İran ictimaiyyəti prezident Həsən Ruhani və ölkənin məhkəmə sisteminin mühafizəkar rəsmiləri arasında sərt söz atışmasını izləməkdədir. Tərəflərin bir-birinə ağır korrupsiya ittihamları irəli sürməsi seçki ilinin gərgin keçəcəyindən xəbər verir.
Belə görünür ki, bu ziddiyyətlər Ruhani-nin prezident seçildiyi və ölkənin ən zəngin işadamı Babak Zəncani-nin həbs olunduğu 2013-cü ildən başlayıb.
Ötən ay Rohani-nin məhkəmə sisteminin səriştəsizliyinə eyham vurmasından sonrabu həftə mühafizəkarlar prezidenti seçki kampaniyasına xərclənmiş vəsaiti bəyan etməyə çağırıblar.



“İNSANLAR BİLMƏK İSTƏYİRLƏR”

Yanvarın 3-də Ruhani “Twitter”də yazıb ki, onun hökuməti "sayt yaradaraq, özünün bütün xərc və hesablarını açıqlamağa hazırdır". Ancaq o tələb edib ki, bunun əvəzində "məhkəmə sistemi də öz hesablarını açıqlasın".
Məhkəmə sisteminin sözçüsü bildirib ki, prezident yenidən seçilməkdən ötrü "şəffaflığa dair müzakirələrdən alət kimi istifadə edir". Parlamentin onlarla üzvü Ruhani-nin qardaşına "maliyyə korrupsiyası ittihamlarının" irəli sürülməsini tələb edib.

Dekabrda Ruhani məhkəmə sistemini mühafizəkar prezident Mahmud Əhmədinejad administrasiyası dövründə dövlətdən 2 milyard dollar oğurlamaqda ittiham olunan Zəncani-nin işində səriştəsizlik göstərməkdə ittiham edib.
"İnsanlar hələ də pulun harada olduğunu və ona kimin kömək etdiyini bilmək istəyirlər", - prezident Ruhani deyib.
Mühafizəkarların çoxu Ruhani-yə ciddi siyasi kapital qazandırmış nüvə sazişinə qarşıdır.



3 MİLYARDDAN VACİB ŞEYLƏR

Ruhani bildirib ki, Zəncani-nin işində şəffaflığın olmaması və ictimaiyyətin suallarının cavabsız qalması ölkənin "3 milyard dollardan daha vacib şeylər" itirməsi ilə nəticələnə bilər. O deyib ki, Kəşfiyyat nazirliyi bu işi məhkəməyə göndərməzdən öncə araşdırmalı idi.
Məhkəmə sisteminin rəhbəri vəzifəsi Ədliyyə Nazirliyinə tabe deyil. Bu vəzifəni tutan Sadegh Larijani yanvarın 2-də deyib ki, Zəncani Ruhani-nin seçki kampaniyasına maliyyə dəstəyi verdiyini iddia edib.

Təsdiqlənməmiş məlumatlara görə, güclü ailənin üzvü olan Larijani (onun bir qardaşı parlamentin spikeri Ali Larijanidir, digəri isə insan haqları üzrə yüksək dövlət vəzifəsi tutur) 60 özəl banka nəzarət edir. Bu bankların dövlətə məxsus maliyyə vəsaiti ilə dolu olduğu bildirilir. İranın dövlət prokuroru bildirib ki, hesablar qaydasındadır və bu vəsaitin bir hissəsinin köçürülməsindən ölkənin ali dini liderinin xəbəri olub.
“HESABLAR ŞƏFFAFDIR”

Məhkəmə sisteminin sözçüsü Gulamhossein Mohseni-Ejei Ruhani-nin “Twitter”də yazdıqlarına reaksiya verib. Yanvarın 4-də o bildirib ki, məhkəmə sisteminin hesabları "şəffafdır".
Mohseni-Ejei daha sonra bildirib ki, Ruhani-nin şəffaflıq çağırışı mayda keçiriləcək prezident seçkiləri ərəfəsində kampaniya taktikasıdır.
Mohseni-Ejei hökuməti Ruhani-nin 2013-cü il seçki kampaniyasına xərclənmiş vəsait və onun mənbəyi barədə məlumatı açıqlamağa çağırıb.
Ultramühafizəkar "Kayhan" qəzeti Mohseni-Ejei-ni, islahatyönlü "Etemad" qəzeti isə Ruhani-ni müdafiə edib.
Yanvarın 4-də 46 millət vəkili Ruhani-ni qardaşı Hossein Fereydou-nu "maliyyə korrupsiyası ittihamları" ilə məhkəmə qarşısına çıxarmağa çağırıb.
Ruhani-nin rəqibləri Fereydou-nu korrupsiyanın "gözləri və qulaqları" olmaqda ittiham ediblər.