Baş bankir bir ətək pul töküb, Avstriya məhkəməsində rüşvət qalmaqalını ört-basdır etmək istəyir
Mərkəzi Bankın sədri Elman Rüstəmovun Vyanada adı keçən rüşvət qalmaqalı ört-basdır edilir. Baş bankir yerli mətbuatda barəsində gedən yazılara son qoyulmasına tapşırıq verib. Baş bankir kompaniyanın dayandırılması üçün müəyyən pullar xərcləyib.
E.Rüstəmovun media menecerləri işə girişib, mətbuatda hansı qurumlar onu daha çox tənqid edibsə, onlarla razılaşmağa çalışıblar. Ona görə də baş bankir haqda kompromat materialları azalıb, Vyana məhkəməsindən yazılar səngiyib.
Mənbə qeyd edir ki, baş bankir bir ətək pul töküb, Avstriya məhkəməsində rüşvət qalmaqalını ört-basdır etmək istəyir: “Elman Rüstəmov həqiqətən də səriştəli, savadlı məmurdur. Fəaliyyət göstərdiyi müddətdə dövlət başçısının etimadını qazanıb. Əgər onun fəaliyyətində hansısa bir qeyri-müəyyənlik olsaydı, məxfi dairələrdə müzakirə olunar, ölkə başçısı buna reaksiya verərdi. Elman Rüstəmov işini bilən mütəxəssisdir. O, makroiqtisadi prosesləri yaxşı bilir. Onu qabiliyyətli bankir kimi yaxşı tanıyırlar. Hələ 1992-ci ildə Mərkəzi Bankın sədr müavini işləyirdi.
Təbii ki, Azərbaycanın adının Vyanada rüşvətlə bağlı məhkəmədə hallanması müsbət hal deyil. Ancaq davamlı olaraq kompaniya başladılmışdı və artıq buna son qoymağa cəhd olunur. Elman Rüstəmov hesab edib ki, şəxsinə yönəlik hücumlardır və arxasında ona qarşı olan dairələr dayanır. Bu mənada menecerlər hərəkətə keçib, informasiya ötürən qaynaqları təftiş etməyə başlayıb, bəziləri ilə sövdələşib”.
Əldə etdiyimiz xəbərdə deyilir ki, Rüstəmov Vyanadakı işdə adının çəkilməsini istəmir və danışıqlara gedib, məhkəmədə ona aid bəndlər çıxarıla bilər.
Bunun nə dərəcədə mümkün olacağı bilinməsə də, Vyana məhkəməsi rüşvət veriləcəyi istisna olunmur. Ümumiyyətlə, aylardır davam edən kompaniyada baş bankirin xarizmasına ciddi zərbə vurulub və reputasiyası zədələnib. Daha artığının olmaması üçün MB sədri əlaqələrini işə salıb. Vyana məhkəməsində isə iş hələlik davam edir. Bununla belə, övladları haqda gedən yazılar da baş bankiri təbdən çıxarıb.
Qeyd edək ki, 19 illik baş bankirimiz Elman Rüstəmovun adı dünya miqyasında rüşvət skandalında çəkilir. Avstriyanın paytaxtı Vyana məhkəməsində Mərkəzi Bank və bu ölkənin banknot çapı ilə məşğul olan “OeBS” şirkəti arasında rüşvət sövdələşməsinə dair qalmaqallı məhkəmə prosesi davam edir. Azərbaycan müxalifəti baş bankirin bu addımının ölkəyə başucalığı gətirmədiyini bəyan edib.
Rafiq Qara