Elxan Şahinoğlu: «Bundan sonra ordunun çevrilişə cəhd etməsi mümkün görünmür»

Məlum olduğu kimi, İstanbulun Ağır Cinayətlərə dair Məhkəməsində “Ergenokon” işi ilə bağlı saxlanılan hərbçilərə hökm oxunub.

Məhkəmənin qərarı ilə 21 müttəhim bəraət qazansa da, Türkiyə Cümhuriyyəti Baş Qərargahın keçmiş rəisi İlker Başbuğ, sabiq baş komandan Xurşid Tolon, general-mayor Vəli Kiçik, jurnalist Tuncay Özkan və Doğu Perinçekə ömürlük həbs cəzası verib. Mustafa Balbay 34 il 8 ay, Mehmet Haberal 12 il 6 ay, Sinan Aygün isə 13 il 6 ay həbs cəzasına məhkum olunublar.

Türkiyədə hər zaman nüfuzu olan orduya rəhbərlik etmiş şəxlərin ağır cəzaya məhkum edilməsi cəmiyyətdə də birmənalı qarşılanmayıb. Ekspertlər bunun ölkədə müəyyən gərginliyə səbəb olacağını da istisna etmirlər.

“Atlas” Araşdırmalar Mərkəzinin rəhbəri Elxan Şahinoğlu generallara verilən cəzaların son dərəcədə sərt olduğunu və bunun Türkiyə cəmiyyətində silkələnməyə səbəb ola biləcəyini deyib.

Ekspert bu cəzaların müsbət tərəfinin olduğunu da qeyd edib. Bundan sonra ordunun siyasi proseslərə qarışması, hər hansı çevrilişə cəhd etməsi mümkün görünmür. Ancaq bununla belə, verilən cəzalar çox sərtdir və orduda müəyyən qədər narazılığa səbəb olacaq: “Orduda generallar öz həmkarlarına qarşı bu cür cəzaların verilməsini düzgün hesab etməyəcəklər. Artıq bir general istefa verib. Bu da etirazın bir formasıdır. Digər tərəfdən, müxalifət partiyaları bu qərardan son dərəcə narahatdır”.

Ekspertin fikrincə, baş nazir Ərdoğan da generallara çıxarılan sərt cəzanın gələcəkdə mənfi nəticələr doğuracağını bilir.