Səlim Müslümov Füzuli Ələkbərovun kadrlarının keçmiş fəaliyyətini təftiş etməyə başlayıb; araşdırmalardan sonra materialların Korrupsiyaya Qarşı Mübarizə İdarəsinə göndərilməsi gözlənilir
Əmək və əhalinin sosial müdafiəsi naziri Səlim Müslümov sabiq nazir Füzuli Ələkbərovun kadrlarını nazirlik strukturlarında təmizləməkdə davam edir. Sabiq nazirin əsas kadrlarının yerləşdiyi Tibbi Sosial Ekspert Komissiyalarında (daha çox VTEK adı ilə tanınır) “təmizlik işlərinə” xüsusi önəm verilir. Ekspert komissiyaları sədrləri təkcə vəzifələrini yox, həm də azadlıqlarını itirmək qorxusu ilə üzləşiblər. Bu barədə “Yeni Müsavat”a nazirlikdəki mənbələrdən məlumat daxil olub.

Mənbənin məlumatına görə, S.Müslümov əlillik dərəcələrini müəyyən edən Tibbi Sosial Ekspert Komissiyalarının fəaliyyətini araşdırmaq üçün xüsusi göstəriş verib. Araşdırma indiyə qədər komissiyalardan daxil olan şikayətlər əsasında aparılır. S.Müslümov araşdırmanın gedişinə şəxsən nəzarət edir və təftişçilərə bu məsələdə kompromissiz mövqe tutmağı tapşırıb. Nazir eyni zamanda ünvanlı sosial yardımların verilməsindəki neqativ halların araşdırılmasına da göstəriş verib. Bir neçə gün öncə keçirilən iclasda ünvanlı sosial yardımların təyin olunması və ödənişdə neqativ hala yol verilməməsi və şəffaflığın təmin olunması xüsusi müzakirə edilib. Nazirliyin bir neçə yerli şöbəsinin rəisi iclasdaca işindən kənarlaşdırılıb, bir neçə Tibbi Sosial Ekspert Komissiyasının sədrinə ciddi xəbərdarlıq edilib.

Mənbənin məlumatına görə, iclasda işdən kənarlaşdırılan nazirliyin Şamaxı şöbəsinin rəisi olub. İclasın gedişindən S.Müslümov onu ayağa qaldıraraq möhkəm danlayıb və artıq işdən çıxarıldığını deyib. Ünvanlı sosial yardımların ayrılması ilə bağlı şikayətlər üzrə Şamaxı “lider” olub. Ona görə də S.Müslümov ilk olaraq nazirliyin Şamaxı şöbəsinin rəisini işdən çıxarıb. Bunun ardınca S.Müslümov sabiq nazir F.Ələkbərovla qohumluq münasibəti olan nazirliyin Şamaxı şöbəsinin rəisinin fəaliyyətini araşdırmaq göstərişini verib.

Mənbənin iddiasına görə, iclasda Səlim Müslümov Ağdam-Ağcəbədi rayonlarını əhatə edən 22 saylı Tibbi Sosial Ekspert Komissiyasının sədri Ələmdar Quliyevi kəskin tənqid edib. Keçmiş nazir Füzuli Ələkbərova yaxınlığı ilə seçilən Ə.Quliyev barədə nazirliyə çoxsaylı şikayətlər daxil olub. Ancaq nazirlə şəxsi yaxınlığı ona toxunulmazlıq statusu verib. Ancaq indi situasiya dəyişib və yeni nazir Tibbi Sosial Ekspert Komissiyasında ciddi yoxlamaların aparılması barədə göstəriş verib. Onun çoxlu sayda saxta əlillik dərəcəsi verməsi barədə iddialar var.

30gün.az saytının məlumatına görə isə iclasda tənqid atəşinə tutulan Ə.Quliyev qəfildən özünü pis hiss edib və yerə yıxılıb. Həmkarları təcili yardım çağırmağa məcbur olublar.
Mənbənin məlumatına görə, S.Müslümovun köhnə kadrları işdən çıxartmaqla kifayətlənməyib, onların fəaliyyətini araşdırması onların həbsinə hazırlıq xarakteri daşıyır. Araşdırmalar tam başa çatandan sonra materiallar Baş Prokuror yanında Korrupsiyaya Qarşı Mübarizə İdarəsinə göndəriləcək. Bu o deməkdir ki, F.Ələkbərovun kadrlarını həbs təhlükəsi gözləyir. Bu həm də sabiq nazirin özünə qarşı yönələn bir addımdır. Görünür, sabiq nazir hakimiyyətlə tam halallaşmayıb.