Yerevana səfər edən ATƏT-in fəaliyyətdə olan sədri, İsveçin Xarici İşlər naziri Ann Linde Qarabağ separatçılarının qondarma “xarici işlər naziri” David Babayanla görüşüb. Bu barədə erməni KİV-ləri məlumat yayıb.

Görüşdə ATƏT-in fəaliyyətdə olan sədrinin şəxsi nümayəndəsi Anjey Kasprşik, habelə Qarabağ separatçılarının Ermənistandakı "nümayəndəsi" Sergey Qazaryan da iştirak edib. Görüş zamanı Qarabağ məsələsi müzakirə edilib. Separatçılar ATƏT-in Minsk qrupu həmsədrlərinin himayəsi altında danışıqlar prosesinin bərpa olunmasının vacibliyini vurğulayıblar. Qeyd edək ki, Ann Linde İrəvana getməzdən əvvəl Azərbaycanda səfərdə olub.

O, Azərtbaycan Prezidenti İlham Əliyev və Xarici İşlər naziri Ceyhun Bayramovla görüşüb. Dövlət başçısı ATƏT sədrini qəbul edərkən münaqişənin artıq geridə qaldığını və Azərbaycanın regionda əlaqələrin bərpasına çalışdığını deyib:

“Münaqişə artıq tarixə qovuşub və biz gələcəyə baxmalıyıq. Düşünürəm ki, müharibədən sonra ötən 4 ay artıq hər iki tərəfin səhifəni bağlamaq və diqqəti gələcəyə yönəltmək iradəsini nümayiş etdirir. Bu, çox mühümdür”.

Prezident İlham Əliyev işğal altından azad edilmiş ərazilərdə artıq quruculuq işlərinə başlanıldığını deyib. ATƏT rəhbərliyi tərəflər arasında vasitəçilik missiyasını bərpa etməyə, Dağlıq Qarabağ ermənilərinə siyasi statusun verilməsi məsələsini gündəmə gətirməkdə maraqlı görünür. Lakin ölkə başçısı münaqişənin tarixə qovuşduğunu söyləməklə Dağlıq Qarabağ ermənilərinə siyasi status verilməyəcəyinə dair ATƏT-ə ciddi mesaj verdi.

Bakıdan İrəvana yola düşən xanım Lindenin Ermənistan rəhbərliyi ilə aparılan danışıqlardan sonra dayanıqlı sülhün təminatı və qarşılıqlı əlaqələrin bərpası ilə bağlı yeni mövqe ortaya qoyacağına ümid daha çox idi. Lakin onun Ermənistanda Dağlıq Qarabağdakı cinayətkar rejimin nümayəndələri ilə görüşməsi narahatlıq doğrurur. Əlbəttə, həmin görüşdə müzakirələrin birmənalı şəkildə Azərbaycanın əleyhinə getdiyini söyləmək olmaz. Qondarma rejimin nümayəndələri təbii ki, Azərbaycana qarşı ittihamlar irəli sürüb və Ann Lindeni ATƏT-in Minsk qrupunun fəaliyyətini bərpa etməyə, Dağlıq Qarabağa siyasi statusun verilməsinə inandırmağa çalışıb.

Ancaq ATƏT sədrinin onlara hansı cavabı verdiyi və mesajları çatdırdığı məlum deyil. “Atılas” Araşdırmalar Mərkəzinin rəhbəri Elxan Şahinoğlu Cebhe.info-ya açıqlamasında bildirdi ki, Azərbaycan ATƏT-dən çox nəticə gözləməməlidir. O bildirib ki, Prezident İlham Əliyev də ATƏT sədri ilə görüşdə xüsusi vurğuladı ki, Azərbaycanın əsas məqsədi yalnız işağldan azad edilmiş ərazilərin yenidən qurulması və bərpasıdır:

“Əgər bu proseslə bağlı ATƏT-in hər hansı təklifi varsa, təqdim edə bilər. ATƏT-in həmsədrləri əvvəllər də bölgəyə səfər edəndə adətən Xankəndinə səfər edib separatçıların nümayəndələri ilə görüşərdi. İndi sual doğuran daha çox başqa məqamla bağlıdır. ATƏT sədri İrəvanda qondarma rejimin nümayəndələri ilə görüşmək üçün rəsmi Bakının razılığını alıbmı? Ona görə də Azərbaycan Xarici İşlər Nazirliyi bu məsələyə aydınlıq gətirməlidir. Əgər razılıq alınıbsa, bu fikir mübadiləsi olub və narahatlığa ehtiyac yoxdur. Əgər ATƏT-in sədri Azərbaycanın razılığı olmadan bu addımı atıbsa, o halda Xarici İşlər Nazirlyi məsələyə öz münasibətini bildirməlidir”.

Politoloq hesab edir ki, ATƏT sədrinin Dağlıq Qarabağa siyasi statusun verilməsi mövzusunu Bakıda və İrəvanda aparılan danışıqlarda vacib məsələ kimi gündəliyə daxil etməsi inandırıcı görünmür:

“Xanım Linder Bakıda olarkən daha çox İsveç-Azərbaycan münasibətlərindən söz açıb. Status məsələsini daha çox erməni tərəfi qaldırır. Onlar Ann Linderlə görüşdə bir neçə dəfə status məsələsini qaldırsalar da ATƏT sədri bu mövzuya toxunmayıb. Ermənistan rəsmiləri daima bu məsləni gündəmdə saxlamağa və beynəlxalq təşkilatların qarşısında qaldırmağa çalışır. Amma bu o demək deyil ki, qarşı tərəf buna maraq göstərir. İnanmıram ki, ermənilərin rəyi nəzərə alınsın. Müharibədən əvvəl bəlkə də bu mümkün idi. Ancaq bütün dünya Ermənistan hansı vəziyyətdə olduğunu gördü. Məğlubiyyətdən sonra bütün ölkə xaos, anarxiya içərisindədir. Belə bir ölkənin mövqeyini heç kim nəzərə almaz. Dağlıq Qarabağa gəlincə, işğal olunmuş ərazilərin 80 faizini azad etmişik. Orada 20-25 min erməni yaşayır”.

Gundemxeber.Az