Bu gün Sloveniyanın Maribor şəhərində gənclər arasında cüdo üzrə Avropa çempionatına start verilib.

Azərbaycan Cüdo Federasiyası xəbər verir ki, yarışın ilk günündə Azərbaycan milli komandasının 13 üzvü tatami üzərinə çıxıb. Yığmamız böyük uğur qazanaraq aktivinə 6 medal yazdırıb.
Ölkəmizi təmsil edən Kəramət Hüseynov (60 kq) və Hidayət Heydərov (73 kq) bütün rəqiblərindən üstün olaraq Avropa çempionatının qızıl medallarına sahib olublar.
Rəşxan Baxışəliyev (55 kq) və Murad Fətiyev (73 kq) yalnız finalda rəqiblərinə üstünlüyü əldən verərək gümüş medallara sahib olublar.
Xanım cüdoçularımızdan Gültac Məmmədəliyeva (48 kq) və Nəzakət Əzizova (52 kq) isə çempionatın bürünc medallarını qazanıblar.
Bununla da, Avropa çempionatının ilk günündə 6 medal – 2 qızıl, 2 gümüş və 2 bürünc qazanan millimiz mötəbər turnirin ilk pilləsində qərarlaşıb.
Qeyd edək ki, 41 ölkədən 402 idmançının (222 oğlan, 180 qız) mübarizə apardığı mötəbər turnirdə Azərbaycan milli komandası 16 cüdoçu (10 oğlan, 6 qız) ilə təmsil olunur.