Şuşa Bəyannaməsinin Azərbaycan və Türkiyə prezidentləri tərəfindən ratifikasiya edilməsi Ermənistanı növbəti dəfə silkələdi. Gundemxeber.az “Yeni Müsavat”a istinadla bildirir ki, bu dəfə parlamentdə təmsil olunan müxalif “Hayastan” fraksiyası Paşinyan hakimiyyətini Şuşa Bəyannaməsinə qarşı sakit dayanmaqda ittiham edib.

Deputat Andranik Tevanyan bildirib ki, bu bəyannamə Ermənistanın varlığını təhlükə altına alır. O əlavə edib ki, rəsmi Ankaranın Ermənistanla münasibətlərin normallaşdırılması çıxışlarına inanmır və İrəvanın bu bəyannaməyə qarşı adekvat reaksiyası olmalıdır. Tevanyan Şuşa Bəyannaməsi ilə bağlı “Hayastan” fraksiyasının bəyanat imzaladığını və parlamentdə müzakirəyə çıxarılması üçün müraciət edəcəyini bildirib.

Daha sonra, Ermənistan mediasının rəsmi qaynaqlara əsasən yaydığı məlumatda bildirilib ki, Şuşa Bəyannaməsi 23 fevralda Ermənistan parlamenti tərəfindən müzakirə olunacaq və bu, gündəliyə salınıb. Deputatın söz açdığı bəyanatda isə bildirilir ki, Şuşa Bəyannaməsi Türkiyə-Azərbaycan hərbi-siyasi birliyini “bir millət, iki dövlət” anlayışı çərçivəsində yekunlaşdırdı. Bəyanat müəllifləri Şuşa Bəyannaməsinin Ermənistan üçün qəbuledilməz olduğunu vurğulayırlar.

Bəzi müstəqil siyasi ekspertlər isə düşünür ki, Ermənistanın siyasi isteblişmenti Şuşa Bəyannaməsini ciddi təhlükə kimi qəbul edirlər, Rusiyanın ətəyindən daha möhkəm yapışmağı çıxış yolu kimi görürlər. Yeri gəlmişkən, Ermənistanın İttifaq Partiyasının lideri Tiqran Urixanyan ölkəsinin Rusiya ilə ittifaq dövləti qurması təklifi ilə çıxış edib. O bildirib ki, bununla Ermənistan Rusiyanın tərkibinə keçməyəcək, sadəcə, dövlətlərarası ittifaq yaradılacaq. Bununla da Ermənistan BMT üzvü, ordusunu gücləndirən və xarici siyasət yürüdən suveren, müstəqil ölkə olaraq qalacaq.

Yada salaq ki, bugünlərdə Rusiyadan ekspert və jurnalistlərdən ibarət bir qrup İrəvana gedib. Onlar Ermənistanın rusiyameylli dairələri ilə intensiv görüşlər keçirir, Ermənistan-Rusiya əlaqələrinin yaxşılaşması yollarını müzakirə edirlər. Habelə məlumat var ki, bu görüşlərdə yeni Rusiya - Ermənistan ittifaq dövləti ideyası da yeridilir və rusiyapərəst erməni dairələrinə öz çıxışlarında bu ideyanı cəmiyyətə yeritmək təlqin edilir. Ermənilər Şuşa Bəyannaməsindən niyə belə ehtiyat edirlər? Moskva Ermənistanın forpost statusundan “ittifaq dövlətin tərkibinə” qoşulmasına necə baxa bilər? Şuşa Bəyannaməsi və Azərbaycan - Türkiyə ittifaqından “xoxan” düzəltmək kimlərin marağındadır? Paşinyan hökuməti özünü elə göstərir ki, sanki bu birlikdən narahat deyillər, bəs, əslində necədir? Niyə müxalifət məhz bu bəyannamədən belə təşvişə düşüb? Bu, Moskvadakı dairələrin erməni müxalifətinə növbəti “ev tapşırığı” ola bilərmi?

Məlumdur ki, Türkiyənin bölgədə varlığı, Qarabağda atəşkəsə Monitorinq Mərkəzində təmsilçiliyi, Şuşa Bəyannaməsi, Hadrutda açılan “Komandos” briqadalarında xidmət edən hərbçilərimizin türk hərb kursunu keçməsi Ermənistanı narahat etməyə bilməz. DİA.AZ xəbər verir ki, Ankara Universitetinin professoru Toğrul İsmayılın “Yeni Müsavat”a bildirdiyinə görə, bu cür çıxışlar antitürk paranoyasıdır: “Ermənistanda rus hərbi bazaları var, Rusiya ilə bu şəkildə özləri də müqavilə bağlayıblar, ortaq ordu qurublar, ancaq Azərbaycan heç zaman gələcəyimiz üçün təhlükə adlandırmayıb. Ümumiyyətlə, hər ölkə öz gələcəyini qurur. Bu da Ankara-Bakı arasında hərbi müttəfiqliyin güclənməsidir, üçüncü ölkəyə yönəlməyib. Sadəcə, üçüncü tərəf hücum edərsə, qarşılıqlı dəstək verilməsi nəzərdə tutulur. Əgər Ermənistan işğalçı addımlar atarsa, əlbəttə, bu bəyannamə onlar üçün problem olacaq”.

T.İsmayıl hesab edir ki, hər şey ermənilərin öz xislətindən irəli gəlir: “Başqalarını özləri kimi görürlər. Azərbaycan öz tarixi torpaqlarını istəyə bilər, amma etməyib, beynəlxalq hüquqa hörmət qoyub. Ona görə Rusiya ilə ittifaq qurmasını istəsə, öz işidir. Onsuz da Ermənistan KTMT üzvüdür, Avrasiya İttifaqı Birliyində təmsil olunur, Rusiya ilə münasibətləri sıxdır, istənilən qərarı da verə bilərlər. Hər bir dövlət müstəqil qərarını açıqlaya bilər. Məncə, ermənilərin hər fikrinə reaksiya vermək doğru deyil. Necə deyərlər, ”it hürər, karvan keçər" məsələsi..."

Türkiyədə yaşayan təhlükəsizlik məsələləri üzrə ekspert Abdulla Ağarın sözlərinə görə, Şuşa Bəyannaməsi ilə iki qardaş ölkə arasında birliyə möhür vurulub. Onun fikrincə, bu da erməniləri narahat etməlidir: “Hər hansı təhlükə, hərbi təhdid olanda Türkiyə və Azərbaycan bir-birinə hərbi anlamda dəstək verəcək. Bunun erməniləri həyəcanlandırması normaldır. Ona görə ermənilər ”nə etmək lazımdır" barədə düşünürlər və Rusiya ilə ittifaq təklifi irəli sürürlər. Olsun, amma bu ittifaq onlara nə qazandıracaq? Odur ki, ermənilər müharibədən sonra böyük bir sancı keçirir, üstəlik, Şuşa Bəyannaməsi onların ehtiraslarını öldürməkdədir, “Böyük Ermənistan” xəyallarını puça endirməkdədir. Təbii ki, bu birlik erməniləri narahat edir, amma sülh içində yaşamaqdan başqa çarələri yoxdur, həm Türkiyə, həm Azərbaycana yönəlik sərsəm iddialarından əl çəkməlidirlər".

Bakı Politoloqlar Klubunun rəhbəri Zaur Məmmədov qeyd etdi ki, Rusiya tərəfindən idarə olunan müxtəlif dairələr, söhbət müxalif təşkilatlar və ictimai fəallardan gedir, onlar artıq Ermənistan-Rusiya ittifaqı ilə bağlı aydın şəkildə çıxış etməkdədirlər: “Rusiya bundan əvvəl Belarus, ardınca Qazaxıstanda inteqrasiya üçün xeyli işlər gördü. Qazaxıstanda son baş verənlər göstərdi ki, türkdilli ölkələrin Çinə inteqrasiyasının qarşısı bir qədər alındı. Məlum məsələdir ki, Rusiya postsovet məkanına daxili maraqları kontekstində yanaşır. Bu qəbildən əminliklə deyə bilərik ki, növbəti hədəflərdən biri Ermənistanla ittifaqı gücləndirməkdir. Ona görə Ermənistanda bu kimi çıxışlar bəhanədir, əmr onlara şimaldan gəlib”.

GUNDEMXEBER.AZ