Əfqanıstan Talibanı cümə axşamı diplomatiyanın inkişafı üçün bəzi liderlərinin səyahət qadağasına son qoyulmasına çağırıb. BMT-nin Təhlükəsizlik Şurasında istisnanın edilib-edilməməsi ilə bağlı fikir ayrılığı davam edir.

Təhlükəsizlik Şurasının xarici işlər naziri Əmir Xan Müttəqi də daxil olmaqla, 13 Taliban liderinə xaricə səyahətə icazənin müddəti keçən cümə günü üzv dövlətlərin istisnaların mümkün uzadılması ilə bağlı razılığa gələ bilməməsindən sonra başa çatıb.

“Səyahət qadağası ünsiyyət və danışıqlar qapısının bağlanmasına bərabərdir. Bu, problemlərin sülh yolu ilə həlli yoluna əngəldir” - deyə, Talibanın Qətərdəki siyasi ofisinin rəhbəri Süheyl Şahin Amerikanın Səsinə bildirib.

Təhlükəsizlik Şurasının 2011-ci il qətnaməsinə əsasən, aktivlərinin dondurulması və səyahət qadağaları da daxil olmaqla, ümumilikdə 135 Taliban rəsmisi sanksiyalara məruz qalır. Bununla belə, ABŞ da daxil olmaqla, digər ölkələrin rəsmiləri ilə sülh danışıqları aparmalarına imkan vermək üçün Talibanın 13 rəsmisinin səyahət qadağasını qaldıran istisnalar müntəzəm olaraq Təhlükəsizlik Şurası tərəfindən yenilənirdi.

Qadağanın vaxtı keçən cümə günü, Talibanın bütün əfqanların, o cümlədən qadınların hüquqlarına hörmət edəcəkləri, inklüziv hökumət quracaqları və terrorizmlə mübarizə aparacaqları ilə bağlı öhdəliklərini yerinə yetirməməsi səbəbi ilə Qərb ölkələrinin onun avtomatik yenilənməsinə etirazlarından sonra başa çatıb.

Birləşmiş Ştatlar və müttəfiq dövlətlər daha az sayda Taliban rəsmisinin səyahətini yalnız ABŞ rəsmilərinin son aylar Müttəqinin rəhbərlik etdiyi Taliban nümayəndələri ilə müntəzəm olaraq danışıqlar apardığı Qətərlə məhdudlaşdırmağı təklif edib.

Çin və Rusiya bir il əvvəl Əfqanıstanda hakimiyyəti ələ keçirmiş İslamçı qruplaşmanın bütün 13 məmuruna səfərlərini davam etdirməyə icazə verilməsi qərarını müdafiə edib. Çin rəsmiləri insan haqlarının səyahət problemləri ilə əlaqələndirilməsinin əleyhinə çıxış edərək, bunun “əks-məhsuldar” olduğunu deyib.

Şahin Amerikanın Səsinə “Bu kritik zamanda diplomatiya və dialoqa ehtiyac olduğunu hamının anladığına ümid edirəm. Qeyd etmək lazımdır ki, biz səyahət qadağasının qaldırılmasını dəstəkləyən hər kəsin səylərini yüksək qiymətləndiririk” deyib.

Təhlükəsizlik Şurasının üzvləri razılığa gələnə qədər sanksiya siyahısında olan Taliban rəsmilərindən heç biri xaricə səfər edə bilməz