Mühafizəkar çevrələrə bağlı “The Washington Times” qəzeti sabahkı seçkilərlə bağlı geniş təhlil verdi: “Demokratiya çatışmır, ancaq Əliyevsiz də mümkün deyil”

Azərbaycanda sabah keçiriləcək prezident seçkiləri belə görünür ki, ölkə ictimaiyyətindən daha çox Qərb dairələrini maraqlandırmaqdadır. Virtualaz.org xəbər verir ki, Birləşmiş Ştatların mühafizəkar çevrələrə, Pentaqona və kəşfiyyata yaxınlığı ilə tanınan “The Washington Times” qəzeti bu siyasi hadisəyə dair geniş təhlillə çıxış edib.

Təhlildə göstərilir ki, Azərbaycan Birləşmiş Ştatların bölgədəki sadiq strateji tərəfdaşı olaraq qalır, lakin ölkə ziddiyyətlər burulğanındadır. Bir tərəfdən, İlham Əliyevin idarəçiliyi ölkənin iqtisadi inkişafı ilə müşayiət olunur, o biri tərəfdən isə demokratiya ilə bağlı cidd problemlər hökm sürür.

Qəzet yazır ki, getdikcə daha çox qütbləşən dünyada Xəzər dənizinin sahilində yerləşən, Rusiya və İranın arasında sıxışmış Azərbaycan Amerikanın etibarlı müttəfiqi olaraq qalır. Azərbaycan Əfqanıstandakı Amerika qoşunları üçün kritik əhəmiyyətə malik dəhliz verir. Buna baxmayaraq amerikalıların əksəriyyəti bu ölkənin adını düzgün tələffüz edə və xəritədəki yerini göstərə bilməz.

“Azərbaycan həmçinin müsəlman-şiə ölkəsi olmasına baxmayaraq Tehranın teokratiyasını dünyəvi idarəçilik qarşısında rədd edir, İsraillə dostluq münasibətlərini genişləndirir. O, həmçinin sosialist iqtisadiyyatının yerində sürətlə inkişaf edən neft hasilatı sənayesinin hesabına güclü iqtisadiyyat quran ölkədir” - deyə qəzet yazır.

“Bütün bunlar Azərbaycanda sabah keçiriləcək prezident seçkilərini ABŞ-ın diplomatik, kəşfiyyat və hərbi dairələrinin diqqət mərkəzinə çevirib. Baxmayaraq ki, dəyişiklik gözlənilmir və prezident İlham Əliyevin böyük fərqlə üçüncü müddətə seçiləcəyinə şübhə yoxdur” - deyə məqalədə vurğulanır.

Pentaqonun keçmiş rəsmi nümayəndəsi, hazırda “American Enterprise İnstitute”da rezident-alim olan Maykl Rubin qəzetə şərhində Azərbaycanın ABŞ üçün geosiyasi əhəmiyyətindən danışaraq bildirir ki, əgər Azərbaycanın bu qədər təbii sərvətləri olmasaydı və bu dərəcədə mühüm geosiyası mövqedə yerləşməsəydi, amerikalılar üçün heç də böyük maraq kəsb etməyəcəkdi. M.Rubin ABŞ-la Azərbaycan arasındakı münasibətlərin bir neçə sahəni əhatə etdiyini bildirir. Onun sözlərinə görə, Azərbaycan Qərbmeylli mövqeyini dəyişdirsə, Amerikanın regiondakı nüfuzuna və mövqelərinə ciddi zərbə dəyəcək.

“Ona görə Azərbaycanda siyasi stabillik Amerikanın strateji maraqlarına uyğundur” - deyə Rubin bildirir.

Qəzet yazır ki, bu maraqlar Obama administrasiyasının Azərbaycanda insan haqları problemlərinə qarşı narahatlıqları arxa plana keçirməsində əsas rol oynayır. Məqalədə Azərbaycanda insan haqlarına dair problemlər sadalanır, müxalif fəalların təqib olunmasından, seçkiqabağı mühitdən bəhs olunur. Bildirilir ki, ABŞ Azərbaycana münasibətdə demokratiyanı stabilliyə güzəştə getmək siyasətini yeridir.

“Mən deməzdim ki, Əliyev demokratdır. Digər tərəfdən, onun mənfi tərəfi demokratiyanın çatışmazlığındadırsa, müsbət tərəfi iqtisadiyyatın inkişafındadır” - deyə “American Enterprise İnstitute”dan Maykl Rubin bildirir.

Onun sözlərinə görə, Azərbaycanda dayanıqlı demokratiya güclü orta təbəqə olmadan mümkün deyil və belə görünür ki, prezident Əliyev də bunu nəzərə alır.

“Əliyevin planı odur ki, əvvəlcə bu güclü orta təbəqə yaransın. Ona görə də mən bir tərəfdən əminəm ki, islahatlar lazımdır, lakin digər tərəfdən, bu islahatların hədəfə çatması üçün vaxt da lazımdır. Əks halda biz körpəni su dolu vannaya atmış olardıq” - deyə keçmiş Pentaqon rəsmisi bildirib.

Virtualaz.org