Redaksiyamıza e-mail: [email protected] ünvanından Qazax rayonu, 1-ci Şıxlı kənd sakini Allahverənov Məhəmməd Nəsrəddin oğlu tərəfindən şikayət məktubu daxil olub. Vətəndaş Məhəmməd Allahverənov gundemxeber.az-a yazmış olduğu müraciətində bildirir ki, “mənim şikayətim Rabitə Nazirliyi və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindəndir.

 Xatırladım Ki, mən bir müddət bundan əvvəl Qazax rayon 1-ci Şıxlı kəndində Smart Online internet provayderinin Orxan adlı əməkdaşının yüzlərlə kənd sakininin etibarından sui-istifadə etməsi, heç bir müştəri ilə müqavilə bağlamaması, hər müştəridən 35 manat pul alması, hər bir istifadəçini aylardır 10 manatlıq tarifə qoşub müştərilərin guya 12 manatlıq tarifdə olduqlarını bildirib hər müştəridən ayda 2 manat əlavə pul alması və müştəriləri ödəniş terminalları vasitəsi ilə ödənişi etməli olduqlarını bildirməyib ödənişləri kənd sakinlərindən əldən aldığını, bu məsələdən xəbər tutduqdan sonra, Smart Online provayderinin Orxan adlı əməkdaşı işdən qovduqlarını əsas gətirərək yüzlərlə kənd sakinin hər birindən oğurlanan 45 manat pulu aylardır qaytarmaqdan imtina etməsini sizin sayt vasitəsi ilə ictimailəşdirmiş və həmçinin məsələ ilə bağlı Rəqəmsal İnkişaf və Nəqliyyat Nazirliyinə və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə şikayət etmişdim. Düzdür, illərdir bu qurumları tanıyan və daha öncə də haqlı olaraq, hər iki quruma başqa məsələlərdən şikayət edən bir vətəndaş kimi deyə bilərəm ki, hər iki Nazirliyin varlığı ilə yoxluğu arasında bir fərq yoxdur. Çünki, bu nazirliklər normal fəaliyyət göstərsələr nə İKT sektoru bərbad vəziyyətdə olmaz, nə də hər sahədə addımbaşı İstehlakçı hüquqlarının pozulması ənənə halını almaz və ölkədə hər sahədə inhisarçılıq və monopoliya olmazdı. Çünki, indiyədək hər iki nazirliyə müxtəlif sahələr üzrə hansı şirkətdən haqlı olaraq şikayət etdimsə 1 ay sonra nazirlik olaraq etdikləri sadəcə mənim şikayətimi həmin şirkətə çatdırmaq və həmin şirkətin verdiyi şablon cavabı, mənə cavab olaraq göndərmələri olub. 

Nəticə etibarı ilə nazirliklər olaraq heç vaxt tədbir görməyib şikayətim elə şikayət olaraq qalıb. Ancaq sözün düzü Smart Online ilə bağlı məsələ yüzlərlə istifadəçinin aldadılması, istehlakçı hüquqlarının nəyinki pozulması, hətta provayder tərəfindən istehlakçı hüquqları taptalanması mövcuddur. Oğurluq olduğu üçün düşünürdüm ki, heç olmasa, bu məsələdə hər iki nazirlik nəhayət fəaliyyət göstərib hərəkətə keçər. Smart Online provayderi ilə bağlı ən azı tədbir görülər və hər bir müştəridən oğurlanan 45 manat pulun geri qaytarılması təmin edilər. Çünki, normal ölkələrdə belə əmələ yol vermiş şirkətlər külli miqdarda cərimələnir. Ancaq bu məsələdə də hər iki nazirlik məni təccübləndirmədi. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti 1 ay sonra cavab göndərdi ki, “bizim bu məsələdə edəcəyimiz bir şey yoxdur. Bununla bağlı məhkəməyə müraciət edə bilərsiniz”. Anlamıram ki, o zaman İstehlakçı Hüquqlarını müdafiə etməli olan bu qurum niyə var və nə işlə məşğul olur. Görünən odur ki, bu cür dələduzluğu normal qarşılayır. Rəqəmsal İnkişaf və Nəqliyyat Nazirliyidə həmişə olduğu kimi mənim də şikayətimi Smart Online provayderinə onların verdiyi şablon cavabı mənə 1 ay sonra, göndəriblər. Onlar da İqtisadiyyat Nazirliyi kimi bildiriblər ki, “məhkəməyə müraciət edin. Biz nazirlik olaraq, heç nə edə bilmərik”. Ancaq bu məsələnin sonuna qədər gedəcəm və sizə təşəkkür edirəm ki, indiyədək bu və bütün şikayətlərimi ictimailəşdirirsiniz. Var olun! Bir də nə vaxta qədər ki, ölkədə bu 2 nazirliyin varlığı ilə yoxluğu arasında bir fərq olmayacaq, o halda İKT sektoru bərbad vəziyyətdə olacaq. Şünki, bunun səbəbi inhisarçılıq və monopoliyadır. Nəyin ki, İKT sahəsi bütün sahələrdə inhisarçılıq və monopoliya aradan qaldırılmayıb, o vaxta qədər də bu problemlər davam edəcək.”

GundemXeber.Az