Brüsseldə Azərbaycan Prezidenti İlham Əliyevlə Ermənistan baş naziri Nikol Paşinyan arasında baş tutan növbəti 4-cü görüş əvvəlkilərdən daha məhsuldar olması ilə seçilib. Bunu Avropa İttifaqı Şurasının Prezidenti Şarl Mişelin üçtərəfli görüşün yekunlarına dair mətbuata verdiyi bəyanatından görmək olar.

Onun bildirdiyinə görə, Brüssel görüşündə Azərbaycan-Ermənistan sərhədlərinin delimitasiyasına dair bütün məsələlərlə bağlı əldə olunmuş irəliləyişlərin və sabit vəziyyətin daha yaxşı təmin edilməsi nəzərdən keçirilib:

"Müzakirələrimiz Cənubi Qafqazda baş verən son hadisələr və Aİ ilə hər iki ölkə arasında münasibətlərə yönəldi. Mübadilələrimiz açıq və məhsuldar oldu. Gündəliyimizdəki bütün məsələlərə baxdıq. Son görüşümüz zamanı əldə olunmuş razılaşmaların irəliyə aparılması üçün kifayət qədər addımların atıldığını görmək müsbət haldır.

Bu gün biz Ermənistan və Azərbaycan arasında dövlətlərarası münasibətləri tənzimləyən sülh müqaviləsi üzrə irəliləyiş üçün əsaslı işi gücləndirməyə razılaşdıq və xarici işlər nazirlərinə bir ay müddətində mətn layihələri üzərində işləmək üçün görüşməyi tapşırdıq.

Həmçinin humanitar məsələlər, o cümlədən minaların təmizlənməsi, saxlanılan şəxslər və itkin düşənlərin taleyi ilə bağlı ətraflı müzakirələr apardıq. Biz sərhədin delimitasiyası və sabit vəziyyətin ən yaxşı şəkildə necə təmin edilməsi ilə bağlı bütün məsələlər üzrə irəliləyişi nəzərdən keçirdik. Razılaşdıq ki, Sərhəd Komissiyalarının növbəti iclası noyabrda Brüsseldə keçirilsin".
Ətraflı
Şarl Mişel onu da bildirib ki, hər iki tərəfin əhalini uzunmüddətli davamlı sülhə hazırlaması vacibdir.
"İctimai mesajlaşma bu baxımdan kritikdir. Belə həssas bir vəziyyətdə ictimaiyyətə deyilən hər bir söz açıq şəkildə qarşı tərəfdə dinlənilir və ölçülür.
Aİ həm də hər iki ölkənin və onların əhalisinin rifahı naminə iqtisadi inkişafın irəliləyişinə təkan verməyə davam edəcək. Biz noyabrın sonuna qədər bu formatda yenidən görüşməyə razılaşdıq”. Gundemxeber.az-ın məlumatına görə, Qaynarinfo-ya açıqlamasında Brüssel görüşünün nəticələrini bölüşən sabiq xarici işlər naziri Tofiq Zülfüqarov bildirir ki, bu son görüş siyasi iradənin olduğunu göstərsə də, amma hələlik ciddi nəticələr olmadığını da ortaya qoydu:
"Şarl Mişelin bu bəyanat göstərir ki, Avropa İttifaqı rəhbərliyində prosesi davam etdirmək üçün siyasi iradənin nümayişi hiss olunur. Prosesin hansı formanı alacağı isə, hələ ki, bəlli deyil. Görüşdən sonra Azərbaycan Prezidentinin köməkçisi Hikmət Hacıyevin bəyanatında da göstərilir ki, məsələlər bölünüb. Qarabağ mövzusu Azərbaycanın daxili siyasətinə aid olan bir mövzudur. Ona görə də Avropa İttifaqının bu istiqamətdə göstərdiyi təşəbbüs və fəallığını regiondakı postkonflikt münasibətlərin həll olunmasına yönəldə bilər. Siyasi iradə var. Amma hələlik ciddi nəticələrin olduğunu da görə bilmirik. Ümumi nəticələr bundan ibarətdir”.

GundemXeber.Az