2016-cı ilin qısa müddətli aprel döyüşlərində Azərbaycan ordusu Qarabağda hərbi üstünlük əldə etdi.

Uğurlu əməliyyatlar, müəyyən ərazilərin işğaldan azad edilməsi cəmiyyətdə ruh yüksəkliyi yaratdı. Aprel döyüşlərindən 4 il sonra, bu ilin iyul ayında yenidən oxşar situasiya yaranıb. Erməni silahlı qüvvələri Azərbaycan-Ermənistan dövlət sərhədini Tovuz istiqamətində pozaraq bölgədə vəziyyəti gərginləşdirib.

Qanlı döyüşlər gedib. Türkiyə, Pakistan, Ukrayna kimi dövlətlər Azərbaycanın haqq savaşına dəstək verib. Xalq orduya dəstək yürüşünə çıxıb. İnsanlar könüllü olaraq orduya yazılıblar. Bu günə olan rəsmi məlumata görə, 55 min nəfər könüllü olaraq orduya yazılıb.

Belə bir vəziyyətdə Azərbaycan Dağlıq Qarabağı işğladan azad edə bilərmi?

“Peşəkar ordu yaratmaq barədə düşünməliyik”

Böyük Quruluş Partiyasının (BQP) sədri, deputat Fazil Mustafa Cebhe.info-ya açıqlamasında Qarabağ məsələsində belə tez həvəslənməyin doğru olmadığını deyib:

“Biz birinci növbədə peşəkar ordu yaratmaq barədə düşünməliyik. Məsələn, 55 min adam könüllü olaraq orduya yazılıb, onların bəziləri də imkanlı adamlardır. Yəni müəyyən dərəcədə vəzifədə olan şəxslər var. Elə peşəkar ordunun da əsasını belə qurmaq olar. Vaxtilə 1918-ci ildə “Dikaya diviziya” (“Vəhşi diviziya”) adlı birləşmə yaradılmışdı. Bunun şəxsi heyətini Zeynalabdin Tağıyevin və digər neft messenantlarının uşaqları təşkil edirdi. Onların pulunun ödənilməsinə də elə özləri müəyyən dərəcədə dəstək verirdilər. Elə bu bazada da fikrimcə, peşəkar ordunun yaranması istiqamətində proseslərə başlamaq olar. Təbii ki, digər peşəkar insanları da bura qatmaq olar, amma təkcə dövlət dəstəyi ilə bu edilməsin, həm də söylədiyim kimi, müəyyən dərəcənin gücü çatır, ordu quruculuğuna kömək edə bilər. Bu istiqamətdə belə bir peşəkar ordunun yaradılması istiqamətində addımlar atmaq olar. 1918-ci ildəki “Dikaya diviziya” formasında birləşmə yaratmaq mümkündür. Nuru Paşanın rəhbərlik etdiyi türk ordusu gələndə bunlar ordunun əsasını təşkil etdilər. İndi nizami ordumuz var, amma Dağlıq Qarabağda müharibəni nizami ordu ilə aparmaq mümkün deyil. Burada mütləq xüsusi təyinatlı qüvvələrə ehtiyac var. Ona görə də düşünürəm ki, elə o müraciət edən könüllülərin içində fiziki və başqa üstünlüklərinə görə hazırlıqlı olanları seçib orduya cəlb etmək, maaş vermək olar. İmkanlı şəxslər, hətta İcra Hakimiyyətinin başçısı da orduya yazılıb. Amma onların hərbiyə getməyinə ehtiyac yoxdur. Elə bir az “sandığın ağzını açsalar”, əməlli- başlı peşəkar ordu yaratmaq mümkündür. Bu kimi məsələlərdə həm də səmimiyyət ortaya qoymaq olarsa, yaxşı bir ordu qurmaq imkanına sahibik. Bizim xüsusi təyinatlı hazırlayan yaxşı bir mərkəzimiz var. Onları orada hazırlayıb yeni bir birlikləri formalaşdırmaq olar. Çünki peşəkar ordu olmadan müharibəni udmaq imkanlarımız xeyli çətinləşir. Çünki söhbət dağlıq ərazidə döyüşlərdən gedir. Ona görə də onların hamısını dağlıq şəraitində döyüşlərə hazırlamaq lazımdır. Belə bir varianta getsək və tam arxayın olandan sonra ki, bütün cəbhə boyu bizim məhz peşəkar qüvvələrimiz məsələni həll edəcək, o zaman problem olmaz. Diqqət etsəniz, aprel döyüşlərinin ilkin mərhələsində bizim xüsusi təyinatlılar əsas mövqeləri götürmüşdülər. Amma göründüyü kimi, mövqeni götürmək kifayət deyil, qüvvə çox olmalıdır ki, tutulan mövqeləri qoruyub saxlaya bilsin. Bu baxımdan, belə bir variant üzərində düşünməyin vaxtıdır”.

“Fürsət yaranıb, torpaqları ala bilərik”

Azərbaycan Demokrat Partiyasının (ADP) sədri Sərdar Cəlaloğlu isə bildirib ki, fürsət yaranıb, Qarabağı ala bilərik:

“Yəni Azərbaycanda bu gün 55 min adam könüllü şəkildə orduya getməyə hazırdır. Türkiyə özünün bütün hərbi sənayesini Azərbaycanın ixtiyarına verib. Pakistan da dəstək verir. Rusiya-erməni ittifaqına qarşı çox böyük bir parlaq qələbə çala bilərik”.

Gundemxeber.Az