Gundemxeber.az xəbər verir ki, "Neftçi” fanatı Qaynarinfo-ya açıqlamasında həm bunların səbəbi, həm də komandanın düşdüyü vəziyyətlə bağlı fikirlərini bildirdi:

"Səbəbi yoxdur. Biabırçılıq, fiasko. Əslində komanda derbidə rəqibinə 0:4 hesabı ilə uduzursa, ona cavabdehlik daşıyanlar istefa verib getməlidir. Böyük dəyişikliklər olmalıdır. İndi təzə bəhanə tapıblar, tənqid edəndə deyirlər ki, "kimin günahı varsa, sübut elə”. Bu, xalqın, dövlətin klubudur, dərəbəylik deyil ki, istədiyini edəsən. İnsanları bu kluba gətirirlər ki, vətəninə, futboluna xidmət eləsin. Komanda 0:4 hesabı ilə uduzub, sanki belə olmalıymış kimi davranırlar. Müşahidə şurasından məşqçiyə söz deyirlər, o da çıxır, yerli futbolçunu yerə vurur. Klubda problem var, çıxsın bir nəfər açıqlasın. İdarəetmədə, baş məşqçidə, futbolçularda da problem var. Şəxsi fikrimizdir, klubda media sahəsində olanlardan başqa bütün çalışanların problemi var. İşlər qaydasında deyil”.

"Hər kəsə ünvanlayırdıq. Bu flaqmandır. Üç oyun ardıcıl məğlub olursa, "istefa” sözümüz hər kəsə aiddir. Bəyanat da yaymışıq ki, komandanı düzəltsinlər. "Neftçi” elə bir camiədir ki, bir-iki qələbə ilə baş aldatmaq olmaz. Çempionluq qazanmaq asandır, onu qoruyub saxlamaq çətin. Çempionluq qazanmaq hər şeyin həll olması demək deyil. Biz yay aylarından, hətta Tbilisi "Dinamo”sunu bərbad oyunla keçəndə belə deyirdik ki, çatışmayan cəhətlər var. Samir Abasov çıxıb mətbuat konfransında nağıl danışır. Deyir ki, azarkeşin sözü ilə əvəzləmə etdik. Halbuki azarkeş qrupunun rəhbəri deyir ki, komandaya daha üstün futbolçular gətir, bunu niyə etmirlər? Bura nağıllar aləmi deyil, dədələrimizdən bizə miras qalan, dövlət tərəfindən maliyyələşən peşəkar klubdur. 0:4 hesabı ilə uduzursan, deyirsən ki, rəqib güclüdür. Bundan sonra kim səni qəbul edər? Rəqiblərin hamısı bizim üçün önəmlidir. Həmin sözləri deyən Abasova bizim qədər sahib çıxan, arxasında dayanan olmayıb. Fikirləşirdik ki, hamıdan fərqlidir, komandanı düzəldəcək. Bir çempionluqla heç nə düzəlmir. Pis günlərdə komandanı vəziyyətdən çıxarmaq lazım idi. Yerli oyunçunu aşağılamaq olmaz. Əvvəla, özününkünün qədrini bil ki, legioner baxıb utansın”.

"Rəhbərliyin Mirabdulla Abbasovla bağlı qərarlarını gözləyirik. Əvvəl belə bir hörmətsizliyi Katalin Tira etmişdi. Dərhal komandadan uzaqlaşdırdılar. O gün də Mirabdulla Abbasov eyni hərəkətə yol verdi. Biz elə bir azarkeş qrupuyuq ki, hər şeyi düzgün qiymətləndiririk. Lazım gələndə etirazlarımızı da etmişik. "Neftçi”ni hər oyunda son saniyəyə qədər dəstəkləmişik. Komandanın yanında olmuşuq, əl çəkməmişik. Mübarizə aparmışıq, sonda çempionluq gəlib. Komanda düzəlməlidir. Bu gün "Neftçi” 4-cü yerdə olmağa layiq deyil. Şükür Allaha, büdcə var, futbolçular maaş, pul mükafatı, üstəlik bonus da alırlar. Təhlükəsizlikləri də qorunur. Bu gün nəticə olmayacaqsa, etirazımızı bildirəcəyik, qarşılarında duracağıq”.

 

"Bizdən olsa, Mamadu Kane qalmalıdır. Onun getməsini heç istəmərik. O peşəkardır, məğlubiyyətdən sonra azarkeşlərin qarşısında nə etdiyini bütün ölkə gördü. Mamadu Mboc isə "Neftçi”yə layiq futbolçu deyil. Qapıçı mövqeyi gücləndirilməlidir. Gedib Harramiz Soaresi, Hüqo Bastonu, Romen Baskı alıblar. Nəyə lazımdır bunlar? Klubun pulunu niyə çöllə atırlar? 4-5-ci yerlər uğrunda oynayacaqdılarsa, elə akademiyanın uşaqlarını meydana buraxardılar. O pulları da klubun bazasının tikilməsinə xərcləyərdilər. Legionerlərlə yanaşı, bəzi yerlilərdən də narazıyıq. Samir Abasov bunu vaxtında fikirləşməli idi. Ən çox legioner Abasovun əlinin altındadır, sayı-hesabı yoxdur. Bunları biz fikirləşməliyik? Belədirsə, kubu versinlər bizə, idarə edək. Görsünlər idarəçilik necə olur. "Forza Neftçi”nin xırda futzal komandası var, bu gün Birinci Divizionda liderdir. Onların bildiklərini biz də bilirik. Pul çox şey deməkdir, amma hər şey deyil”.

"Bəli, bizim azarkeş qrupunun üzvü idi. Mirabdulla dilinin altında söyüş söymüşdü. Azarkeşimiz də onun üstünə hücum etdi ki, sözünü de. Bizim sizin üstünüzdə haqqımız var. Kim "Neftçi” formasının haqqını verirsə, aldığı məvacib halal olsun. Kim xəyanət edirsə, ona halallıq vermirik. Mirabdullaya görə o vaxt millinin baş məşqçisi olan Qurban Qurbanova təzyiq göstərmişik. Onun milliyə dəvət alması üçün mübarizə aparmışıq. Millidən küssək də, Abdullayevə dəstək göstərmişik. Amma bu gün tənqid olunanda bizim üstümüzə gəlir. Gəlib bizə nə edəcəksən? "Neftçi”yə canın yanırsa, çıx de ki, "klubumda altı ay məvacib almadan oynayacağam”. O zaman azarkeşlər səni çiynində gəzdirər. "Neftçi”ni azarkeşlər qədər sevirsən? Fiziki formanın ən pik nöqtəsində klubu atıb getdin. Elə bilirsən, bunlar yadımızdan çıxıb? Sadəcə, əynində "Neftçi”nin forması, qeyrətimiz, namusumuz, nəfəs aldığımız loqosu olduğu üçün sənə heç nə demirik”.