Neftçi futbol klubunun problemləri bitmək bilmir. Mutunun istefası nəyisə dəyişəcək deyənlər seçimində yanıldılar. Bojoviçin gəlişidə komandadı problemləri düzəltmədi. Bəs klubun  çatışmazlığı nədi? "Neftçi"nin uğursuzluğunu bir neçə hissəyə bölmək qərarın gəldim

1.Komandaya rəhbərlik futbol aləmindən olmalıdı. 

İstənilən bir komandada futbolun içində bişən, idmanın "şah"ında illərini qoyan, saç ağardan bir mütəxəssiz olmalı idi. Daha basketbol və ya gimnastika mütəxəssisi yox. Digər idman növlərindən fərqli olaraq futbol ayaqla yanaşı başla da oynanılır. Deməli, futbolda rəhbər şəxs və futbolçu da baş işlətməlidi. 

2.    Baş məşqçi seçimlərinin yanlışlığı

Heç bir uğuru olmayan bir şəxsi, özündən razı, ulduz hesab edən birini baş məşqçi qoymaq özünü  bilə-bilə yalın əl ilə tankın, topum üzərinə getməyə, intihara bənzəyirdi. Məşqçi gələrkən hamı söylədiki bu seçim uğursuzdu. Rəhbərlik inad elədi. Milyonlar havaya sovruldu. Sonda rəhbərlikdə səhvini anladı. Mutu yola salındı.

3. Uğursuz transfer siyasəti

Bir vaxtlar Kampaz kimi uğursuz transferlərlə ad çıxarmış Kamil Məmmədov yenidən iş başına keçdi. Olanare kimi meydanda tərpənə bilməyən, ağır çəkili boksçulara oxşayan, ayağı top tutmayan, tərpənə bilməyən hücumçu alındı. Bəh-bəhlə milyonlar töküldü. Sonradan məlum olduki Olanarenin dövrü çoxdan bitib. Onunlada yollar ayrıldı. Transfer pəncərəsi bağlanmasına az qalmış Lukas Melano alındı. Ayağı top tutmayan,qol duyumu zəif olan, sürəti driblinqi olmayan bir sözlə heç nəyə yaramayan Melano ehtiyat oyunçuya çevrildi. Ehtiyatda qalaraq havayı maaş almağa başladı. Mərkəzdə Fərid Yusifli, Eddi İsrafilov, Qara Qarayev, Ata Caber ola-ola Kamil Məmmədov cənablarının Cənubi Amerika sevdası bitmədi. Valdes transfer olundu. Halbuki o tip oyunçular ölkəmizdə doludu. Nəyə lazımdı belə legionerlər? 3 milyonluq Şinyaşiki alındı. Sonra məlum olduki bu oyunçunun heç 100 min manatada dəyməz. Mövqeyi hücumçu olsa da, sol vinger kimi oynadılır. Amma heç bir mövqedə faydalı deyil. 

Sönmüş Ozobiç, etibarsız Koffi, zədəyə meyilli, oyunu ümid verməyən Mirzov, əvvəlki formasında çox uzaq olan Qara Qarayev. Transfer olunandan bu yana forma geyinə bilməyən və zədədən əziyyt çəkən Emil Balayevdən danışmağa dəyməz. 

4. Bojoviçin tələsik təyinatı

Rumıniyalı yola salınıb serbiyalı mütəxəssis gətirilsə də, məlum oldu ki, komandada fiziki durum heç də yaxşı vəziyyətdə deyil. Qış toplanışı göstərdi ki, "ağ-qaralar"da hüçumçu, sağ vinger, sol müdafiəçi və "10 nömrə" problemi var. Hətta mətbuat konfranslarının birində Miodraq Bojoviç cənablarına  bu barədə sual verdim, amma cavab ala bilmədim. Əvəzində "Neftçi" sol vinger alıb sağ cinahda oynatmağı üstün tutdu. O da məlum oldu ki, həmin oyunçu heç sağ cinahda da yaxşı oynaya bilmir. Kontenin "Neftçi"yə layiq oyunçu olmasına belə şübhə edirəm. Sonra hücumçu Morena alındı. Tezliklə aydınlaşdı ki, adı çəkilən forvard zədədən qayıdıb. Neçə aylar futbol oynamayıb, formada deyil  Sonda baş məqçi transferin bitdiyini söylədi. Problemlərsə qaldı. "Qəbələ"ylə oyunda olduğu kimi Sumqayıtla qarşılaşmada da müdafiə bərbad çıxış etdi.  Müdafiənin sol cinahı iflicdi. Azər Əliyev zədədən təzə qayıtdığı üçün oyuna hazır deyil, Yuri Matias isə özünü ulduz hesab edir, Mark Tamaş isə ləngdi və  epizodlara gecikir.  Nəticədə səhvlər qaçılmaz oldu.

Sağ cinah vingeri mövqeyində Rəhman idi. O da tempə, sürətə çatdıra bilmirdi,pressinq zamanı daim top itirir. Gah Boqomolski, gah Moreno gahda Konte sağ cinah vingeri oynadı. Amma effekt olmadı. Kluba təcili sağ vinger lazımdı. Komandaya hazır formada olan hüçumçu lazımdı. "Neftçi"də problemlər böyükdü. Neftçi bu gedişlə nə ikinci olacaq nə də ölkə kubokunu götürəcək. İndidən avrokuboka əlvida deyə bilərik. 

"Neftçi" Azərbaycan futbolunun şanlı tarixidi. Klub ölkə miqyasında böyüklüyünü futbolçulara başa salınmalıdı. Onlar Neftçidə oynadıqları üçün fəxr etməli və bu klub un uğurları üçün meydanda can qoymalıdılar. Heç bir futbolçu heç bir məşqçi "Neftçi"dən artıq deyil və olada bilməz.

Ceyhun Rüstəmov