"Bizə qarşı həbsxanada ayrı-seçkilik var".

Bunu "Abzas Media"nın həbsdə olan baş redaktoru Sevinc Vaqifqızı ailəsi ilə telefon danışığı zamanı deyib və bildirib ki, nəzarətçi onun qolundan şiddətlə sıxaraq divara itələyib. Bu barədə "Abzas Media" məlumat yayıb.

Məlumatda qeyd olunur ki, Sevinc Vaqifqızı Bakı İstintaq Təcridxanasında yenidən zorakılığa məruz qalıb.

Jurnalistin sözlərinə görə, ailəsinə zəng etmək üçün gedərkən həmkarı Elnarə Qasımovanın saxlanıldığı kameranın nəfəsliyinə yaxınlaşıb salam vermək istəyib. Bu zaman Aygül Babayeva adlı nəzarətçi onun qolunu şiddətlə sıxaraq divara doğru itələyib.

"Elnarə də etiraz etdi ki, bizimlə belə davrana bilməzsiniz. Hamı nəfəslikdən danışır. Bircə bizə olmaz? Nəzarətçi dedi ki, yox, sizə olmaz. Bizə qarşı ayrı-seçkilik edilir. Hamı nəfəsliklə bir-birilə danışır. Elə yanımızda bir məhbus qadın digər kameranın nəfəsliyinə yaxınlaşıb oradakı qızla söhbət edirdi. Onun yanından düz keçir və yaxınlaşıb demir ki, nəfəslikdən danışmaq olmaz. Amma mənə qarşı bu, zorakılıqla edilir. Qolumu sıxır, üstümə qışqırır və bu şəkildə aparılıram", deyə, Sevinc Vaqifqızı bildirib.

"Abzas Media" nın əməkdaşları bir ildən çoxdur 1 saylı Bakı İstintaq Təcridxanasında saxlanılırlar. Jurnalistlər bir neçə dəfə həbsxanada onlara qarşı zorakılıq faktlarının olduğu haqda məlumat yayıblar.

Hazırda 1 ildən çoxdur həbs olunan jurnalistlərin Bakı Ağır Cinayətlər Məhkəməsində məhkəmə prosesi davam edir.

“Abzas Media” işi ilə bağlı nə baş verib?

"Abzas Media" ilə bağlı cinayət işi üzrə saytın direktoru Ülvi Həsənli 2023-cü ilin noyabrın 20-də həbs olunub. İstintaqın həmin gün onun evində və “Abzas Media”nın ofisində axtarış apardığı və ofisdən 40 min avro pul tapıldığı bildirilib.

Daha sonra noyabrın 20-də direktor müavini Məhəmməd Kekalov, 21-ə keçən gecə xaricdən qayıdanda hava limanında saytın baş redaktoru Sevinc Vaqifqızı həbs olunub. Həmin iş üzrə jurnalistlər Nərgiz Absalamova, Elnarə Qasımova və araşdırmaçı jurnalist Hafiz Babalı da həbs olunub.

Mayın 30-da isə "Abzas Media" işi üzrə iqtisadçı Fərid Mehralızadə saxlanılıb. İyunun 1-də Xətai Rayon Məhkəməsi iqtisadçı barəsində 3 ay 20 gün müddətinə həbs qətimkan tədbiri seçib. Mehralızadə məhkəmədə təqsiri olmadığını və "Abzas Media" ilə heç bir işgüzar fəaliyyətinin olmadığını deyib.

Onların hamısına Cinayət Məcəlləsinin 206.3.2-ci (öncədən əlbir olan bir qrup şəxs tərəfindən qaçaqmalçılıq) maddəsi ilə ittiham verilib. Bu ilin avqust ayında isə "Abzas Media işi" üzrə həbs olunanlara qarşı 7 maddə ilə əlavə ittihamlar irəli sürülüb. Onlar Cinayət Məcəlləsinin 192.3.2-ci, 193-1.3.1-ci, 193-1.3.2-ci, 206.4-cü, 320.1-ci və 320.2-ci, 213.2.1-ci maddələri ilə (xüsusilə külli miqdarda gəlir əldə etməklə qanunsuz sahibkarlıq, mütəşəkkil dəstə şəklində cinayət yolu ilə əldə edilmiş xeyli miqdarda pul vəsaitlərini leqallaşdırma, mütəşəkkil dəstə tərəfindən törədilmiş qaçaqmalçılıq, sənəd saxtalaşdırma və saxta sənədlərdən istifadə etmə, mütəşəkkil dəstə halında vergi ödəməkdən yayınma) maddələri ilə ittiham olunurlar.

Həmin iş üzrə bir sıra vətəndaş cəmiyyəti nümayəndəsi müxtəlif vaxtlarda Bakı Şəhər Baş Polis İdarəsində şahid qismində dindirilib, daha sonra sərbəst buraxılıblar.

Həbs olunanların heç biri özünü təqsirli bilmir, həbslərinin peşə fəaliyyətləri ilə bağlı olduğunu deyir.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Noyabrın 18-də Sərhədsiz Reportyorlar təşkilatı jurnalistlərə qarşı pis rəftarı qınayıb və onların azad edilməsinə dair çağırışını yeniləyib.

Avropa Şurasının İnsan Hüquqları üzrə Komissarı Maykl O’Flaherti də Azərbaycan Prezidenti İlham Əliyevə ünvanladığı məktubunda jurnalistlərin, hüquq müdafiəçilərinin və fəalların həbsi ilə bağlı narahatlıq ifadə edib, onların azad edilməsinə çağırıb.

Rəsmi Bakı isə jurnalistlərin əsassız həbsi ilə bağlı ittihamları rədd edir, ölkədə bütün hüquq və azadlıqların təmin edildiyini bəyan edir.