondarma rejimin təmsilçilərini “yol polisi” və “xilasedici” adı altında dəhlizə buraxması isə rusiyalı hərbçilərin təxribatın qarşısını almaqda maraqlı olmadığını göstərir. Yəni ermənilərin yeni dəhlizə qanunsuz müdaxiləsi Rusiyaya bölgədə siyasi spekulyasiya imkanı yaradır.

Sabiq xarici işlər naziri Tofiq Zülfüqarov hesab edir ki, 10 noyabr Bəyanatında sülhməramlıların 5 il müddətinə yerləşdirilməsinə dair razılaşma başa çatanadək Azərbaycan yeni dəhlizdə sərhəd-buraxılış və gömrük-keçid məntəqələri quraşdırmalıdır.

Diplomat Cebhe.info-ya açıqlamasında təklif edib ki, Azərbaycanın sərhəd xidməti və ya hərbi polisi dəhlizdə Rusiya sülhməramlıları ilə birlikdə müvəqqəti olaraq birgə nəzarət postları yaratmalıdır. 

Gundemxeber.az