Ermənistanda Baş nazir Nikol Paşinyana qarşı kütləvi aksiyalar get-gedə intensivləşir. Ekspertlər bildirirlər ki, Ermənistandakı müəyyən qüvvələr onun Azərbaycanla sülh razılaşmasını həzm edə bilmirlər. Lakin Ermənistanın tərəfdaş olduğu ölkələr də sülhü dəstəkləyirlər.

Maraqlıdır, bəs Paşinyan hakimiyyətdən gedərsə, 10 noyabr bəyanatı pozula bilərmi? Qarabağda yenidən müharibənin başlama ehtimalı varmı? Xankəndi əməliyyatı başlaya bilərmi? GundemXeber.Az xəbər verir ki, məsələ ilə bağlı Hərbi polisin sabiq rəisi, ehtiyatda olan polkovnik, hərbi ekspert Rövşən Məhərrəmov Bakupost.az -a açıqlama verib.
Onun sözlərinə görə, saziş pozula bilməz:

“Ermənistanda aksiyaları törədənlər keçmiş separatçılardır: Qarabağda Xocalı hadisələrini törədən Koçaryan və Sarkisyan. Bu çevrilişin baş tutmasına inanmıram. Çünki Avropa və Amerika bütün gücünü sərf edəcək ki, Paşinyan hakimiyyətdən getməsin.
Hətta çevriliş olarsa belə, 10 noyabr sazişi pozulmayacaq. Çünki bunu Rusiya Federasiyası, Azərbaycan Prezidenti və Ermənistan Baş naziri imzalayıb”.

Ekspert Qarabağda münaqişənin başlaya biləcəyini düşünür: “Başqa qüvvələr Ermənistanda hakimiyyətə gəlsə, münaqişə başlaya bilər. Hazırda müxtəlif vaxtlarda sərhəddə erməni təxribatlarının şahidi oluruq. Əlbəttə, bunun arxasında Rusiya dayanır. Bildiyiniz kimi, ermənilər rus sülhməramlıların gözləri qarşısında Qarabağ ərazisində səngərlər qazır, mövqelərini möhkəmləndirirlər.
Azərbaycan tərəfdən Rusiyaya mesaj verilməlidir ki, sülhməramlı kimi öz missiyalarını həyata keçirsinlər, əgər keçirmirlərsə, Azərbaycan müstəqil dövlət kimi öz ərazi bütövlüyünü tam şəkildə bərpa edəcək.
Digər bir məqam isə 5 il müddət başa çatdıqdan sonra sülhməramlıların Azərbaycan ərazisini tərk etməsidir. Müddət azaldıqca sərhəddə lokal toqquşmalar tez-tez olacaq. Rusiya sülhməramlılarının bizim ərazimizdə qalma müddətini artırmaq məqsədilə bunları edir.
Bir məsələ var ki, Paşinyan sülhün tərəfdarıdır. Sarkisyan və Koçaryan qüvvələri buna mane olmağa böyük cəhd göstərirlər. Paşinyan Türkiyə ilə də münasibətlərin normallaşması istiqamətində addımlar atır. Əlbəttə ki, bu, Rusiyaya sərf etmir”.
Hərbi-ekspert Rusiya olmadan Azərbaycan və Ermənistanın rahat anlaşa biləcəyini vurğulayıb:
“Rusiya olmasaydı, Azərbaycanla Ermənistan arasında çoxdan sülh müqaviləsi bağlana bilərdi. İki ölkə arasında bu münaqişə də başa çatardı. Ermənistanda sadə insanlar müharibə istəmirlər. Bir dəfə müharibə oldu və çoxlu itkilər verdilər. Onlar da Azərbaycanın və ordumuzun bugünkü gücünü bilirlər. Hesab edirəm ki, Rusiya bu məsələyə qarışmasa, o müqavilə daha tez imzalana bilər”.

R.Məhərrəmov Xankəndi əməliyyatının başlama ehtimalı ilə bağlı fikirləri də şərh edib:
“Bildiyiniz kimi, sülhməramlılar Laçın koridorunda giriş-çıxışlara nəzarət edirlər. Başqa-başqa təxribatçı qüvvələr həmin ərazidən Azərbaycan ərazisinə keçə bilirlər. Son zamanlar belə təxribatlar artıb. Əgər belə təxribatlar davam etsə, biz heç kimdən soruşmadan Xankəndi və ətraf ərazilərə zərbələr endirə bilərik. Ona görə də bütün bunlar sərhədin delimitasiya və demarkasiyasından asılıdır. Əlbəttə ki, Azərbaycan Xankəndində öz hakimiyyətini qurmalı və bayrağımız orada da dalğalanmalıdır”.

Gundemxeber.Az