Son vaxtlar müəllimlər Elm və Təhsil Nazirliyi (ETN) tərəfindən təşkil edilən ixtisasartırma təlimlərindən narazıdırlar.

Onlar bildiriblər ki, sözügedən təlim metodunun keyfiyyətindən söz gedə bilməz:
“Həftənin beş günü işdəyik, altıncı və bazar günləri də təlimə yazıblar. Saat 14:00-da keçirilən təlimdə iştirak edəcək müəllimləri məcbur səhər məktəbə çağırırlar və imzanı saat 13:00-da çəkdirirlər. Kənddə işləyən müəllimlər də hər dəfə şəhərə təlimə getmək üçün öz ciblərindən 25-30 manat xərcləyirlər.
Bundan əlavə, saat 1-dən 6-dək təlimdə otururlar. Burada hansı effektivlikdən söz gedə bilər? Heç olmasa, təlimin müddəti 1-2 saat olsun. Bu müəllimlərin ailəsi, uşağı yoxdur? Kimlərsə pul qazanacaq deyə müəllimlər istismar olumalıdır?”
Gundemxeber.az xəbər verir ki, məsələ ilə bağlı Cebhe.info-ya açıqlamasında təhsil üzrə ekspert Elşən Qafarov bildirib ki, hər bir peşə təhsili, orta ixtisas, ali təhsili bitirmiş şəxslərin əlavə təhsilə ehtiyacı var:
“Təşkil edilən ixtisasartırma təlimləri mövcud ehtiyacı ödəmək məqsədi daşımalıdır.10-15 il əvvəl müəllimlər tədris prosesindən ayrılmaqla ixtisasartırma kurslarına cəlb olunurdı. Təəssüf ki, son 6-7 il ərzində bu təlimlər onlayn rejimdə keçirilməyə başlandı, bununla da effektivlik aradan qalxdı. Hazırda təlimlər keçirilən zaman müəllimlərin əmək hüququ kobud şəkildə pozulur.
Qeyri-iş saatlarında, yaxud iş saatlarında müəllimlər ixtisasartırma kurslarına göndərir. Təlimlərdə keyfiyyət olmadığına görə müəllimlər həm vaxtlarını, həm də pullarını itirir. Bu təlimlər dövlət büdcəsi hesabına təşkil olunur. Nəticədə isə burada qazanan təlimlərdən xeyir güdən şəxslər olur”.
Ekspert hər il dövlət büdcəsindən milyonlarla vəsaitin mənimsənildiyini qeyd edib:
“Bu təlimlər üçün nə qədər vəsait xərclənir, amma keyfiyyət olmur. Bu hal qəbuledilməzdir. Biz təhsili bərpa etməliyik. Hər regional təhsil idarəsində ixtisasartırma kursları yaradılmalıdır. Qiymətləndirməni isə Təhsil İşçilərinin Peşəkar İnkişafı İnstitutu aparmalıdır. Onlayn təlimlər minimuma endirilməlidir. Həmçinin təlimlər zamanı müəllimlər bir ay tədris prosesindən ayrılmalıdır”. 

Gundemxeber.az