İranın hərbi təlimlər keçirməsi və bu sahədə aktivlik göstərməsi onun hərbi qüdrətinin olmasını nümayiş etdirmək məqsədi daşıyır. İran bununla ilk öncə Azərbaycana, Türkiyəyə və region dövlətlərinə, habelə İsrail və ABŞ-a güclü olduğu barədə bir ismarıc göndərir və bununla göstərməyə çalışır ki, o, öz sərhədlərini qorumağa qadirdir”. 

Bu sözləri Orta Şərq Araşdırmalar Mərkəzinin rəhbəri, politoloq Sədrəddin Soltan İranın son zamanlar hərbi aktivliyini artırması ilə bağlı Ednews-a açıqlaması zamanı deyib. O, əlavə edib ki, İranın bu cür aktivliyi sadəcə nümayiş xarakterlidir və qarşıda heç bir ciddi hərbi münaqişədən söz gedə bilməz. 

Politoloqun sözlərinə görə, əslində İran bununla region dövlətlərinə hədə-qorxu gəlməyə çalışır. 

“Adətən bu cür hərbi təlimlər keçirən ölkələr bunun 3-cü dövlətə aid olmadığı barədə məlumat verir və bunun ölkənin hərbi potensialını artırmaq məqsədi daşıdığını deyir,” – deyə S.Soltan bildirib. 

Bundan əlavə, ekspert İranın hərbi münaqişəyə qatılmaqda maraqlı olduğunu da vurğulayıb. O, qeyd edib ki, bu günki vəziyyətdə hərbi münaqişəyə qarışmaq İrandakı hakimiyyət üçün bir xilasdır. 

“İranın müharibəyə qoşulması hakimiyyət üçün daxildə cəmiyyətin diqqətini yayındırmaq və etirazları yatırmaq üçün vacib amildir. Lakin bir məsələni də nəzərdən qaçırmamalıyıq ki, İran hakimiyyəti artıq 1980-ci illərdəki kimi xalqın dəstəyini almır. Çünki hazırda hakimiyyətə qarşı böyük inamsızlıq mövcuddur”. 

İranın Cənubi Qafqazda münaqişələrə qoşulması məsələsinə gəlincə, politoloq qeyd edib ki, İran bu addımı atmaq niyyətində deyil: “İran yalnız regionda iğtişaşlar törətmək, Ukrayna ilə müharibədə Rusiyaya göstərdiyi dəstək kimi eynən Ermənistanı silahla təmin etmək və sair bu kimi proseslərdə iştirakı gözləniləndir. Bu isə onun beynəlxaq təşkilatlar və aparıcı dövlətlər tərəfindən ciddi sanksiyalara məruz qalması ilə nəticələnəcək”.  

Sədrəddin Soltanın sözlərinə görə İran Rusiya ilə canlı qüvvə baxımından müharibədə iştirak etməsi onun işğal prosesində iştirakı kimi qəbul edildiyi üçün İran ərazisində İrana qarşı hərbi əməliyyatların keçirilməsinə gətirib çıxara bilər. 

“Bilirsiniz ki, İran İslam İnqilabı Keşikçiləri Qvardiyası (SEPAH) ABŞ tərəfindən terrorçu təşkilatlar siyahısına daxil olunub. Terrorçuluğa qarşı mübarizə planı ilə İranda anti-terror əməliyyatlar keçirilmə ehtimalı da bu zaman gündəliyə gələ bilər”. 

Gundemxeber.az