Rusiyanın və onun ordusunun Ukraynada sözün həm də hərfi mənasında bataqlıqda ilişməsi bu ölkənin Cənubi Qafqazdakı ən yaxın, rəsmi bəyanatlarda deyildiyi kimi, ənənəvi və təbii müttəfiqi hesab edilən Ermənistan rəhbərliyinin maraqlı davranışları ilə müşaiyət olunur.

 Gundemxeber.az virtualaz.org-a istinadən  xəbər verir ki, məhz indiki vaxtda-Rusiyaya Ermənistandan siyasi dəstəyin heç vaxt olmadığı kimi zəruri olduğu günlərdə baş nazir Nikol Paşinyan yolunu Moskvadan yox, Parisdən salmağa qərar verib.

Erməni KİV-ləri xəbər verir ki, Paşinyan bu gün Fransaya işgüzar səfərə yola düşüb. Onun başçılıq etdiyi nümayəndə heyətinə xarici işlər naziri Ararat Mirzoyan, səhiyyə naziri Anait Avanesyan, ərazi idarəetmə və infrastruktur naziri Qnel Sanosyan, habelə digər hökumət nümayəndələri daxildir. Səfər zamanı Paşinyan Fransa prezidenti Emmanuel Makronla görüş keçirəcək, sonra onlar Parisdə “Ambisiyalar: Ermənistan-Fransa” adlı səs-küylü ad qoyulan forumda iştirak edəcəklər.

Qeyd edək ki, əslində bu günlərdə Paşinyanın Moskvaya səfəri planlaşdırılırdı. Belə ki, Rusiyanın Ukraynaya qarşı hərbi müdaxiləsindən əvvəl prezident Vladimir Putin Paşinyana zəng vurmuşdu və onu Moskvaya dəvət etmişdi. Amma daha sonra elan edildi ki, Ermənistanın baş naziri Fransaya səfər edəcək. Belə görünür ki, Rusiyanın Ukraynaya qarşı hərbi müdaxilə planının ciddi şəkildə axsaması, Moskvanın bu hərbi təcavüz aktına görə misli görünməmiş beynəlxalq təcridlə üzləşməsi və ona qarşı dağıdıcı iqtisadi sanksiyaların tətbiq edilməsi Ermənistan rəhbərliyinə öz müttəfiqindən məsafə saxlamaq fürsəti verib. Paşinyan qərara alıb ki, indi Rusiyanın yanında dayanmalı vaxt deyil və Qərbdəki himayəçiləri, indiki halda Fransa ilə məsləhətləşmələrə, danışıqlara daha çox ehtiyac var.

Bu, Ermənistanın Rusiyaya növbəti xəyanəti hesab edilə bilər. Aydın görünür ki, Ermənistan Rusiyanın Ukraynada düşdüyü mürəkkəb vəziyyətdən öz maraqları üçün istifadə edir və ənənəvi müttəfiqinə arxa çevirir. Özü də onun heç vaxt olmamış qədər mürəkkəb geosiyasi, hərbi, iqtisadi və siyasi situasiya içərisində olduğu bir vaxtda.

Ermənistanda nəşr edilən “Hraparak” nəşri bu mövzu ilə bağlı yazır ki, Rusiya Ermənistanın antirusiya davranışlarından ciddi narahatdır, hesab edir ki, Ermənistan hakimiyyəti Avropa və ABŞ-la gizli oyunlarını davam etdirir.

“Bizim məlumatlarımıza görə Rusiyanın güc strukturları erməni KİV-lərinin aktiv monitorinqini həyata keçirir, ona görə ki, hakimiyyət nümayəndələrinin Rusiya-Ukrayna müharibəsi ilə bağlı hansı mövqelərdən çıxış etdiyini başa düşsün. O cümlədən dövlət KİV-lərinin məzmunu yaxından izlənilir”, - nəşr yazır.

Bildirilir ki, monitorinqin nəticəsində gündəlik arayışlar Ermənistan hakimiyyətinə də göndərilir. Sübut 

qismində baş nazir Nikol Paşinyana təqdim olunur ki, Ermənistan antirusiya təbliğatına köklənib və hakimiyyət nümayəndələri bu yöndə mövqelər bildirir. “Hər belə halda təcili tədbirlər görmək və günahkarları cəzalandırmaq tələb olunur. Rusiya artıq Paşinyanın ikili oyunlarına dözmək niyyətində deyil, sədaqətə və müttəfiqliyə dair sübutlar tələb edir”, - nəşr yazır.

Paşinyan hakimiyyətə gələndən sonra birinci dəfə deyil ki, Rusiyanı bu cür qəzəbləndirir və ona arxa çevirir. Xatırladaq ki, Paşinyan hakimiyyətə gələndə onun komandasının aparıcı üzvləri açıq antirusiya mövqeyi ilə tanınan, Qərblə sıx əlaqələri olan siyasi fəallardan ibarət idi. Nəticədə Ermənistanla Rusiya arasında münasibətlərdə ciddi soyuqluq yarandı. Paşinyan münasibətləri düzəltmək üçün Ermənistanın Rusiyaya sədaqəti barədə çoxsaylı bəyanatlar versə də Moskvada ona sonadək etibar etmirdilər. 44 günlük Qarabağ müharibəsindən sonra isə Ermənistanda hakimiyyətə yaxın dairələr məğlubiyyətə görə Rusiyanı günahkar elan etdilər.

Ermənistanda antirusiya isteriyasının yeni dalğası başladı və aylarla davam etdi. Daha sonra Azərbaycan-Ermənistan sərhədində məlum hadisələr baş verəndə Yerevanda Rusiyadan növbəti dəfə küsdülər. Hesab etdilər ki, Rusiya, yaxud KTMT qismində Rusiya ordusu Ermənistanın köməyinə gəlməli idi, amma gəlməyib. Və həmin hadisələr zamanı Ermənistan rəhbərliyi bildirirdi ki, əgər KTMT sərhəd toqquşmalarına müdaxilə etməsə o zaman Yerevan “digər tərəfdaşlara” müraciət edəcək. Digər tərəfdaşlar isə əlbəttə ki, Qərb, konkret olaraq Fransa və ABŞ idi.

Sərhəd toqquşmalarına KTMT-nin müdaxiləsi üçün heç bir əsas olmadığı halda,-çünki atışmalar Ermənistan ərazisində yox, iki ölkə arasında sovet dövrü sərhədlərində gedirdi, - Yerevanın bu cür bəyanatlar verməsi Qərbə sığınmaq üçün növbəti bəhanə idi. Və indi Paşinyanın Parisə səfər etməsi və orada “Ambisiyalar: Ermənistan-Fransa” adlı forumun təşkili Ermənistanın Rusiyaya arxadan vurduğu növbəti zərbədir.

GundemXeber.Az