2023-cü ilin fevralın ayının 6-da qardaş Türkiyənin Kahramanmaraş və digər 10 müxtəlif bölgəsində baş vermiş zəlzələ zamanı çoxsaylı insan tələfatı və dağıntılar Azərbaycan xalqını da sarsıtdı. Azərbaycan Respublikasının Prezidenti  İlham Əliyev Türkiyənin Prezidenti Rəcəb Tayyib Ərdoğana başsağlığı məktubu ünvanlamış və Rəcəb Tayyib Ərdoğana telefon zəngi etmişdir. Azərbaycan Prezidenti qeyd edib ki, bu  böyük fəlakətdir və ölkəmiz Türkiyənin bu dərdinə şərik çıxır. Həmçinin, ölkə başçısı Türkiyənin ölkəmizdəki səfirliyinə gələrək yas dəftərinə kədərini ifadə etmişdir. Prezident onu da qeyd edib ki, Azərbaycan hər zaman olduğu kimi, zəlzələdən sonra ilk dəqiqələrdən, ilk saatlardan qardaş Türkiyənin yanında idi. Azərbaycan öz dəstəyini, öz həmrəyliyini həmişə olduğu kimi nümayiş etdirir və Azərbaycan sona qədər öz dəstəyini göstərəcəkdir. Azərbaycandan davamlı olaraq həkimlər, xilasedicilər, könüllülər göndərilir və göndəriləcəkdir.

 Azərbaycan xalqı könüllü olaraq qardaşlara, öz doğma qardaş və bacılarına dəstək olmaq üçün kimin əlində nə var onu gətirir. Biz bütün dünyaya bir daha nümayiş etdiririk ki, təkcə dövlətlərarası səviyyədə deyil, dövlət başçıları səviyyəsində deyil, insanlar səviyyəsində də əsl qardaşlıq əlaqələri mövcuddur. İctimai təşkilatlar da öz dəstəyini göstərirlər. Özəl sektor da öz dəstəyini əsirgəmir. Bütün dövlət bu gün qardaş türk xalqının yanındadır. Bu ağır sınaq, eyni zamanda, Türkiyənin gücünü bir daha bütün dünyaya göstərəcək. Türkiyə bu acı sınaqdan şərəflə çıxacaq. 

Azərbaycan Respublikasının Birinci vitse-prezidenti Mehriban xanım Əliyeva da Türkiyədə baş vermiş zəlzələ xəbərini  dərin kədər hissi ilə qarşıladığını bildirmiş, faciə zamanı həlak olanlara Allahdan rəhmət diləmiş, onların doğmalarına və yaxınlarına dərin hüznlə başsağlığı vermişdir. 

Qardaşlarımızın acı taleyinə biganə qalmayan Goranboylular da Azərbaycan dövlətinin və xalqının qardaş Türkiyəyə  dəstək kompaniyasına qoşularaq, öz əllərindən gələnləri əsirgəmədilər. Rayonun bütün yaşayış məntəqələrində dəstək kompaniyaları həyata keçirilir. Rayon İcra Hakimiyyəti başda olmaqla, bütün dövlət qurumları, xidmət sahələri,  özəl sektorlar və  bütün goranboylular   maddi, ərzaq, dərman, geyim ləvazimatları və digər yardımlarla öz qardaşlarına dəstək olmağa çalışırlar. Bunlarla yanaşı, hazırda rayonda hər cür məişət şəraiti ilə təmin olunmuş  və hər birində 12 nəfərin yaşaya biləcəyi, ümumilikdə 60 nəfər üçün nəzərdə tutulmuş müasir modul tipli 5 ədəd fərdi yaşayış evləri hazırlanır. Bununla bağlı, rayon İcra Hakimiyyəti ilə  “Container Baku” şirkəti arasında  müvafiq  müqavilə bağlanmışdır. Həmin evlər fevralın 14-də Kahramanmaraşa göndəriləcəkdir.

Goranboy RİH-nin başçısı Məhərrəm Quliyev hazırlanan modul tipli evlərlə yerində tanış olduğu zaman qeyd edib:

"Canımız, Türkiyəmiz – Goranboylular da sizinlə birlikdədir".

Gundemxeber.az