Mini-futbol üzrə Azərbaycan milli komandası Avropa Çempionu oldu. Məhz milli komanda, yığma yox. Hamısı azərbaycanlı, Azərbaycanı dəli kimi sevən, dövlət himnini bədahətən oxuyan. Bəziləri bu qələbəni kiçildir, turniri mənasız adlandırır. Bu yalnış mövqedə olanlara xatırlatmalar edim.

Mini-futbol son illərdə kifayət qədər populyarlaşan idman növüdür. Futbolun bu növünü Olimpiya Oyunlarına salmaq istəyirlər. Avropada böyük şirkətlər mini-futbola yatırım edir, böyük futbolda böyük gələcək vəd edən, amma müəyyən səbəblərdən orda oyunları alınmayan futbolçular mini-futbola yönəlirlər. Burda top qovanlar 5-10 min avro maaş alır. Əgər bir nəfər gördüyü işə görə maaş alırsa deməli həvəskar yox, peşəkardır. Bir çox liqalar demək olar ki, peşəkar kimi fəaliyyət göstərir, ildən-ilə auditoriyası artır və bunun əsas səbəbi mini-futbolun küçələrin futbolu olmasıdı. Bu gün Avropa küçələrə axışır, musiqiyə küçələrdə qulaq asır, yeməyi küçələrdə yeyir, teatr səhnəciklərinə küçələrdə baxır. Deməli küçələrin futbolu da get-gedə populyarlaşacaq. Üstəlik hələ pullarla tam çirklənməmiş futbolu axtaranlarda bura yönəlir. Məhz, bu səbəbdən mini-futbol investorlara maraqlıdı. Gələcəkdə bu idman növü daha geniş kütləni ahətə edən də, AÇ qaliblərinin adına baxanda, orda Azərbaycanın adını görəcək. Slovakiyadakı zəfərimizlə çempion adını qazanandan sonra Azərbaycanda bu sahəyə diqqət artacaq, yatırım etmək istəyən şirkətlər, sahibkarlar olacaq, böyük futbolda oyunu alınmayanlar mini-futbola gələcək, zamanla peşəkar liqa yaranacaq, hətta çox güman divizionlarda təşkil olunacaq. Nəticədə Avropa ilə bərabər bizdə də mini-futbol yerində saymayıb inkişaf edəcək, lider mövqelərimizi qoruyub saxlayacağıq. Bütün mini-futbol həvəskarlarının diqqəti çempionatımıza yönələcək, onsuzda bölgələrimizdə mini-futbol oyununa gələn azarkeş sayı, AFFA-nın təşkil etdiyi Premyer Liqanın bəzi oyunlarını izləməyə gələnlərdən daha çoxdu. Mini-futbolda yuxarıda sadaladığım bütün yaxşı işlər mütləq baş tutacaq. Ona görə ki, mini-futbol federasiyasını işini bilən və sevən peşəkarlar idarə edir. 

Slovakiyadakı turnirdə çempionluq Azərbaycan üçün iki qat qələbə idi.  Seymurun qolu tək rumınlara yox, həm də AFFA-ya vurdu. Rumıniya millisinin məğlubiyyətinə, rumınlardan çox üzülənlər var. Belə ki, Slovakiyada tarix yazan futbolçularımız Azərbaycan futbolunu məhv edənlərə hüzn yaşatdı. Elşad Quliyevin yetirmələri tez-tez eşitdiyimiz "azərbaycanlılar futbol oynaya bilmir, qanımızda yoxdur" deyiminin yalnış olduğunu göstərdilər. Bu gün "AzFar Group" işi düzgün görəndə nəticənin də mütləq gələcəyini göstərdi. Cəmi 5 il bundan qabaq yaranmış komanda, Avropadakılar kimi ayına 5-10 min qazanmayan, uzağı 300 manat alan futbolçularla, AFFA-nın büdcəsindən 100 dəfə aşağı büdcə ilə Avropanın ən yaxşısı olmağı bacardı. Bunu hər kəs əyani şəkildə gördü!

Gedin AFFA! İmkan verin sizin əvəzinizə işi bilənlər gəlsin və işləsin. Səhifənizdə təbrik statusuna gələn şərhlər isə kimin kim olduğunu göstərdi. O, şərhlər göstərdi ki, sizin əlinizdən həm futbolumuz, həm futbolsevərlərimiz cana doyub. Hətta sizin təbrik mesajınızı belə hər kəs aqressiya ilə qarşılayır. Hər dəfə uğursuzluq yaşananda sizi müdafiə edən, bu günkü qələbəni kiçiltmək istəyən trollarınıza xərclədiyiniz pulu futbolumuza xərcləsəydiz, indi nə o şərhlər yazılardı, nə də trollara ehtiyac olardı. 14 ildi rəhbərlik etdiyiniz qurum Azətbaycan üçün 1 futbolçu yetişdirə bilməyib. Siz AFFA-ya sahiblənəndə indi 22-23 yaşı olanlar, o zaman 7-8 yaşında uşaqlar idi. Yeni-yeni futbolun sirlərini öyrənirdilər. Hara xərcləmisiz milyardları? Heç bir mənası olmayan “Top festival”lara, ünvanı məlum olmayan Berlin akademiyasına, ya özünüzə süni ot örtüyü, stadionlar üçün oturacaq ticarəti ilə məşqul olan sirkətlər açmağa? Hanı o uşaqlar? Deyim hardadılar? Slovakiyada Azərbaycana Avropa Çempionluğu yaşatdılar. Qabaqlarını min cür yolla kəsdiyiniz, futbol oynamağa imkan vermədiyiniz uşaqlar indi Avropa Çempionudu. Bilirsiz niyə? Ona görə ki, işlərini peşəkar, Azərbaycanı sevən insanların əllərinə düşmüşdülər. Onları məhv edəndə qorxunc yuxularınızda belə, bir gün onların sizləri məhv edəcəyini ağlınıza belə gətirə bilməzdiniz. Bu gün sizin nəzarətinizdə olan yığma komandanın heyətinin 80 faizi milliləşdirilmiş futbolçulardı. Ölkədə Azərbaycan futbolunun yetişdirdiyi cəmi 5-10 futbolçu var. Onları da “Bakı” və “Qəbələ”nin akademiyası yetişdirib. “Bakı” və “Qəbələ”yə bu işdə kömək etməkdənsə, hər fürsətdə badalaq vururdunuz. Ölkənin 1 nömrəli komandasını əcnəbilərlə doldurduğunuz bəs deyil, ürəyiniz soyunmayıb aşağı yaş yığmalarada milliləşdirilmiş futbolçuları səpələyirsiz. Yəni, futbolumuz birdən tam məhv olmaz, qoy kökündən vurum. 

Keçirdiyiniz ölkə çempionatında 8 komanda oynayır. Onlardan 4-nə siz nəzarət edirsiz, yerdə qalanları müstəqildi. Bu ilki mövsümdə ilk "5-lik"dən 4-də yer alanlar nəzarətinizdə olmayan komandalar tutdu. İkinci yeri güc bəla ilə tutan “Neftçi”nin büdcəsi, onunla gümüş uğrunda mübarizə aparan, mövsüm ərzində dəfələrlə hakimlərin əli ilə qarşısını kəsdiyiniz “Zirə”nin büdcəsindən azı 3 dəfə çoxdur, “Sumqayıt”, “Şamax”ın büdcəsi, avrokuboklara vəsiqə qazanan “Qəbələ”dən 2 dəfə çoxdur. O qədər yarıtmaz siyasət yürüdürsüz ki, burda da uğursuzluğa düçar olursunuz. İndi isə camaatın başını guya region futbolunu inkişaf etdirməyə, “Kəpəz” və “Turan-Tovuz”u premyer-liqaya qaldırmaqla, “Keşlə”ni “Şamaxı”ya çevirib bögəyə göndərməklə, “Futbolun İnkişafı Fondu” ilə qatmağa çalışırsız. Amma artıq keçməz.

Əgər Qurban Qurbanova verilən “Şöhrət” ordeni AFFA-nı nokdauna salan xuk idisə, mini-futbol yığmamızın Avropa Çempionluğu onları nokauta salan aperkot olacaq.

Gec-tez nəsibiniz bu olacaq:  "Go,Go,Go AFFA!"

İlkin Abbasov