Dövlətimizin başçısı Ermənistana xilas yolunu göstərdi; əks təqdirdə, “Dəmir yumruq” qaçılmaz olacaq; deputat: “Azərbaycan Ermənistanı çox ciddi şəkildə növbəti dəfə cəzalandıracaq”

Azərbaycan Respublikasının Prezidenti İlham Əliyev avqustun 14-də nüfuzlu “CNN Türk” televiziya kanalına müsahibəsində Qarabağ məsələsi ilə əlaqədar qətiyyətli mövqeyini bir daha ifadə etməklə yanaşı, Ermənistana, onu himayə edənlərə yönəlik olduqca vacib mesajlarını dilə gətirdi.

Dövlətimizin başçısı bu müsahibədə Azərbaycanın Qarabağla bağlı mövqeyini tam şəkildə açıqladı. İndiyədək irəli sürdüyü şərtləri, təklifləri real vəziyyətə uyğun şəkildə bir daha dünya ictimaiyyətinə, region ölkələrinə, bölgədə maraqları olan güclərə çatdırdı. Bu müsahibə bir daha göstərdi ki, Güney Qafqazda sülh, Qarabağda əmin-amanlıq Azərbaycan Prezidenti İlham Əliyevin təklif etdiyi konsepsiya çərçivəsində mümkündür. Təkcə ona görə yox ki, o, qalib ölkənin prezidentidir, müzəffər ordunun Ali Baş Komandanıdır. Ən əsası ona görə ki, İlham Əliyevin, Azərbaycanın təklif etdiyi sülh variantı ən ədalətlidir. Burada Ermənistana böyük fürsət tanınır. “CNN Türk”ə müsahibədə bir daha Paşinyan iqtidarına, eləcə də Ermənistan cəmiyyətinə səsləniş var. Deyilir ki, mənasız iddialardan, revanşizmdən imtina edin. Ermənistana, ermənilərə həm öz gələcəkləri, həm region xalqlarının gələcəyi naminə gərəksiz, heç bir perspektivi olmayan iddialardan geri çəkilmələri təklif olunur. Əks təqdirdə, dəmir yumruğu bir daha başlarında hiss edəcəklər. Bu dəfə daha amansız və acı məğlubiyyət yaşayacaqlar. Dövlətimizin başçısı bununla həm də son aylar baş qaldıran revanşist meyillərlə bağlı da xəbərdarlığını kəskin şəkildə ifadə etdi ki, bu da bəzi müşahidəçilər tərəfindən antiterror əməliyyatlarının anonsu kimi qəbul olunur. Prezident İrəvanın silahlandırılması ilə bağlı kifayət qədər açıq danışaraq qeyd etdi ki, mövcud durumda Ermənistanı silahlandırmaq heç bir məntiqə sığmır. “Biz hələ ki bunu görmürük, müşahidə etmirik. Amma Rusiya tərəfindən bəzi açıqlamalar oldu. Bir neçə gün bundan əvvəl Rusiya müdafiə naziri Ermənistan müdafiə naziri ilə görüş zamanı söyləmişdi ki, Ermənistana Rusiya silahlarının göndərilməsi prosesi başlamışdır. Bu, çox narahatedici bir məsələdir” - deyə, dövlət başçısı bildirdi. Prezident Ermənistan müdafiə nazirinin çox məsuliyyətsiz açıqlamalar verməsinə - əgər Azərbaycan tərəfi Ermənistan sərhədini bir santimetr pozsa, o zaman onlar atəş açacaqlar, deməsinə də diqqət çəkdi və xəbərdarlıq etdi: “Yəni görünür, İkinci Qarabağ savaşı hələ ki hər kəs üçün dərs olmadı. Əgər belədirsə, biz dərsini yenidən verməyə hazırıq. Ona görə biz ümid edirik ki, Rusiya Ermənistanı silahlandırmayacaq. Çünki buna ehtiyac yoxdur”. Olduqca vacib və xalqımızın hər bir nümayəndəsinin ürəyindən xəbər verən mövqedir ki, dövlət başçımız qətiyyətlə bəyan etdi. Prezident Şuşadan Xankəndinin, Laçın dəhlizinin tam nəzarətdə saxlanıldığını, oraya daxil olan və geri dönənlərin statistikasının da Azərbaycanda olduğunu konkret rəqəmlərlə vurğuladı. Bununla da erməni revanşistlərə ağıllarını başlarına yığmağın zəruriliyi mesajını vermiş oldu. Heç şübhə yoxdur ki, bu qətiyyətli mövqenin davamı gələcək. Hər halda, Azərbaycanın qonşusu, Ermənistanın müttəfiqinin düzgün seçim etməsi bölgədə əmin-amanlığın təmin olunması baxımından mühüm rol oynaya bilər.
Deputat Ceyhun Məmmədov “Yeni Müsavat”a bildirdi ki, cənab Prezident “CNN Türk” kanalına müsahibəsində növbəti dəfə Ermənistana çox ciddi mesajlar verdi: “Ermənistan 44 günlük müharibədə baş verənlərdən ciddi nəticə çıxartmalıdır və təxribatlara son qoymalıdır! Əgər bu təxribatlara son qoymasa, dəmir yumruq yenidən işə düşəcək və bu dəfə nəticəsi daha ağır olacaq. Ermənistan müharibə barədə yox, sülh barədə düşünməlidir, vaxt azdır! Prezident müsahibədə açıq qeyd etdi ki, Azərbaycan sülh danışıqlarına hazırdır və rəsmi Bakı hesab edir ki, bölgədə sülhü və əmin-amanlığı təmin etmək üçün Ermənistan mütləq təxribatlara son qoymalıdır. Azərbaycanın qətiyyətli və prinsipial mövqeyi məlumdur. Əgər Ermənistan sülhə hazırdırsa, Azərbaycan da sülh müqaviləsini imzalamağa hazırdır. Əgər Ermənistan müharibə istəyirsə, Azərbaycan da müharibəyə hazırdır”.

Millət vəkili qeyd etdi ki, dövlət başçımızın xəbərdarlıqlarından sonra Ermənistan öz mövqeyini konkret və qəti şəkildə bildirməlidir: “Qarabağda yenidən silahlanmaya, oraya silahların gətirilməsinə son qoyulmalıdır. Əgər Ermənistan bunu etməsə, Azərbaycan Ermənistanı çox ciddi şəkildə növbəti dəfə cəzalandıracaq!” C.Məmmədov bildirdi ki, cənab Prezident sülhməramlılara və Rusiyaya da bir sıra mesajlar verdi: “Sülhməramlıların missiyası konkret olaraq bölgədə sülhün təmin olunmasına töhfə verməkdir. Onların gözləri qarşısında Ermənistan tərəfinə silahların ötürülməsi, qeyri-qanuni silahlı qüvvələrin yenidən silahlandırılması yolverilməzdir. Bu üçtərəfli razılaşma Rusiya tərəfinin vasitəçiliyi ilə imzalanıb. Bu gün də Rusiya tərəfinin vəzifələrindən biri ondan ibarətdir ki, bu prosesi yekunlaşdırsın. Əgər qeyd etdiyimiz kimi, yenidən bu təxribatlar davam etsə, Azərbaycan öz mövqeyini qəti bildirəcək və Ermənistanı çox ciddi cəzalandıracaq”.

“Atlas” Araşdırmalar Mərkəzinin rəhbəri, politoloq Elxan Şahinoğlu “Yeni Müsavat”a bildirdi ki, Qarabağda vəziyyət gərginləşdiyinə və Rusiyanın Ermənistanın və erməni separatçılarının təxribatlarına dəstəyi artdığına görə Azərbaycan Prezidenti İlham Əliyevin yığılan bu məsələlərə reaksiyasına ehtiyac var idi. Ekspertin sözlərinə görə, “CNN Türk” kanalına müsahibə verən Prezident Əliyev mesajları üçün ona görə Türkiyənin məşhur kanalını seçdi ki, Azərbaycan-Türkiyə siyasi və hərbi ittifaqının dönməz olduğunu bir daha vurğulasın: “İlham Əliyevin müsahibə zamanı Türkiyəyə də mesajı oldu. Birincisi, İlham Əliyev keçmiş illərdən fərqli olaraq, Rusiyanı ”strateji tərəfdaş" kimi deyil, sadəcə, qonşu olaraq adlandırdı və həmin qonşunun Ermənistanı silahlandırmağa davam etdiyini anlamadığını bildirdi. Azərbaycan Prezidenti sadə məntiqə toxunaraq demək istədi ki, 30 ildir Ermənistanı silahlandırdınız, nəyə nail oldunuz? Sizin Ermənistana verdiyiniz hərbi texnika məhv edildi və bu gün Bakının mərkəzində Hərbi Qənimətlər Parkında sərgilənir. İlham Əliyev Kremlə onu da xatırlatdı ki, Rusiya bundan sonra da Ermənistana pulsuz silah və hərbi texnika göndərsə, nəticə dəyişməyəcək və hərbi üstünlük yenə Azərbaycanın tərəfində olacaq. Azərbaycanın artan hərbi büdcəsi və aldığı modern silahlar da bundan xəbər verir".

Elxan Şahinoğlu: “Azərbaycan Prezidenti Ermənistan, erməni separatizmi və Rusiya haqqında fikirlərini belə yekunlaşdırdı ki, bölgədə müharibə və ya antiterror əməliyyatları istisna deyil və bəlkə də yaxın zamanlarda zərurətə çevriləcək”

E.Şahinoğlunun fikrincə, Kremlin Azərbaycan Prezidentinin xəbərdarlığını nəzərə alaraq Ermənistanı silahlandırmadan vaz keçəcəyini söyləmək mümkün deyil: “Rusiya Ermənistanı məhz ona görə silahlandırmaqda davam edəcək ki, bu ölkə Azərbaycan qarşısında tam gücsüz vəziyyətə düşməsin”. Politoloq qeyd etdi ki, Prezidentin Rusiyaya daha bir sətiraltı mesajı var idi: “”Ermənistan xalqı müharibədə məğlub olan Nikol Paşinyana parlament seçkisində yenidən səs verdi. Bu, o deməkdir ki, erməni xalqı məğlubiyyətlə barışıb. Tarixdə görünməmiş bir mənzərədir ki, məğlub edilmiş rəhbərlik yenidən xalqdan səs alır. Belə olan halda, əlbəttə ki, Ermənistanı silahlandırmaq heç bir məntiqə sığmır". İlham Əliyev bununla demək istədi ki, Nikol Paşinyan və erməni cəmiyyəti məğlubiyyətlə barışdığı halda Moskva Ermənistanı yenidən silahlandırmaqla qonşu dövləti Azərbaycanla yeni müharibəyə hazırlaşıdırır. Halbuki əgər Rusiya prezidentinin iştirakı ilə Azərbaycan və Ermənistan liderləri arasında məlum bəyanatlar imzalanıbsa, Kreml həmin bəyanatların yerinə yetirilməsində maraqlı olmalıdır. Ancaq belə deyil. İlham Əliyevin sözlərindən bəlli oldu ki, həmin bəyanatları pozan və Ermənistanı da pozuculuğa sürükləyən elə Rusiyadır". Ekspert qeyd etdi ki, İlham Əliyev minalanmış xəritələrin cəmi 25 faizinin doğru olduğunu bildirməklə də ciddi mesaj vermiş oldu: “Bu da Kremlə mesajdır ki, sizin vasitəçiliyinizi qəbul edib terrorçuları Ermənistana təhvil verdik və əvəzində xəritələrin bir qismini əldə etdik. Ancaq bəlli oldu ki, xəritələr reallığı əks etdirmir. Demək, Kremlin bu istiqamətdəki vasitəçiliyi də işə yaramadı”.

E.Şahinoğlu əlavə etdi ki, Prezident Əliyevin Laçın dəhlizi və Qarabağda nəzarətsiz qalan ərazilər barədə də fikir bildirməsi gözlənilən idi: “Çünki Azərbaycan cəmiyyətində ən çox iki sual da gündəmdədir: Azərbaycan Ordusu Laçın dəhlizini nəzarət altına alacaqmı və Qarabağdakı erməni separatçılarının tərk-silah olunması planlaşdırılırmı? Azərbaycan Prezidenti bu məsələlərə belə aydınlıq gətirdi ki, Laçın dəhlizindən nəyin daxil olduğunu, nəyin çıxdığını dəqiq bilirik, Qarabağdakı ermənilər isə Azərbaycan qanunlarına tabe olub Azərbaycan cəmiyyətinə inteqrasiya olunmalıdır. İndiki şərtlər altında Qarabağda yaşayan ermənilərin öz istəkləri ilə Azərbaycan cəmiyyətinə inteqrasiya olunacaqlarını söyləmək çətindir. Qarabağda belə düşünən ermənilər olsa belə, onlar həyatlarını riskə atıb bu haqda açıq danışmayacaqlar. Çünki başlarının üzərində silahlı separatçılar və Qarabağın Azərbaycana tabe olmasını əngəlləyən rusiyalı hərbçilər var. Qarabağ erməniləri silahlı separatçılardan və Rusiyanın himayəsindən qurtulduqdan sonra Azərbaycan qanunları ilə yaşamağa hazır ola bilərlər”. “Atlas” rəhbəri dövlət başçımızın antiterror əməliyyatlarının anonsunu etməsinə də diqqət çəkdi: “Azərbaycan Prezidenti Ermənistan, erməni separatizmi və Rusiya haqqında fikirlərini belə yekunlaşdırdı ki, bölgədə müharibə və ya antiterror əməliyyatları istisna deyil və bəlkə də yaxın zamanlarda zərurətə çevriləcək. Bunu Prezidentin müsahibə zamanı işlətdiyi cümlələr də göstərirr: ”Biz qabaqlayıcı tədbirlər görəcəyik", “erməni faşizmi baş qaldırmağa cəhd edərsə, biz onun başını bir daha əzəcəyik”, “İkinci Qarabağ müharibəsindəki məğlubiyyət onlara dərs olmayıb” və “yeni hədəfimiz qələbəni və zəfəri möhkəmləndirməkdir”".

E.Şahinoğlu Prezident İ.Əliyevin müsahibədə yeni format təşəbbüsünü irəli sürdüyünü də xatırlatdı: “”Cənubi Qafqazda Azərbaycan, Gürcüstan, Ermənistan arasındakı üçtərəfli əlaqələrin yaradılması üçün ilkin addımlar atılmalıdır, biz buna hazırıq". İlham Əliyev bu cümlə ilə Rusiyanın müdaxiləsi olmadan Ümumiqafqaz evinin qurulması gərəkliyinə işarə edib. Misal üçün, Nikol Paşinyan İlham Əliyevlə görüşə hazır olduğunu bildirib. Bu görüşün Gürcüstan prezidentinin vasitəçiliyi ilə Tiflisdə keçirilməsi Ümumqafqaz evinin yaradılması baxımından ilk addım ola bilər. İlham Əliyev müsahibədə Azərbaycan-Türkiyə siyasi və hərbi ittifaqının dönməz olduğunu bir neçə dəfə vurğuladı, Şuşa Bəyannaməsinin müttəfiqliyin zirvə nöqtəsi olduğunu xatırlatdı. Ancaq İlham Əliyev Türkiyə haqqında danışarkən ilk dəfə müttəfiqliyə təhlükənin varlığı haqqında da fikir söylədi: “Boşluq olmamalıdır, ara olmamalıdır ki, kimsə bu araya girməsin. Çünki elələri də var. Çalışacaqlar ki, aramıza girsinlər, çalışacaqlar ki, provokasiyalar, təxribatlar, uydurmalar ortaya atılsın”. İlham Əliyev haqlıdır. Azərbaycan müstəqilliyi qazandıqdan bu yana Türkiyə ilə münasibətləri gərginləşdirmək istəyənlər hər zaman olub. Onlar həm kənarda, həm də içəridədirlər".

Təsadüfi deyildi ki, Prezident qardaş Türkiyə ilə müttəfiqliyimizdən, Şuşa Bəyannaməsindən, Cümhurbaşqanı Ərdoğanın Azərbaycana dəstəyindən məmnunluqla bahs etdi və yanğınların söndürülməsində Azərbaycan tərəfinin iştirakından bəhs etməklə birliyimiz və qardaşlığımızın əbədi olduğunu vurğuladı. Bu mənada erməni terrorizminin qalıqlarını məhz etmək üçün də Şuşa Bəyannaməsinin konkret müddəalarına istinadən birgə qərarlar verilə bilər.

Məhz dövlət başçımızın açıq və qətiyyətli fikirlərinin ardınca müdafiə naziri Zakir Həsənovun Türkiyə səfəri barədə məlumatın yayılması da tamamilə məntiqəuyğundur. Ermənistan yenə də sərhəd boyunca atəşkəsi pozur, Qarabağdakı terrorçular da dinc oturmur. Deməli, Müttəfiqlik Müqaviləsinə istinadən təcili məsləhətləşmələr, birgə addımların atılması istisna deyil.../musavat.com/