Yeni doğulmuş körpələrdə sarılıq adətən ilk həftələrdə müşahidə olunan və çox vaxt keçici xarakter daşıyan bir vəziyyətdir. Bilirubin səviyyəsinin artması nəticəsində dəri və gözlərdə sarı bir görünüş meydana gəlir.

Mütəxəssislərin fikrinə görə, sarılıq yeni doğulmuş körpələrdə tez-tez rast gəlinən və əsasən təhlükəli olmayan bir vəziyyətdir. Adətən körpələr 2-4 günlük olanda müşahidə edilir və iki həftə ərzində yox olur.

Yeni doğulmuş körpələrdə sarılığın səbəbi qanda olan bilirubin molekuludur. Bilirubin qırmızı qan hüceyrələrinin parçalanması zamanı hemoglobin molekulunun məruz qaldığı biokimyəvi dəyişikliklər nəticəsində ayrılan maddədir.

Zərərli təsiri olan bilirubin qaraciyər tərəfindən başqa maddələrə çevrilərək orqanizmdən xaric edilir. Yeni doğulmuş körpələrdə yüksək hemoglobin səviyyəsi və qırmızı qan hüceyrələrinin parçalanma sürəti yüksəkdir, buna görə də onların qanında bilirubinin səviyyəsi də yüksəkdir.

Körpələr doğulmazdan əvvəl onların qanında olan bilirubin ananın orqanizmi tərəfindən xaric edilir. Doğulduqdan sonra körpənin qaraciyəri bu işi görür. Bununla belə, yeni doğulmuş körpələrin qaraciyərləri qanda olan bütün bilirubin molekullarını aradan qaldırmaq üçün kifayət qədər inkişaf edə bilmir. Bu vəziyyət yeni doğulmuş körpələrin təxminən 60 faizində baş verir.

Fizioloji sarılıq adlandırılan bu haldan başqa, körpələrdə sarılığa səbəb olan başqa səbəblər də ola bilər. Məsələn, hepatitə səbəb olan bəzi virus infeksiyaları, ana ilə körpə arasında qan qrupu uyğunsuzluğu və s buna misal ola bilər.

Əgər qanda bilirubinin səviyyəsi çox yüksəkdirsə və ya birdən-birə yüksəlirsə, yeni doğulmuş körpələrdə sarılığın müalicəsi lazımdır. Çünki bu zaman bilirubin qan-beyin baryerini keçərək beyin və sinir sisteminə qalıcı ziyan vura bilər./Yenisabah.az