İkinci Qarabağ müharibəsi zamanı ermənilərlə yanaşı, PKK və PYD terror təşkilatlarının üzvləri də Azərbaycana qarşı vuruşdu. 44 günlük müharibədə əsir götürülən erməni Albert Mikayelyan etiraf etmişdi ki, İraqdan Qarabağa kürd əsilli 1500-dən artıq döyüşçü gətirilib. Onun sözlərindən aydın olurd ki, PKK və PYD-nin Süleymaniyyədə yerləşən əsas qanadının muzdlu-terrorçu döyüşçüləri 44 günlük müharibə zamanı Qarabağda qəfil peyda olmayıblar, onlar 2020-ci ilin ortalarından bu əraziyə daşınıblar.

Əldə olunan məlumatlara əsasən, kürd terror təşkilatının üzvləri Qarabağa iki yolla daşınıblar. Belə ki, onlar İraqdan – Süleymaniyyədən gətirilərək, İrəvana Mehri tərəfdən, indi ermənilərin əlində olan Zəngəzur ərazisindən keçiblər. Muzdluların hamısı da PKK və YPG döyüşçüləri olub. Hansı ki, bu barədə ciddi və təsdiqini tapmış faktlar mövcuddur.

Məlumat üçün bildirək ki, muzdlular Süleymaniyyədə Tələbani ailəsinə yaxın güclər tərəfindən himayə olunur. Region üzrə Dağlıq Qarabağa göndərilən bəlli silahlı kontingentə Lahur Tələbani nəzarət edir. Lahur Tələbaninin özü Azərbaycanın qonşu dövlətlərindən birinin daimi himayə etdiyi şəxsdir. PKK-nın Ermənistan gətirilib, oradan Dağlıq Qarabağa yerlşdirilən və Azərbaycana qarşı döyüşlərə cəlb edilən terrorçu dəstələrinə Həşdi Şabi və Şirzad Lahur rəhbərlik edib. Hər iki terrorçu Lahur Təlabaninin və demək ki, həm də Azərbaycanın yaxın qonşulardan birinin himayəsindədir…

Sual olun bilər ki, bu qədər yaraqlı İrəvana necə daşınıb. Etibarlı qaynaqlar bildirir ki, daşınma prosesi Kürdüstana məxsus “Fly Erbil Airways” və “Fly Armenia Airways” şirkətləri tərəfindən icra olunub. Maraqlıdır ki, adıgedən şirkətə Ermənistanın sərnişindaşıma bazarına girmək üçün beynəlxalq icazə ötən ilin iyulundan verilib. Şirkət rəhbərliyi bununla bağlı finport.am saytının müxbiri, Mariya Mkrtçyana verdiyi müsahibədə gülərək bildirib ki, bu çətin nəaliyyətə mühim əməkdaşlıqlar nəticəsində nail olublar və bundan çox məmnundurlar.

Xatırladaq ki, Ermənistanın Dağlıq Qarabağ savaşında iştirak etmələri üçün İraqdan gətirilən terror qruplarını Şuşaya yerləşdirməsi haqda məlumatlar hələ Tovuzda bir neçə günlük savaş başladığı günlərdən bəlli idi. Hətta bu barədə Türkiyənin “Anadolu” agentliyi türk kəşfiyyatının məlumatına istinadən yazırdı ki, terrorçular əsasən PKK-çılardır, onlara Azərbaycanın hərbi forması geyindiriləcək. Döyüşlərdə öldürüldükləri halda isə dünya KİV-lərinə və ictimai rəyinə, “Azərbaycan terrorçu döyüşçülərdən istifadə edir. Terrorçuların meyitləri əlimizdədir kimi” mesajlar verib, qara piar təşkil edəcəklər.

Əslində, bu faktlar imkan verir ki, Azərbaycan Ermənistanı beynəlxalq məhkəmə qarşısına çıxarsın. Çünki, faktiki olaraq Ermənistan PKK və YPG kimi terror təşkilatları ilə açıq əməkdaşlıq edir. Hətta onları muzdlu olaraq Dağlıq Qarabağda, Azərbaycanın dövlət ərazisində keçirdiyi, qanunsuz, hərbi əməliyyatlara cəlb edib. Bu, beynəlxalq hüquqa və konvensiyalara zidd hərəkət, insanlığa qarşı cinayətdir.

Haşiyə çıxaq ki, Azərbaycan-Rusiya-Ermənistan arasında imzalanan üçtərəfli sazişdən sonra, PKK və YPG muzdluları eyni marşrutla, Süleymaniyyəyə qayıdıb. Dağlıq Qarabağda döyüşən həmin silahlı dəstələrin hazırda İraq-Türkiyə sərhəddinə yerləşdirildiyi bildirilir. Təsadüfi deyil ki, Türk silahlı qüvvələri dünən PKK yaraqlılarına qarşı “Qartal Pəncəsi II” hərbi əməliyyatına başladı. Türk ordusu hazırda Türkiyə-İraq sərhəddindən 30-35 km məsafədə İraqın şimalındakı Qara dağı bölgəsində əməliyyat aparır.

Xatirladaq ki, bir neçə gün əvvəl Türkiyə prezidenti Rəcəb Tayyib Ərdoğan bəyan etmişdi: “Bir dəfələrlə demişəm və bir daha bəyan edirəm ki, Türkiyə Silahlı Qüvvələri günün və gecənin istənilən vaxtında Sincar bölgəsindən PKK terrorçularını təmizləmə əməliyyata başlaya bilər“. Görünür, prezident Ərdoğan bunu söyləyən vaxt Türkiyə Baş Qərargahının növbəti “Qartal Pəncəsi” əməliyyatı üçün planı hazır idi.

Onu da qeyd edək ki, bu əməliyyatın hazırlanması çox qısa müddət ərzində, amma yüksək səviyyədə həyata keçirildi. Ehtimal ki, bu hazırlıq dekabrda solçu-marksist (YPG, PKK) SDF kəskinləşməsindən dərhal sonra, Türkiyədə terror təşkilatı kimi təsbit olunmuş sol marksist təşkilat SDF (YPG / PKK) silahlı dəstələrinin İraq Kürdüstanının peşmərqələri ilə döyüşə girərək onların ərazilərinə girməyə çalışdığı zaman başladı. Qeyd etmək vacibdir ki, onlar ağır artilleriyadan – toplardan istifadə edərək bölgəyə girməyə çalışdılar.

Bütün bunlar öz yerində. İndi oxucularımız sual edə bilər ki, bəs, Tələbanini himayə edən dövlət hansıdır? Qarabağa terrorçular göndərən Tələbanini bu dövət niyə himayə edir? Əslində, bu sualların cavabı aydındır. Cavabı bizə aydın olmayan yeganə sual budur ki, bizim İraqdakı diplomatımız bu müddət ərzində nə iş görürdü?

Söhbət Azərbaycanın İraqdakı səfirliyinin müvəqqəti işlər vəkili Nasir Məmmədovdan gedir. Axı, diplomatlar həm də “eşidən qulaq” olmalıdır. N.Məmmədovun fəaliyyətini araşdıranda şahidi oluruq ki, onun iş prinsipi İraqdakı ziyarətgahlara baş çəkməkdən ibarətdir. Vikipediyada və saytlarda onun haqqında hər hansı ciddi məlumat da yoxdur, hər hansı iş gördüyü də yazılmayıb. Sadəcə, görünən odur ki, ziyarətgahlara baş çəkmlə, qurban kəsməkə məşğuldur.

Təbii ki, səriştəsizliyi adi sürücüyə, dülgərə, mühəndisə bağışlamaq olar, amma diplomata yox! Diplomat səriştəsiz, bacarıqsız oldusa, ölkənin bir qulağı, bir gözü kor olur. Sabah İraqda ölkəmizə qarşı “diplomatik xaos” planı hazırlansa, biz bunu kimdən eşitməliyik?

Yeri gəlmişkən, onu da qeyd edək ki, Azərbaycanın İraqdakı diplomatik nümayəndəliyi cəmi üç nəfərdən ibarətdir. Müvəqqəti işlər vəkili və daha iki nəfər. Buna baxmayaraq onlar, aylığı 15.000 ABŞ dolları məbləğində ofis kirayələyib. Yəqin çoxları düşünər ki, qeyd olunan məbləğdə aylığı olan ofis həm də mənzillidir. Yox, dövləti üçün lazım olan xidməti göstərməyən diplomat ofisin yerləşdiyi, Bagdadin “Yaşıl zona”sında, ”Babil” oteldə xüsusi nömrə kirayələyib ki, oranın da məsrəfi başqadır. Bu da sirr deyil ki, məsrəflər Azərbaycan dövlətinin hesabına ödənilir. Ayrıca müvəqqəti işlər vəkili bu məbləği aidiyyatı idarələrdən nə XİN, nə də Maliyyə Nazirliyi ilə razılaşdırıb. Sadəcə, belə etdiyini və ödəniləcək məbləği bildirib…

Bir daha vurğulayaq ki, bütün dünya, Azərbaycanı sevən, sevməyən hər kəs PKK və İraq mövzusunun Dağlıq Qarabağdakı savaş müddətində vacib məqam olduğunu dilə gətirib. 44 gün ərzində hər kəsin danışdığı mövzu haqqında müəqqəti işlər vəkilinin nə yerli, nə xarici mediyaya bir cümləsini görən, İraqın bir rəsmi dövlət qurumunda görüşü barədə eşidən olmadı.

Bundan sonra N.Məmmədov Azərbaycanda hansı fəaliyyət göstərər, nə kimi post tutar, hara ucalar onu demək çətindir. Amma buna paralel, onun bu günə qədərki fəaliyyətini, 44 günlük susqunluğunun səbəblərini araşdırmaqda böyük fayda olduğunu düşünürük…/Hurriyyet.org