İranın yüksək rütbəli generallarının bir-birinə zidd açıqlamaları Amerika Birləşmiş Ştatlarını da çaş-baş salıb. İran silahlı qüvvələrinin baş qərargah rəisinin müavini Əli Abdullahi bildirib ki, Tehran yeni ballistik raketini 2 həftə əvvəl uğurla sınaqdan keçirib. Orta mənzilli raket hədəfin yaxınlığında, 8 metr kənarda partlayıb. Lakin çox keçməyib və ölkənin müdafiə naziri Hüseyn Dehqan Abdullahinin sözlərini təkzib edib.

gundemxeber.az atv.az-a istinadən bildirir ki, Fars agentliyinə danışan nazirin sözlərinə görə, İran ümumiyyətlə, yaxın aylarda heç bir raket sınağı həyata keçirməyib. Yaranan vəziyyət isə ABŞ-da çaşqınlıqla qarşılanıb. Ballistik raketlərin sınağını İranla qərb dünyası arasında əldə olunan razılaşmaya uyğun gəlmədiyini iddia edən Ağ Ev sözçüsü Coş Ernst çaşqınlıqlarını gizlətməyib. O bildirib ki, Vaşinqton iki fərqli açıqlamanın nədən yayıldığını araşdırır. Dövlət Departamenti də narahatdır. Qurumdan yayılan açıqlamada bildirilib ki, İslam Respublikasının məsuliyyətsiz açıqlamaları siyasi təxribatdır.