ABŞ Xüsusi Təyinatlı Qoşunlar Komandanlığının nəzdindəki dəstələrin Suriyanın şimalına daxil olduğu bildirilir.

Avropa.info xəbər verir ki, bu haqda məlumatı Amerikanın NBC News kanalı yayıb. Xəbərdə ABŞ silahlı qüvvələrinin xüsusi təyinatlı qoşunlarının komandanı Loyd Austinin Amerika xüsusi təyinatlılarının Suriyanın şimalında olduqlarını və YPG – peşmərgə orduları ilə birlikdə hərəkət etdiklərini açıqladığı bildirilir.

General Austin açıqlaması zamanı ABŞ xüsusi təyinatlılarının Suriyanın şimalına daxil olduğunu və İŞİD-ə qarşı mübarizənin davam etdiyi döyüş bölgəsində olduğunu açıqlayıb.

Kanalın məlumatında xüsusi təyinatlı dəstələrin İŞİD-ə qarşı mübarizədə PKK-nın Suriya qolu YPG-yə kömək məqsədiylə bölgəyə daxil olduğu bildirilir. Amma ABŞ ordusunun YPG ilə əməkdaşlığının detalları haqda məlumat verilməyib.

ABŞ-ın Suriyaya qoşun yeritməsinin Rusiyanın Suriyada varlığının müzakirə olunduğu bir vaxta baş verməsi isə xüsusilə diqqət çəkən bir məsələdir.

Bərzaninin Suriyada peşmərgə qüvvələrinin fəaliyyət göstərməsi tələbini qəbul etməyən PYD isə geri addım atıb.

ABŞ rəsmilərindən birinin də iştirakı ilə baş tutan üçtərəfli görüş nəticəsində peşmərgənin Suriyaya keçməsinə icazə verilib.

Peşmərgə qüvvələri Kobanidə İŞİD ilə döyüşlərdən sonra yenidən Suriyaya qayıdır. Bərzaninin nəzarətində olan ordular Suriyanın şimalında PYD-nin nəzarət etdiyi bölgələrə yerləşdiriləcək.

PYD lideri Saleh Müslim, İraq Kürd Muxtariyyətinin rəhbəri Məsud Bərzani və ABŞ Dövlət Departamentinin müşavir köməkçisi Bred Mak Gark arasında keçriilən üçtərəfli görüşdən sonra peşmərgə üçün belə bir qərar qəbul olunub.

Vüsal Əliyev