Azərbaycanın Britaniyadakı keçmiş səfiri Rafael İbrahimov Çeşirdə reabilitasiya klinikasının üç qadın əməkdaşına qarşı seksual hərəkətlər etməkdə ittiham olunub.

Bu barədə məlumatı "Northwhitch Guardian" yayıb.

Xəbərdə qeyd olunur ki, hadisə 2023-cü il dekabrın 5-də sabiq səfirin klinikaya yollandığı zaman baş verib.

Həmin zaman Londonun Naytsbric ərazisində yaşayan Rafael İbrahimov yuxu həblərindən asılılığından müalicə üçün klinikaya gedib.

Məlumata görə, məhkəmə materiallarına əsasən, İbrahimov həmin gün sərxoş vəziyyətdə olub, özünü aqressiv aparıb, qadın əməkdaşların müxtəlif bədən hissələrinə toxunub.

İbrahimova 16 ay həbs cəzası verilib, lakin o, dərhal cəzasını çəkməli deyil. Əvəzində cəza iki il müddətinə şərti olaraq verilib. Bu iki il ərzində başqa bir cinayət törətsə, hər hansı yeni cəzaya əlavə olaraq 16 ay müddətinə həbs oluna bilər.

Əlavə olaraq, 20 gün reabilitasiya tədbirləri və 200 saat ictimai işlər növündə inzibati tənbeh alıb.

Onun adı 10 il müddətinə cinsi cinayətkarlar reyestrində olacaq.

Məqalədə qeyd olunur ki, Norveç və İsveçdə də səfir vəzifəsində çalışmış İbrahimov keçən il beş cinsi təcavüz və bir cinsi zorakılığa cəhddə günahını etiraf edib.

Məsələ ilə bağlı keçmiş səfirdən mövqe almaq mümkün olmayıb.

Rafael İbrahimov 2001-ci ildən 2013-cü ilə qədər Azərbaycanın Böyük Britaniyadakı, Norveçdəki, İrlandiyadakı, İsveç və Finlandiyadakı səfiri olub.

2014-cü ildə səfir vəzifəsindən geri çağırılsa da, keçmiş səfir hazırda Londonda yaşayır./amerikaninsesi.org/