Mənsur Məmmədov nazir əmisi oğluna görə qurban verilə, rayonda Quba
olayları təşkil edilə bilər; Ziya Məmmədovun bölgələrdəki adamları da hədəf çıxarılıb

Göyçayın icra başçısı Mənsur Məmmədov səksəkə içindədir. Nəqliyyat naziri Ziya Məmmədovun hesabına rayona rəhbər təyin edilən M.Məmmədov istefaya göndərilməkdən qorxur. Ziya Məmmədovun kurasiyasındakı rayonların əlindən alınması təhlükəsinin yaranması, nazirin əleyhinə kampaniya başlanması Göyçayın başçısının başında çatlaya bilər.
Rayondan qəzetimizə verilən məlumatda bildirilir ki, nəqliyyat nazirinin zəiflədilməsi prosesinin növbəti mərhələsində Ziya Məmmədov rayonlarsız qala bilər. Belə ki, onun kurasiyasında olan rayonların digər böyük oliqarxlar tərəfindən pay-püşk ediləcəyi gözlənilir.
Göyçay, Zərdab və Ucarın əldən çıxması ehtimalı var. Mənbəmiz son günlər ciddi hücuma məruz qalan Z.Məmmədovun, xüsusilə, Ucarı və Göyçayı əldən verməmək üçün dirəniş göstərdiyini yazır. O da qeyd olunur ki, bu rayonlardan öncəliklə qısa zamanda icra başçıları dəyişdiriləcək. Mənsur Məmmədov nazirin əmisi oğludur.
“Mənsur Məmmədov reputasiyası ən çox zədələnmiş icra başçısıdır. Onun barəsində o qədər faktlar yazılıb ki, bir cinayət dosyesi hazırlana bilər. Sadəcə, nazir qohumunun hesabına ona “gözün üstə qaşın var” deyən olmayıb.
Amma indi vəziyyət əksinə cərəyan edir. İcra başçısı rəqiblərinin fəallaşmasından həyəcanlanıb. Rayon icra hakimiyyətində işləyənlərə tapşırıq verilib ki, əhali ilə işləsinlər, şikayətlər dinlənilsin. Nazir özü də bu təlimatı verib ki, onunla bağlı problem çıxmasın. Çünki növbəti Quba hadisələri süni şəkildə təşkil oluna bilər. Odur ki, bu xof onları işləməyə sövq edib.
Mənbə qeyd edir ki, Göyçayın rəhbəri barəsində kifayət qədər əldə dosye var və hakimiyyət kluarlarında müzakirə olunur. Əgər Məmmədovlar klanı tamamilə hakim komandanda uzaqlaşdırılsa, ilk növbədə Mənsur Məmmədov həbs ediləcək. Çünki onun ən böyük xətası Heydər Əliyev Fondunun dəstəyi ilə rayonda tikilən məktəbin ərazisini satmağıdır. Məktəbin həyətinin bir hissəsi sahibkara satılıb. Mətbuat bu məsələni yazıb. Yuxarı dairələrdə isə bu faktı qeydə alıblar və nə vaxtsa lazım olanda istifadə olunacaq. Göyçayın başçısı son günlər olduqca gərgindir və çox narahatdır. O, əmisi oğlunun güdazına getməkdən qorxur. Hər halda bilir ki, hansı günahları var.
Ümumiyyətlə, nazir-oliqarxların savaşı getdikcə daha amansız xarakter almaqdadır. Hazırda bir neçə yüksək vəzifəli məmur arasında ciddi mübarizə gedir. Bunlardan ən diqqətçəkəni və geniş miqyaslısı isə nəqliyyat naziri Ziya Məmmədovla iqtidardakı ciddi bir qrupun arasında gedən müharibədir. Bu müharibə Z.Məmmədovun media sektoruna girməsindən sonra daha da qızışıb. Ölkənin ən zəngin nazirinin qələminin qırıldığı gözlər önündədir. Nazirin informasiya müharibəsində məğlub olmamaq üçün media holdinq açması da buna hesablanıb.
Rafiq QARA