Son vaxtlar bir sıra informasiya vasitələrində Müdafiə Nazirliyinin bir qrup rəhbər işçisinin məcburi məzuniyyətə göndərilməsi ilə bağlı xəbərlər yayılıb.

Həmin məlumatlarda deyilir ki, rəhbər heyətin məcburi məzuniyyətə göndərilməsi onların guya vəzifələrindən uzaqlaşdırılmasına və ordu sıralarından xaric olunmasına hazırlıqla bağlıdır. Guya onlar məzuniyyətdən qayıtdıqdan sonra istefaya göndəriləcəklər.

Virtualaz.org saytı hərbi qaynaqlardan bununla bağlı fərqli məlumatlar əldə edib. Həmin məlumata görə, bu xəbərlərin heç bir əsası yoxdur.

“Müdafiə Nazirliyinin rəhbər heyətində təmsil olunan şəxslər doğrudan da hissə-hissə məzuniyyətə göndərilir. Amma bu məzuniyyət məcburi deyil, yəni o, illik məzuniyyət planına uyğun şəkildə həyata keçirilir. Yeni müdafiə naziri Zakir Həsənov bu vəzifəyə təyin olunandan sonra şəxsi heyətin məzuniyyətə çıxması məsələsinə də həssaslıqla və diqqətlə yanaşır. Onun əsgər və zabit heyəti ilə maraqlanması, cəbhə bölgəsində yerləşən hərbi hissələrə səfərləri, şəxsi heyətə həssaslıqla yanaşması, problemlərinin həllinə diqqət göstərməsi göz qabağındadır. Bu da şəxsi heyət tərəfindən müsbət qarşılanır. Nazir Zakir Həsənov rəhbər heyətin də qanuna uyğun olaraq illik məzuniyyət hüququndan istifadə etməsinin zəruri olduğunun bildirib. İndiki məzuniyyətlər də bununla bağlıdır” - deyə mənbə bildirir.

Xəbərdə o da qeyd olunur ki, məhz bu səbəbdən nazirliyin bütün rəhbər heyətinin dekabrın sonuna qədər bu il üçün nəzərdə tutulan illik məzuniyyət hüquqlarından istifadə etməsi üçün hissə-hissə məzuniyyətə göndərilməsinə başlanılıb. Nazirliyin rəhbər heyəti, idarə rəisləri, generallar bu hüquqlarından istifadə edəcəklər.

Mənbəmiz onu da bildiir ki, illik plana uyğun olaraq məzuniyyətə göndərilən rəhbər heyətin heç bir üzvünə qayıtdıqdan sonra vəzifəsi ilə vidalaşacığı ilə bağlı xəbərdarlıq edilməyib: “Buna görə də rəhbər heyətin məzuniyyətə göndərilməsi generalların “vurulması” yox, onlara bir çox hallarda arxa planda qalan məzuniyyət hüququndan yararlanmaq imkanlarının açılmasıdır”.