Prezident İlham Əliyevin sədrliyi ilə Təhlükəsizlik Şurasının iclası keçirildi; dövlət başçısı: “Bütün məsuliyyət Ermənistan rəhbərliyinin üzərinə düşür“; şəhidlərimiz torpağa tapşırıldı; Azərbaycana ilk ciddi dəstək yenə də qardaş Türkiyədən gəldi, Ermənistana sərt xəbərdarlıq edildi: “Ağlını başına yığ!”

İyulun 12-dən başlayaraq, Ermənistan-Azərbaycan sərhədinin Tovuz rayonu istiqamətində işğalçı ölkənin həyata keçirdiyi təxribatlar nəticəsində vəziyyət kifayət qədər gərginləşib. Erməni ordusunun Azərbaycana məxsus mövqeləri ələ keçirmə cəhdinin qarşısını alan qəhrəman ordumuz 4 şəhid verib, daha 4 hərbçimiz yaralıdır.

Düşmən tərəfin Tovuz istiqamətində başlayan təxribatı nəticəsində 4 nəfər hərbiçimiz - çavuş Sadıqov Vüqar Lətif oğlu, baş əsgər Məmmədov Elşad Dönməz oğlu, əsgər Daşdəmirov Xəyyam Məhəmməd oğlu və baş leytenant Mahmudov Rəşad Rəşid oğlu şəhid olublar.

İyulun 13-də şəhidlərimiz doğulduqları rayonlarda böyük izdihamla torpağa tapşırılıb.

Qeyd edək ki, “Yeni Müsavat”ın 2 əməkdaşı hazırda döyüşlər gedən Tovuzun Ağdam kəndi istiqamətinə ezam olunub. Onlar baş verənlər barədə operativ qaydada xəbərlər verir, ərazidən reportajlar və fotolar təqdim edirlər.

Düşmənin azğınlığı Azərbaycanda qəzəb və nifrətlə yanaşı, vətənpərvərlik ruhunu da yüksəldib. Şəhidlərimiz son mənzilə insan selinin alqış sədaları və “Şəhidlər ölməz, Vətən bölünməz” nidaları ilə yola salınıb. Bir çox yerlərdə isə insanlar küçələrə axışaraq “Qarabağı istəyirik”-deyə, beynəlxalq aləmə mesaj verib, Ali Baş Komandanın əmrini gözlədiklərini deyiblər.

Düşmən 2016-cı ilin aprel döyüşlərindən sonra ilk dəfə artilleriyadan istifadə edib və hər dəfə Azərbaycan Ordusunun cavab zərbələri ilə atəş nöqtələri susdurulub, bir sıra hərbi məntəqələri darmadağın edilib.

Ermənilər itkilərinin sayını rəsmən açıqlamasalar da, erməni mənbələr onlarla erməninin gəbərdiyini etiraf edir və hökumətə qəzəblərini bildirirlər.

***

Düşmənin alçaq təxribatı ilə əlaqədar olaraq iyulun 13-də Azərbaycan prezidenti İlham Əliyevin sədrliyi ilə Təhlükəsizlik Şurasının iclası keçirilib. AZƏRTAC xəbər verir ki, dövlətimizin başçısı iclasda çıxış edib. Dövlət başçısı bildirib ki, birinci dəfə deyil ki, dövlət sərhədində Ermənistan tərəfindən hərbi təxribatlar törədilir: “Son bir neçə ay ərzində bu hərbi təxribatlar nəticəsində bizim hərbçilərimiz, eyni zamanda mülki şəxslər həlak olmuşdur. Dünən günorta saatlarında onların növbəti təxribatı nəticəsində bir neçə hərbçimiz həlak olmuşdur. Qəflətən bizim hərbi postumuza artilleriya atəşi açılıb və bu çirkin əməl nəticəsində hərbçilərimiz həlak olub və yaralanıb. Allah şəhidlərimizə rəhmət etsin, yaralı hərbçilərimizə Allahdan şəfa diləyirəm”. Prezident deyib ki, Ermənistanın növbəti təxribatının qarşısı qətiyyətlə alınıb, adekvat cavab verilib: “Hərbçilərimizin qisası alınmışdır. Ermənistan tərəfinin bütün cəhdləri iflasa uğradı, Azərbaycan öz dövlət sərhədini qorudu və Ermənistan əsgərləri bir santimetr belə Azərbaycan torpağına keçə bilməmişlər”.

Ali Baş Komandan bildirib ki, iyulun 13-də sərhəddə gərgin vəziyyət davam edib: “Dünən gecə bütün aidiyyəti qurumlarla, komandanlarla əlaqədə idim. Bu gün səhər tezdən də mənə operativ məlumat verilib və sərhəddə vəziyyət sabitləşməyib. Bütün məsuliyyəti Ermənistanın hərbi-siyasi rəhbərliyi daşıyır. Çünki məhz Ermənistan rəhbərliyinin ikiüzlü və riyakar fəaliyyətinə görə belə hadisələr baş verir. Bir tərəfdən, beynəlxalq ictimaiyyətə müraciət edir və Ermənistan-Azərbaycan qoşunlarının təmas xəttində atəşkəs rejiminin möhkəmləndirilməsi üçün kömək xahiş edir. Digər tərəfdən, hərbi təxribatlar törədərək Azərbaycan ərazisinə basqın etmək istəyir, mövqelərimizi zəbt etmək istəyir, mülki əhalini, kəndlərimizi atəşə tutur. Bu çirkin və məkrli siyasət Ermənistanı uçuruma aparacaq. Bütün məsuliyyət Ermənistan rəhbərliyinin üzərinə düşür. Azərbaycan öz ərazi bütövlüyünü bundan sonra da qoruyacaq, öz sərhədlərimizi qoruyacaq. Dünən günorta saatlarında və bu gün gecə düşmənə vurulmuş sarsıdıcı zərbələr bir daha onu göstərdi. Həlak olan hərbçilərimizin qisası alındı və onların qanı yerdə qalmayıb və qalmayacaq”.

Prezident İ.Əliyev bildirib ki, bu çirkin əməllərə əl atmaq onların təcavüzkar siyasətinin təzahürüdür. Bu siyasəti məntiqlə izah etmək mümkün deyil. Çünki olduqca ziddiyyətlidir və Ermənistan üçün böyük təhlükə mənbəyidir. Çünki mən dəfələrlə demişəm, bir daha demək istəyirəm ki, Azərbaycan heç vaxt işğal edilmiş torpaqlarının bu vəziyyətdə qalması ilə barışmayacaq, işğalla barışmayacaq və əlindən gələni edəcək ki, öz ərazi bütövlüyünü bərpa etsin".

Dövlət başçısı rəsmi Bakının operativ şəkildə atdığı addımlardan da bəhs edib: “Beynəlxalq təşkilatlara müvafiq müraciətlər edilib və operativ vəziyyət imkan verən kimi biz Azərbaycanda fəaliyyət göstərən xarici ölkələrin hərbi nümayəndələrini həmin əraziyə dəvət edəcəyik, onlar öz gözləri ilə vəziyyəti görsünlər. Görsünlər ki, kim bu hərbi təxribatı törədib. Bu hərbi təxribat nəticəsində nələr baş verib və kim vəziyyətin gərginləşməsinə cavabdehlik daşıyır. Bizim işimiz haqq işidir və Azərbaycan öz prinsipial mövqeyindən bir addım geri atmayacaq”.

Prezident deyib ki, Ermənistanda daxili vəziyyət artıq böhranlı həddə çatıb: “Daxili çaxnaşmalar geniş vüsət alıb. Eyni zamanda ölkəmizin son vaxtlar əldə etdiyi beynəlxalq uğurlar onları çox narahat edir və onlarda paxıllıq hissini daha da gücləndirib. Xüsusilə beynəlxalq təşkilatlar çərçivəsində uğurlu fəaliyyətimiz, son müddət ərzində bütün aparıcı beynəlxalq təşkilatlar tərəfindən Ermənistan-Azərbaycan Dağlıq Qarabağ münaqişəsi ilə bağlı verilmiş açıqlamalar, qəbul edilmiş qərarlar, ölkəmizin ərazi bütövlüyünün dəstəklənməsi, əlbəttə ki, Ermənistanın münaqişə ilə bağlı mövqelərinə çox ciddi zərbə vurubdur. Eyni zamanda mötəbər kürsülərdən müntəzəm olaraq həm münaqişənin tarixi ilə, həm bölgənin tarixi ilə bağlı gətirdiyimiz konkret faktlar, inandırıcı əsaslandırmalar, əlbəttə ki, onların təbliğatını alt-üst edir. Artıq bütün dünya bilir ki, Dağlıq Qarabağ əzəli tarixi Azərbaycan torpağıdır və bunu təsdiqləyən kifayət qədər sənədlər var və bu sənədləri biz indi geniş beynəlxalq ictimaiyyətə təqdim edirik. Eyni zamanda bütün dünya Dağlıq Qarabağı Azərbaycanın ayrılmaz hissəsi kimi tanıyır. Bunu da təsdiqləyən kifayət qədər çox beynəlxalq sənədlər və açıqlamalar var. O cümlədən bu yaxınlarda qondarma ”Dağlıq Qarabağ respublikası"nda keçirilmiş qondarma “seçkilər” nəinki heç bir ölkə tərəfindən tanınmadı, hətta bütün aparıcı beynəlxalq təşkilatlar, qonşu ölkələr və bu məsələ ilə məşğul olan ölkələr bu seçkiləri pislədilər. Beləliklə, bir daha ölkəmizin ərazi bütövlüyünə dəstək ifadə olundu, bir daha açıq göstərildi ki, Dağlıq Qarabağ Azərbaycanın ayrılmaz hissəsidir. Ona görə hazırda Ermənistanda hökm sürən hərc-mərclik və vəziyyətin böhran həddinə yaxınlaşması onları bu çirkin əməllərə sövq edibdir. Digər tərəfdən, o da sirr deyil ki, artıq uzun müddətdir ki, Ermənistan münaqişə ilə bağlı öz addımlarında xüsusilə Ermənistan-Azərbaycan dövlət sərhədini misal gətirərək belə bir rəy formalaşdırmaq istəyir ki, guya Azərbaycan Ermənistan ərazisinə hücumlar edir. Halbuki bu, yalandır. Bütün hücumlar Ermənistan tərəfindən törədilir və bunun kifayət qədər sənədləri var, video-foto sənədləri var. Azərbaycan isə sadəcə olaraq, bütün təxribatlara adekvat cavab verir. Əgər Ermənistan ərazisindən Azərbaycan mövqelərinə, Azərbaycan kəndlərinə atəş açılırsa, təbii ki, biz adekvat cavab verəcəyik və veririk. Ona görə Ermənistan bütün imkanlardan istifadə edib, eyni zamanda saxta məlumatlar uydurub dövlət sərhədinə xüsusi diqqətin cəlb edilməsi üçün əlindən gələni edir. Dünənki hərbi təxribat bu çirkin siyasətin növbəti təzahürüdür".

Ölkə başçısının sözlərinə görə, bu təxribatın digər səbəbi odur ki, son vaxtlar Azərbaycan beynəlxalq arenada çox böyük uğurlara imza atıb: “Bizim təşəbbüsümüzlə beynəlxalq təşkilatların zirvə görüşləri keçirilib. Bizim təşəbbüsümüzlə BMT Baş Assambleyasının xüsusi sessiyası baş tutub. Bu təklifi, bu təşəbbüsü 130-dan çox ölkə dəstəkləyib və Ermənistan bu təşəbbüsün əleyhinə çıxıb və bir daha özünü rüsvay edib, bir daha özünü dünyadan təcrid edib. Bu gün dünya gündəliyində birinci yerdə duran COVİD ilə bağlı mübarizə məsələsində öz anlaşılmaz mövqeyi ilə bir daha bütün dünyanın diqqətini öz çirkin siyasətinə cəlb edib. Necə ola bilər ki, Azərbaycan bütün dünyanın bu mübarizədə birləşməsini tələb etdiyi bir vaxtda Ermənistan bunun əleyhinə çıxıb. Ona görə beynəlxalq arenada Ermənistan demək olar ki, bütün dayaqlarını itirməkdədir. Daxili vəziyyət kifayət qədər gərgindir. Vəd olunan dırnaqarası çiçəklənmə, artıq hər kəs tərəfindən başa düşülür ki, bu, xülyadır, bu, yalandır. Əlbəttə ki, dünənki hadisə ilə bağlı Ermənistan rəsmi orqanlarının açıqladığı məlumat yalanın növbəti əlamətidir. Bu məlumatda onlar məsuliyyəti Azərbaycanın üzərinə yıxmaq istəyirlər. Halbuki buna heç bir əsas yoxdur və bir daha demək istəyirəm ki, - bütün müstəqil ekspertlər bunu təsdiq edə bilər, - heç bir əsas olmadan bizim hərbi postumuza artilleriya zərbəsi endirilib. Məhz bunun nəticəsində bizim hərbçilərimiz həlak olub. Onların gücü ona çatır ki, ancaq mülki əhalini atəşə tutsunlar, ya da ki, qəflətən bizim hərbi postumuza atəş açsınlar. Bunu da onlar etdilər və bir daha öz çirkin və məkrli mahiyyətlərini ortaya qoydular”.

Prezident iclasda hər kəsi əmin edib: “Mən bir daha demək istəyirəm ki, dünən və bu gecə düşmənə adekvat cavab verilib. Hərbçilərimizin qisası alınıb, bundan sonra da alınacaqdır. Hərbçilərimizin, şəhidlərimizin qanı yerdə qalmayıb və qalmayacaq. Biz bütün imkanlardan istifadə edib özümüzü qoruyacağıq və düşmənə yenidən onun öz yerini göstərəcəyik”.

Sonra Təhlükəsizlik Şurasının iclası qapalı rejimdə davam edib.

Azərbaycanın Birinci vitse-prezidenti Mehriban Əliyeva isə cəhbədə baş verənlərlə bağlı “İnstagram”da paylaşım edib. “Yeni Müsavat” paylaşımın mətnini təqdim edir: “Azərbaycan xalqı işğalla heç vaxt barışmayacaq! Bizim torpağımız, Vətən uğrunda mübarizəmiz müqəddəsdir! Bizim işimiz haqq işidir və Allah bizimlədir! Düşmənə layiqli cavab verildi və bu, hər zaman belə olacaq! Biz daha da güclü olmalıyıq və olacağıq, daha sıx birləşəcəyik! Şəhid analarına və atalarına öz dərin kədərimi və hörmətimi bildirirəm. Bu çətin günlərdə Azərbaycan xalqı sizinlədir. Allah bütün şəhidlərimizə rəhmət eləsin! Yaralı əsgərlərimizə tezliklə şəfa versin! Allah Azərbaycanı və xalqımızı qorusun!”

****

“Ermənistanın məqsədyönlü şəkildə həyata keçirdiyi bu təxribat üçüncü ölkələri Ermənistan-Azərbaycan münaqişəsinə cəlb etmək və Ermənistan cəmiyyətinin fikrini daxili problemlərdən yayındırmaq məqsədi güddür”. Bunu xarici işlər naziri Elmar Məmmədyarov iyulun 13-də ATƏT-in Minsk Qrupunun Rusiyadan olan həmsədri İqor Popov və ATƏT-in fəaliyyətdə olan sədrinin şəxsi nümayəndəsi Anjey Kaspşik ilə telefon söhbətləri zamanı deyib. Qarşı tərəfi Ermənistan silahlı qüvvələrinin hücum cəhdinin qarşısının alınması və bölgədəki cari vəziyyət barədə məlumatlandıran nazir E.Məmmədyarov ciddi narazılığını bildirərək, Ermənistanın bu yeni təxribatını təcavüz aktı kimi qiymətləndirib.

Azərbaycan -Türkiyə dostluğu düşmənə gözdağıdır

Azərbaycanın ədalətli mövqeyini hər zaman müdafiə edən Türkiyə növbəti dəfə qardaşlıq nümunəsi göstərib. Türkiyə XİN-in bəyanatda deyilir: “Erməni silahlı qüvvələrinin Azərbaycanın Tovuz bölgəsinə gerçəkləşdirdiyi hücumu şiddətlə qınayırıq. Həyatını itirən azərbaycanlı şəhidlər üçüün dost və qardaş Azərbaycan xalqına və hökumətinə başsağlığı verir, yaralılara tezliklə şəfalar diləyirik”. Türkiyə Xİ?N-in bəyanatında Ermənistanın təcavüzkar siyasətinin yeni bir təzahürü olan bu hücumun Azərbaycan tərəfindən qarşısının alındığı vurğulanıb, hücumların cavabsız qoyulmayacağına inam ifadə olunub. Bildirilib ki, Ermənistan beynəlxalq toplumun diqqətini Azərbaycan torpağı olan Dağlıq Qarabağ və ətrafında illərdir davam edən hüquqdankənar yerlərə çəkmək və münaqişəyə yeni çalarlar qatmaqla siyasi həllin qarşısını almaq üçün əl atdığı bu təşəbbüs nəticəsiz qalmağa məhkumdur.

Bildirlir ki, Ermənistan tərəf bu kimi təhlükəli taktikadan əl çəkməli, hüquq yolunu seçməlidir. “Türkiyə, ərazi bütövlüyünü müdafiə mücadiləsində bütün imkanları ilə Azərbaycanın yanında yer almaqda davam edəcək”-Türkiyə XİN-in bəyanatında daha sonra deyilir.

“Ermənistan ağlını başına yığsın”. Bunu Türkiyənin xarici işlər naziri Mövlud Çavuşoğlu “TRT Haber”ə müsahibəsində Azərbaycan-Ermənistan dövlət sərhədinin Tovuz istiqamətində baş verən döyüşlərə dair suala cavabında deyib. “Ermənistan ağlını başına yığsın. Bütün imkanlarımızla Azərbaycanın yanındayıq”, - deyə Türkiyə XİN başçısı vurğulayıb.

İran da Azərbaycana başsağlığı verib. İtaliya parlamentinin bir qrup üzvü isə Azərbaycanın ərazi bütövlüyünü dəstəkləyən bəyanat veriblər.

“Biz münaqişəni sülh yolu ilə həll etməyə hazırıq. Ancaq danışıqlar danışıq aparmaq xatirinə olmamalıdır”. Bunu Azərbaycanın Rusiyadakı səfiri Polad Bülbüloğlu “Qovorit Moskva” radiostansiyasına müsahibəsində deyib. “Dünən Azərbaycan növbəti itkilər verib. Biz bunu gizlətmirik. Məsələni həll etmək lazımdır. Bunun üçün substantiv danışıqlar aparılmalıdır. Məsələ həll olunmadıqca belə hallar baş verə bilər. Yenə də təkrar etmək istəyirəm, bu, genişmiqyaslı müharibəyə yol aça bilər”, - P.Bülbüloğlu bildirib.

Belə bir mənzərə isə həmsədrlərin missiyasına son qoyulması zərurətini ortaya çıxarıb. Ermənistan təcavüz edib, Azərbaycan itkilər verib, amma vasitəçilər sadəcə telefon zəngi ilə kifayətlənir. Hansı ki, bir neçə gün əvvəl nazirləri virtual görüşdürmüşdülər. Görüşdən az sonra Ermənistan prezidenti və XİN rəhbəri Qarabağa gəldi, lakin vasitəçilərdən səs çıxmadı.

“ATƏT-in Minsk Qrupu dərhal buraxılmalıdır. Onların heç bir faydası yoxdur”. APA-nın Moskva müxbirinin verdiyi məlumata görə, bunu Rusiyanın tanınmış siyasi eksperti Qriqori Trofimçuk Azərbaycan-Ermənistan sərhədində baş verən son gərginliyi şərh edərkən bildirib. “Ermənistan və Azərbaycan ordularının qarşılıqlı zərbələri və yeni qurbanlar barədə İrəvan ənənəvi olaraq Bakının aqressiyada günahlandırır. Bakı İrəvanı ittiham edir. Əgər əlimdə belə imkanım olsaydı, mən birbaşa bu gün ATƏT-in Minsk Qrupu həmsədrlərini restoranlardan və yataqdan çıxarıb ”Kimdir aqressor?" sualına dəqiq cavab tələb edərdim. Əks halda, Minsk Qrupu dərhal buraxılmalıdır. Belə ki, o, baş verənlərə görə heç bir məsuliyyət daşımır. Minsk Qrupu heç nəyə nəzarət etmir. Demək, onun heç bir faydası yoxdur", - deyə, rusiyalı politoloq “Facebook” səhifəsində yazıb.

Ermənistanın təxribatlarının ardınca “Rus NATO”suna şikayət etməsi də başqa bir həyasızlıq nümunəsi oldu. Bundan sonra KTMT baş katibi təcili iclas çağıracağını açıqlasa da, toplantı baş tutmadı. “Əminəm ki, Rusiya Ermənistanın köməyinə gələn deyil. Moskva Ermənistanın oynadığı oyunu yaxşı başa düşür”.

Bu sözləri Axar.az-a açıqlamasında sabiq xarici işlər naziri, politoloq Tofiq Zülfüqarov deyib. Politoloq Azərbaycan-Ermənistan dövlət sərhədində baş verən təxribata toxunub: “Uzun müddətdir Ermənistanla Rusiya arasında dərinləşən siyasi böhran bu gün pik həddədir”. T.Zülfüqarov deyib ki, Paşinyana Rusiya ilə münasibətləri birdəfəlik pozmaq üçün Azərbaycanla hərbi əməliyyatları bərpa etmək su və hava kimi lazımdır: “Bu yolla o, Rusiyanı ittiham edərək daxildəki rusiyameyilli qüvvələrin prestijini xalqın gözündə aşağı endirmək isəyir. Yəni ”Rusiya heç bir kömək etmədi, bizi yalnız qoydu" fikri yaratmağa çalışır. Düşünürəm, bu səbəbdən Ermənistan Dağlıq Qarabağda deyil, məhz Ermənistan-Azərbaycan sərhədində təxribata əl atdı".

BAXCP sədri, deputat Qüdrət Həsənquliyev təxribatın məqsədyönlü xarakter daşıdığını vurğulayıb: “Biz mənfur bir düşmənlə üz-üzəyik. Ermənistan Azərbaycanla sərhəddə bu təxribatı törətməklə həm Kollektiv Təhlükəsizlik Müqvaviləsi Təşkilatını bu münaqişəyə cəlb etmək, həm də diqqəti daxildəki qarşıdurmadan yayındırmaq istəyir. Paşinyan xalq arasında dayaqlarını sürətlə itirdiyindən bu təxribatı sanksiyalaşdıra bilər. Amma təxribatın ordu daxilindəki Qarabağ klanına bağlı narazı qüvvələr tərəfindən təşkil olunduğunu da istisna etmək olmaz. Bu təxribat böyükmiqyaslı döyüşlərə başlamazdan əvvəl ordumuzun döyüş qabiliyyətini yoxlamaq üçün kəşfiyyat xarakterli əməliyyat da ola bilər. Amma kimin tərəfindən və hansı məqsədlə törədilməsindən asılı olmayaraq, Azərbaycan Ordusu bu təxribata yaxın günlərdə daha ağır zərbə ilə cavab verməlidir. Ümid edirəm, Azərbaycan hökuməti torpaqlarımızı işğaldan azad etmək üçün ciddi qərarlar qəbul etməyin vaxtının çatdığının fərqindədir”.

Yazı çapa hazırlanarkən döyüş bölgəsində olan əməkdaşlarımız Ermənistan ordusunun Tovuzun həmsərhəd kəndlərini top atəşinə tutduqları və ordumuzun alçaq düşmənə cavab zərbələri endirdiyi haqda xəbər verdilər.//musavat.com