İsrailin "Qayıdış Qanunu" kimi tanınan sənədində deyilir ki, nənə və ya babalarından biri yəhudi olan hər kəs İsrailə köçüb İsrail vətəndaşlığını ala bilər. Rusiya Prezidenti Vladimir Putinin Ukraynada müharibədə döyüşmək üçün 300 min əsgəri səfərbər etmək qərarı minlərlə rusiyalını İsrailə köçməyə vadar edib və on minlərlə insan yoldadır.

Rusiya yəhudiləri İlay Aqarışev və Olqa Şpektorova son altı ildə iki qızı ilə İsrailə köçməyi düşünürdü. Onlar hətta Moskvada ivrit dilini öyrənməyə başlamışdılar. Lakin Rusiyanın Ukraynaya hərbi müdaxiləsi onları artıq getmək vaxtı olduğuna əmin etdi. İlay Aqarışev: "Mən həqiqətən müharibənin əleyhinəyəm və müharibədə iştirak etmək istəmirəm. Dostlarımın dostları hərbi xidmətə çağırıldı, hətta döyüşlərdə həlak olanlar da oldu".

Olqa Şpektorova: "Biz gəlmək barədə uzun müddət müzakirə etdik, lakin Rusiyada vəziyyət buna həqiqətən təkan verdi. İndi bir az yorğunuq, amma bundan sonra hər şeyə hazırıq".

İsraildə immiqrasiya və yeni mühacirlərin qəbulu ilə məşğul olan Yəhudi Agentliyi Rusiyanın Ukraynada müharibəyə başlamasından bəri 30 mindən çox rusiyalının gəldiyini və Putinin 300 min nəfərin orduya çağırılacağını elan etməsindən sonra müraciətlərin sayının sürətlə artdığını bildirib. Qüdsün Hebru Universitetində Conatan Dikel Çen: "Düşünürəm ki, bu mini miqrasiya dalğası əlbəttə ki, Putin və hökumətinin hərbi xidmətə çağırından, ehtiyatda olanların və başqalarının məcburi hərbi xidmətə çağırılmasına başlamaq əmrindən sonra başlayıb."

İsrailə mühacirət etmək cəhdlərinə görə doqquz il Sovet həbsxanalarında yatmış keçmiş dissident, israilli siyasətçi Natan Şaranski deyir ki, yəhudi ailə bağları olan rusların ölkəni tərk etməsi daha çox Putinin Rusiya cəmiyyətinə tətbiq etdiyi avtokratik məhdudiyyətləri ilə bağlıdır. "Bu, Putinin ifadə azadlığına, təşkilatlanma azadlığına, xaricdəki digər insanlarla ünsiyyət azadlığına və bəlkə də ən əsası azad müzakirə və fərqli fikirlərin ifadə azadlığına bəzi məhdudiyyətlər qoyduğu andan başlayıb. Bu, xüsusilə ziyalılar üçün çox qorxulu bir şeydir".

Bir çox rusiyalı yəhudi nənə və babalarının olub-olmadığını tapmaq üçün Rusiya milli arxivlərində öz köklərini araşdırır. Bu onlara İsrailin "Qayıdış Qanunu"na əsasən İsrailə mühacirət etmək hüququ verir. Şaranski deyir ki, təxminən 600 min rusiyalının yəhudi ailə əlaqəsi var.

Gundemxeber.az