Rusiyanın İndoneziyada keçirilən G-20 sammitində iştirak edən ən yüksək səviyyəli rəsmisi, xarici işlər naziri Sergey Lavrov Bali adasına gələrkən xəstəxanaya yerləşdirildiyi barədə mətbuatda yayılan xəbərlərdən sonra sağlam olduğunu sübut etmək üçün şortik və maykada videoya çəkilib.

Bazar ertəsi bir çox siyasi və xəstəxana rəsmilərinin Lavrovun "sağlamlıq müayinəsi üçün" xəstəxanaya aparıldığını dediyi xəbərlərə cavab olaraq, Rusiya Xarici İşlər Nazirliyinin sözçüsü Mariya Zaxarova Lavrovun xəstə olmadığını sübut etmək üçün onun videosunu yayımlayıb.

O, xəbərləri "ən yüksək səviyyəli saxtakarlıq" adlandırsa da, 72 yaşlı nazirin xəstəxanada olub-olmaması ilə bağlı şərh verməyib.

Videoda kiçik bir masa arxasında əyləşən Lavrov "Onlar bizim prezidentimiz haqqında 10 ildir xəstə olduğunu yazır. Bu, siyasətdə yeni oyun deyil" deyib.

Associated Press-in xəbər agentliyi Bali qubernatoru Vayan Kosterə istinadən verdiyi məlumata görə, Lavrov adanın ən böyük Sanqla xəstəxanasına aparılıb, qısa müayinədən sonra oradan ayrılıb və "özünü yaxşı hiss edir".

Reuters və France Press agentlikləri də rəsmilərə istinadən Lavrovun xəstəxanaya getdiyini təsdiqləyib.

Lavrov Rusiya nümayəndə heyətinə Prezident Vladimir Putinin keçən həftə bəzi ölkələrin Rusiyanın Ukraynaya əsassız müdaxiləsi səbəbindən görüşə buraxılmaması ilə bağlı xəbərdarlıqları fonunda iştirak etməyəcəyini təsdiqləməsindən sonra başçılıq edir.

Dünya iqtisadi istehsalının 80 faizindən çoxunu təmsil edən ölkə rəsmilərinin bir araya gəldiyi G-20-nin iki günlük toplantısında müzakirə olunacaq məsələlər arasında Rusiyanın Ukraynaya qarşı müharibəsinin də olacağı gözlənilir.

Sammitdə iştirak edən ABŞ Prezidenti Co Bayden və Çin lideri Si Cinpin bazar ertəsi səhər görüşüb.

GundemXeber.Az